تۇرىك كاسىپكەرلەرى قازاقستاندىق فەرمەرلەرگە 1000 توننا جوعارى ساپالى ماقتا تۇقىمىن جەتكىزەدى. ءتيىستى ۋاعدالاستىققا شىمكەنتتە وتكەن «قازاقستان رەسپۋبليكاسىنداعى ماقتا شارۋاشىلىعىن دامىتۋ پەرسپەكتيۆالارى» بيزنەس-فورۋمىندا قول جەتكىزىلدى, دەپ حابارلايدى Egemen.kz اۋىل شارۋاشىلىعى مينيسترلىگىنە سىلتەمە جاساپ.
تۇركيا رەسپۋبليكاسىنان شاقىرىلعان قوناقتار - «PROgen» كومپانياسى وتاندىق وسىمدىك وسىرۋشىلەرگە ءبولىپ تولەۋ شارتىمەن ساتىلاتىن اۋرۋلار مەن زيانكەستەرگە ءتوزىمدى ماقتانىڭ جاڭا تۇرلەرىن تانىستىردى. «تۇركىستان» اكك تۇقىم ساتىپ الۋعا قاجەتتى قارىز سوماسىن جىل سوڭىنا دەيىنگى مەرزىمدە بەرۋگە دايىن.
بۇعان دەيىن قازاقستان مەن تۇركيا اراسىندا تۇقىم شارۋاشىلىعىن دامىتۋ بويىنشا ىنتىماقتاستىق تۋرالى مەموراندۋمعا قول قويىلعان ەدى.
بيزنەس-فورۋم جۇمىسىنا اۋىل شارۋاشىلىعى مينيسترلىگىنىڭ وكىلدەرى, تۇرىك كاسىپكەرلەرى, ءشيتتى ماقتا وندىرۋشىلەر, ماقتا وڭدەۋ زاۋىتتارىنىڭ, عىلىمي ۇيىمداردىڭ, ماقتا مايىن ءوندىرۋ زاۋىتتارىنىڭ وكىلدەرى, سونداي-اق ماقتا تۇقىمىن وندىرۋشىلەر قاتىستى.
فورۋم بارىسىندا اۋىل شارۋاشىلىعى ۆيتسە-ءمينيسترى ابىلقايىر تامابەك ءسوز سويلەدى. ول ماقتا شارۋاشىلىعى سالاسىن دامىتۋدىڭ ماڭىزدىلىعىن اتاپ ءوتتى.
«مەملەكەتتىك ساتىپ الۋلارداعى قازاقستاندىق قامتۋ ۇلەسىن, ونىڭ ىشىندە تۇرمىستىق تاۋارلار مەن ماقتانى قايتا وڭدەۋ ونىمدەرىن ۇلعايتۋ ماسەلەسى پىسىقتالىپ جاتىر. ءبىرىنشى كەزەڭدە ۇلتتىق كومپانيالار 70% دەيىن وتاندىق ماقتا ونىمدەرىن توسەك-ورىن, سۇلگىلەر ساتىپ الۋى ءتيىس. مەملەكەتتىك قورعانىس تاپسىرىسىن قالىپتاستىرۋ كەزىندە جەرگىلىكتى قامتۋ ۇلەسىن 30%-دان 70%-عا دەيىن ۇلعايتۋ جوسپارلانىپ وتىر», دەپ اتاپ ءوتتى ۆيتسە-مينيستر.
بۇگىنگى كۇنى سالانىڭ نەگىزگى ماقساتى - ناقتى نارىقتىق تەتىكتەردى ەندىرۋ ارقىلى قازاقستاندىق ماقتا ءوندىرىسىن باسەكەگە قابىلەتتى جانە جوعارى رەنتابەلدى ەتۋ.
مينيسترلىك قازاقستان پرەزيدەنتىنىڭ تاجىريبەلىك شارۋاشىلىقتار بازاسىندا باستاپقى تۇقىم شارۋاشىلىعىن دامىتۋ, ونىڭ ىشىندە جابدىقتاردى جاڭارتۋ جانە اگرارلىق عىلىمدى ىنتالاندىرۋ جونىندەگى تاپسىرماسىن ورىنداۋ ماقساتىندا سەلەكتسيا جانە تۇقىم شارۋاشىلىعى سالاسىن دامىتۋ بويىنشا كەشەندى جوسپار ازىرلەپ جاتىر. ول سەلەكتسيا مەن تۇقىم شارۋاشىلىعىنىڭ بارلىق كەزەڭدەرىندە, سونىڭ ىشىندە ماقتا شارۋاشىلىعىندا ورىن الاتىن جۇيەلى پروبلەمالىق ماسەلەلەردى شەشۋگە باعىتتالعان شارالاردى كوزدەيدى.
بيزنەس-فورۋم قورىتىندىسى بويىنشا تۇركيا رەسپۋبليكاسىنىڭ شىعىس جەرورتا تەڭىزى اۋىل شارۋاشىلىعى زەرتتەۋلەر ينستيتۋتى مەن «ماقتا شارۋاشىلىعى جانە باقشا شارۋاشىلىعى اشتس» جشس اراسىندا بىرلەسكەن عىلىمي زەرتتەۋلەر جۇرگىزۋ, ماقتانىڭ جاڭا سورتتارىن شىعارۋ بويىنشا ىنتىماقتاستىق تۋرالى كەلىسىمگە قول قويىلدى.