رۋسلان جاقسىلىقوۆ پرەزيدەنتكە – قارۋلى كۇشتەردىڭ جوعارعى باس قولباسشىسىنا قورعانىس مينيسترلىگىنىڭ بىلتىر اتقارعان قىزمەتىنىڭ ناتيجەلەرى تۋرالى ەسەپ بەردى. كەزدەسۋدە وسى جىلعا ارنالعان جوسپارلار كەشەنى تالقىلاندى, دەپ حابارلايدى Egemen.kz اقورداعا سىلتەمە جاساپ.
قاسىم-جومارت توقاەۆقا اسكەري دايىندىقتىڭ جاي-كۇيى, قازاقستان ارمياسىنىڭ قۇرامى مەن قۇرىلىمىن جەتىلدىرۋ, جۇرگىزىلگەن جەدەل جانە جاۋىنگەرلىك ازىرلىك شارالارى جونىندە اقپارات بەرىلدى.
گەنەرال-پولكوۆنيك رۋسلان جاقسىلىقوۆ بىلتىر ارنايى وپەراتسيالار كۇشتەرى قۇرىلعانىن, دەسانتتىق-شابۋىلداۋ اسكەرىنىڭ الەۋەتى ارتىپ كەلە جاتقانىن جەتكىزدى.
قازىرگى سىن-قاتەرلەر مەن قاۋىپتەرگە بايلانىستى اسكەردىڭ جاۋىنگەرلىك ازىرلىك باعدارلاماسى قايتا قارالدى. مەملەكەت باسشىسىنا ارمياداعى جاعىمسىز جايتتاردىڭ الدىن الۋ, جاستاردىڭ اسكەري بورىشىن ورىنداۋعا دەگەن قۇلشىنىسىن ارتتىرۋ, سونداي-اق الەۋمەتتىك قامسىزداندىرۋ جۇيەسىن جەتىلدىرۋ جونىندە قورعانىس ۆەدومستۆوسىنىڭ قابىلداپ جاتقان شارالارى تۋرالى مالىمەت بەرىلدى.
قورعانىس ءمينيسترى قارۋلى كۇشتەردى زاماناۋي تەحنيكامەن جانە قارۋ-جاراقپەن جابدىقتاۋ, اۋماقتىق قورعانىس اسكەرىن دامىتۋ, اسكەري ينفراقۇرىلىمدى جەتىلدىرۋ جانە بىتىمگەرلىك مۇمكىندىكتەرىن كەڭەيتۋ جونىندە باياندادى. سونداي-اق پرەزيدەنتكە پايدالانىلمايتىن اسكەري م ۇلىك پەن قارۋ-جاراقتى جويۋ شارالارى تۋرالى ەسەپ بەرىلدى.
بۇدان بولەك, جوعارعى باس قولباسشىعا جاۋىنگەرلىك ازىرلىكتى شىڭداۋ, سونىڭ ىشىندە حالىقارالىق دەڭگەيدەگى اسكەري وقۋ-جاتتىعۋ جيىندارىن وتكىزۋگە قاتىستى بيىلعا جوسپارلانعان ءىس-شارالار تۋرالى باياندالدى.
كەزدەسۋ سوڭىندا قاسىم-جومارت توقاەۆ اسكەري قىزمەتشىلەردىڭ ءومىرى مەن دەنساۋلىعىن ساقتاۋ, اسكەري ورتاداعى مورالدىق-پسيحولوگيالىق احۋالدى جاقسارتۋ ماڭىزدى ەكەنىن اتاپ ءوتتى. سونداي-اق مينيسترلىككە ەلىمىزدىڭ قورعانىس قابىلەتىن ودان ءارى ارتتىرۋ, مەرزىمدى اسكەري قىزمەتكە شاقىرۋدىڭ كوكتەمگى ناۋقانىن ساپالى ۇيىمداستىرۋ جونىندە بىرقاتار تاپسىرما بەردى.