بيىل الماتىدا 17 سەيسميكالىق ستانتسيا ورناتۋ جوسپارلانىپ وتىر. بۇل تۋرالى پرەمەر-مينيستر ءاليحان سمايىلوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان, دەپ حابارلايدى Egemen.kz.
- سەيسميكالىق قاۋىپتى وڭىرلەردەگى جويقىن جەر سىلكىنىستەرىنە ازاماتتىق قورعاۋ جۇيەسىن دايىنداۋ ماقساتىندا 2021-2023 جىلدارعا ارنالعان قازاقستان رەسپۋبليكاسىنىڭ سەيسميكالىق قاۋىپسىزدىگىن قامتاماسىز ەتۋ جونىندەگى جۇمىستىڭ تيىمدىلىگىن ارتتىرۋ جونىندەگى شارالار كەشەنى بەكىتىلدى, - دەلىنگەن ءاليحان سمايىلوۆتىڭ جاۋابىندا.
جول كارتاسىن ىسكە اسىرۋ شەڭبەرىندە مۇددەلى مەملەكەتتىك ورگاندار كەلەسى جۇمىستاردى جۇرگىزۋى ءتيىس: وبلىستاردىڭ اۋماقتارىن ەگجەي-تەگجەيلى سەيسميكالىق اۋدانداستىرۋ كارتالارىنىڭ جيىنتىعىن ازىرلەۋ; باقىلاۋ ستانتسيالارىن قۇرا وتىرىپ, سەيسمولوگيالىق باقىلاۋ جۇيەلەرىن دامىتۋ; جەر سىلكىنىسى تۋرالى ەرتە حابارلاۋدىڭ اۆتوماتتاندىرىلعان جۇيەلەرىن ەنگىزۋ; جەر سىلكىنىسى تۋىنداعان جاعدايدا ماتەريالدىق رەسۋرستار مەن قارجى رەزەرۆىن قۇرۋ جونىندە شارالار قابىلداۋ; حالىق اراسىندا ۇگىت-ناسيحات جۇمىستارىن جۇرگىزۋ جانە پەرسونالدى, وندىرىستىك, جارىلىس-ءورت قاۋىپتى وبەكتىلەردىڭ پەرسونالىن وقىتۋ.
پرەمەر-مينيستر 2021 جىلى «2021-2023 جىلدارعا ارنالعان قازىرگى زامانعى عىلىمي-ادىستەمەلىك نەگىزدە وبلىستار مەن قالالار اۋماقتارىنىڭ سەيسميكالىق قاۋىپتىلىگىن باعالاۋ» نىسانالى قارجىلاندىرۋ باعدارلاماسى شەڭبەرىندە شىعىس قازاقستان وبلىسى ءۇشىن 10 سەيسميكالىق ستانتسيا ساتىپ الىنعانىن ءتۇسىندىردى. 2022 جىلى باقىلاۋ ستانتسيالارىنىڭ جەلىسىن كەڭەيتۋ ماقساتىندا الماتى جانە شىعىس قازاقستان وبلىستارىنىڭ اۋماقتارىندا 8 سەيسميكالىق ستانتسيا ورناتىلدى.
«سونداي-اق 2022 جىلى الماتى قالاسىندا 11 ستانتسيا ورناتۋعا جەرگىلىكتى بيۋدجەتتەن 547 ملن تەڭگە ءبولىندى. ال 2023 جىلعا قاراي تاعى 17 ستانتسيا ورناتۋ جوسپارلانىپ وتىر», دەپ جازدى ءاليحان سمايىلوۆ.