«ادەبي ناسيحات پۋلى» جوباسى – قازاقستان جازۋشىلار وداعى مەن الماتى قالاسى مادەنيەت باسقارماسىنىڭ بىرىگىپ قولعا العان يگى شاراسى. ونىڭ ماقساتى – مەگاپوليستىڭ ءار اۋداندارىندا قالامگەرلەرمەن كەزدەسۋلەر ۇيىمداستىرىپ, ۇلتتىق بولمىسىمىزعا نەگىزدەلگەن رۋحاني قۇندىلىقتاردى دارىپتەۋ بولدى.
ارينە, كەزدەسۋلەر بارىسىندا مەملەكەتتىك ساياسات پەن رۋحانياتتاعى جاڭاشىلدىقتى ناسيحاتتاۋعا باسا دەن قويىلدى. وسى باعىتتاعى جۇمىستىڭ ءتۇيىنى قالاداعى كىتاپحانالاردا الماتى قالاسىندا تۇراتىن اقىن-جازۋشىلارمەن كەزدەسۋلەر ءوتتى. مادەنيەت باسقارماسىنا قاراستى قالالىق كىتاپحانالار جەلىسى ۇيىمداستىرعان ادەبي ءىس-شارا اۋەلى قازاقستان جازۋشىلار وداعىنىڭ باسقارما توراعاسى, اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەت جانە بەلگىلى جازۋشى, حالىقارالىق «الاش» ادەبي سىيلىعىنىڭ لاۋرەاتى قۋاندىق تۇمەنباەۆپەن كەزدەسۋدەن باستالدى. الماتىداعى قازاقستان جازۋشىلارى كىتاپحاناسىندا وتكەن كەزدەسۋدە اقىن مەن جازۋشى وقىرمانداردىڭ ادەبيەت پەن مادەنيەت, قوعامداعى باسقا دا وتكىر تاقىرىپتارعا وراي قويعان ساۋالدارىنا جاۋاپ بەرىپ, قولتاڭبا قويىلعان كىتاپتارىن تارتۋ ەتتى. كەلەسى كەزەكتە قالاداعى №4 كىتاپحانادا اقىن اقبەرەن ەلگەزەك پەن «قازاق ادەبيەتى» گازەتى باس رەداكتورىنىڭ ورىنباسارى, اقىن ىرىسبەك دابەي وقىرماندارمەن كەزدەستى. تاعى ءبىر رۋحاني اڭگىمە كرىلوۆ اتىنداعى كىتاپحانادا ءوتىپ, وعان اقىندار باقىت بەدەلحان مەن باعدات مۇباراك قاتىستى. ال جازۋشى ساۋلە دوسجان الماتى اۋدانىنىڭ كىتاپحانسىندا ءوز وقىرماندارىمەن كەزدەسسە, چەحوۆ اتىنداعى ورتالىق قالالىق كىتاپحانادا حالىقارالىق «الاش» ادەبي سىيلىعىنىڭ لاۋرەاتى, اقىن زايدا ەلعوندينوۆا ولەڭسۇيەر قاۋىمنىڭ قوشەمەتىنە بولەندى. ءدال وسىنداي تاعىلىمدى ءىس-شارانىڭ ءبىرى №29 كىتاپحانادا ءوتىپ, وعان كورنەكتى اقىن باۋىرجان جاقىپ پەن «ادەبيەت» باسپاسىنىڭ ديرەكتورى عالىم قاليبەك ۇلى قاتىستى. سونداي-اق قالاداعى №20 كىتاپحانادا اقىندار جاڭىلحان اسىلبەكوۆا مەن قالماحانبەت مۇقامەتقالي دا وقىرماندارمەن قاۋىشىپ, ادەبيەت تۋرالى اڭگىمە ادەمى جىر كەشىنە ۇلاستى. نۇرتاس تۇرعانبەكپەن, ارايلى جاقسىلىقپەن وتكەن وقىرماندار كەزدەسۋىنە جاستار كوپتەپ جينالدى. ولار قازىرگى جاس بۋىن ادەبيەتشىلەردىڭ شىعارماشىلىعىمەن تانىسىپ, ەركىن اڭگىمەگە ەرىك بەردى.
– الماتى قالاسى اكىمدىگىنىڭ قولداۋىمەن قازاقستان جازۋشىلار وداعى ۇيىمداستىرعان «ادەبي ناسيحات پۋلى» اتتى جوبا اياسىنداعى مۇنداي كەزدەسۋلەردىڭ شىعارماشىلىق يەسىنە بەرەر قۋاتى مول. №29 قالالىق كىتاپحانا ۇجىمىمەن جانە وقىرمان جاستارمەن كەزدەسۋ بارىسىندا مۇنى انىق سەزىندىك. اقىن بەيبىت سارىباي جۇرگىزگەن كەزدەسۋدە وقىرمانداردىڭ كوپتەگەن ساۋالىنا جاۋاپ بەرىپ, بۇگىنگى قازاق ادەبيەتىنىڭ وزەكتى ماسەلەلەرى تۋرالى ءسوز قوزعادىق, كۇركىرەپ ولەڭ وقىدىق. جىلى شىرايلى جۇزدەسۋدەن العان اسەر ۇشان-تەڭىز, – دەيدى اقىن باۋىرجان جاقىپ.
الماتى