سەناتتىڭ قارجى جانە بيۋدجەت كوميتەتىنىڭ دەپۋتاتتارى مەملەكەت باسشىسىنىڭ جەكەلەگەن تاپسىرمالارىن ىسكە اسىرۋعا جانە ەلىمىزدىڭ كونستيتۋتسيالىق زاڭدارىنا وزگەرىستەر ەنگىزۋگە قاتىستى زاڭ جوبالارىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
وندا بيۋدجەتارالىق قاتىناستاردى رەفورمالاۋ, جاڭاشىلدار يندۋسترياسىن دامىتۋدى ىنتالاندىرۋ جانە مەملەكەتتىك-جەكەشەلىك ارىپتەستىك جۇيەسىن جەتىلدىرۋ ماسەلەلەرى كوزدەلىپ وتىر. ول جاڭالىقتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قارالعان بولاتىن. مەملەكەت باسشىسىنىڭ تاپسىرماسى بويىنشا ازىرلەنگەن قۇجات وڭىرلەردىڭ قارجىلىق دەربەستىگىن كۇشەيتۋگە, مەملەكەتتىك-جەكەشەلىك ارىپتەستىك جوبالارىن جوسپارلاۋ مەن ىسكە اسىرۋ پروتسەسىنىڭ اشىقتىعى قاعيداتىن ەنگىزۋگە مۇمكىندىك بەرەدى.
«قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى سوتتار مەن سوت اكىمشىلىگىنىڭ قىزمەتىن جەتىلدىرۋگە, قارجى سالاسىنداعى يننوۆاتسيالاردى دامىتۋداعى نەگىزگى تۇعىرناما رەتىندە «استانا» حالىقارالىق قارجى ورتالىعىنىڭ ودان ءارى قالىپتاسۋى مەن دامۋىن قامتاماسىز ەتۋگە باعىتتالعان.
پارلامەنتشىلەر زاڭ جوباسى قابىلدانعاندا ەلىمىزدەگى سوت جۇيەسىن بارلىق دەڭگەيدە جەتىلدىرۋگە مۇمكىندىك تۋادى جانە سوت اكىمشىلىگىن جاڭعىرتۋعا ىقپال ەتەدى دەپ سانايدى.
دەپۋتاتتار كوميتەتتىڭ كەڭەيتىلگەن وتىرىسىنىڭ قورىتىندىسى بويىنشا زاڭ جوبالارىن پالاتانىڭ قاراۋىنا جىبەرۋ تۋرالى شەشىم قابىلدادى.