ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك-ەڭبەك سالاسى بويىنشا قوعامدىق كەڭەسىنىڭ كەزەكتى وتىرىسىنا قاتىسۋشىلار 2022 جىلى حالىقتى جۇمىسپەن قامتۋعا جاردەمدەسۋ شارالارىن, الەۋمەتتىك-ەڭبەك سالاسىنىڭ قوعامدىق ماڭىزى بار ماسەلەلەرى بويىنشا جەكە جانە زاڭدى تۇلعالاردىڭ وتىنىشتەرىن قارادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
وسىلايشا, حالىقتى جۇمىسپەن قامتۋعا جاردەمدەسۋدىڭ كورسەتىلگەن شارالارى جانە وسى باعىتتاعى الداعى جوسپارلار تۋرالى ەڭبەك مينيسترلىگىنە قاراستى حالىقتى جۇمىسپەن قامتۋ دەپارتامەنتىنىڭ ديرەكتورى اسقار نيازوۆ ايتىپ بەردى.
ءوز سوزىندە ول ەڭبەك نارىعىنىڭ قازىرگى جاي-كۇيى, 2022 جىل ىشىندە قول جەتكىزىلگەن جۇمىسقا ورنالاسۋ كورسەتكىشتەرى تۋرالى حاباردار ەتىپ, سول كورسەتكىشتەرگە قول جەتكىزگەن قولداۋ شارالارىنا ەگجەي-تەگجەيلى توقتالىپ ءوتتى.
ونىڭ ايتۋىنشا, 2021 جىلى جۇمىس كۇشىنىڭ ءوسۋ قارقىنى ەكى ەسە ارتىپ, 76 مىڭ ادامعا جەتتى.
«بۇل رەتتە ەڭبەك نارىعىنا پاندەميا دا, الەمدىك ەكونوميكالىق ۇردىستەر دە اسەر ەتتى. سونىمەن قاتار, قازىر ەڭبەك نارىعىنا ەكى مىڭىنشى جىلدارى تۋعان ازاماتتار شىعا باستادى. بۇل وزگەرىستەر اسىرەسە جاستار اراسىندا جۇمىسسىزدىقتىڭ وسۋىنە جول بەرمەۋ ءۇشىن كەشەندى شارالار قابىلداۋدى تالاپ ەتەدى. سوندىقتان حالىقتى جۇمىسپەن قامتۋ بويىنشا جۇمىس بىرنەشە باعىت بويىنشا جۇرگىزىلۋدە, بۇل قولداۋ كورسەتۋ اۋقىمىن كەڭەيتۋگە مۇمكىندىك بەرەدى», دەپ ءبولىستى اسقار نيازوۆ.
ماسەلەن, مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس قازاقستاندا ءاربىر 10 مىڭ ادامعا 100 جۇمىس ورنىن قۇرۋ بويىنشا جۇمىس جۇرگىزىلۋدە, سونداي-اق ەلىمىزدە 10 ۇلتتىق جوبا ىسكە اسىرىلۋدا, ازاماتتاردى ەڭبەگى ارتىق وڭىرلەردەن ەڭبەك تاپشىلىعى بار وڭىرلەرگە كوشىرۋگە جاردەمدەسۋ شارالارى كورسەتىلۋدە.
«وسىنىڭ ارقاسىندا 900 مىڭنان استام ادام جۇمىسقا ورنالاستى. ونىڭ ىشىندە 28,8% – ۇلتتىق جوبالار شەڭبەرىندە, 37,1% – ء«اربىر 10 مىڭ تۇرعىنعا 100 جۇمىس ورنى» باعىتىنىڭ ارقاسىندا جانە 34% - جۇمىس بەرۋشىلەر ۇسىنعان بوس جۇمىس ورىندارىنا تۇردى. بۇل رەتتە اي سايىنعى زەينەتاقى اۋدارىمدارى ازاماتتاردىڭ 81%-ى ءۇشىن جۇزەگە اسىرىلادى», دەپ قورىتىندىلادى اسقار نيازوۆ.
سونىمەن قاتار, وتىرىستا «مەملەكەتتىك اننۋيتەتتىك كومپانيا ء«ومىردى ساقتاندىرۋ كومپانياسى» اق جانە «الەۋمەتتىك وڭالتۋدى دامىتۋدىڭ عىلىمي-پراكتيكالىق ورتالىعى» اق ۆەدومستۆولىق باعىنىستى ۇيىمدارىن دامىتۋ جوسپارلارى, سونداي-اق سىبايلاس جەمقورلىققا قارسى ءىس-قيمىل جانە قىزمەتكەرلەردىڭ قىزمەتتىك ادەپ نورمالارىن ساقتاۋى جونىندەگى ۆەدومستۆو جۇمىسىنىڭ ناتيجەلەرى قارالدى.