سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى كەڭەيتىلگەن وتىرىستا بىرقاتار زاڭ جوباسىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سولاردىڭ ءبىرى «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ازاماتتىق اۋە كەمەلەرىن اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى اپاتقا ۇشىراعان ۇشاقتاردىڭ جولاۋشىلارى مەن ەكيپاجدارىن ىزدەۋ جانە قۇتقارۋداعى مەملەكەتتەر اراسىنداعى ىنتىماقتاستىقتى ودان ءارى كۇشەيتۋگە باعىتتالىپ وتىر.
«زاڭ جوباسىنىڭ ماقساتى – حالىقارالىق ازاماتتىق اۆياتسيا ۇيىمى ۇسىنعان ستاندارتتار مەن تاجىريبەسى بويىنشا اپاتقا ۇشىراعان اۋە كەمەلەرىنىڭ جولاۋشىلارى مەن ەكيپاجىن ىزدەۋ. سونىمەن قاتار مەملەكەتتەردىڭ ىزدەستىرۋ-قۇتقارۋ قىزمەتتەرى اراسىنداعى ىنتىماقتاستىقتى نىعايتۋ, سونداي-اق ەكى تاراپتىڭ ىزدەستىرۋ-قۇتقارۋ قىزمەتتەرىنىڭ بىرلەسكەن وقۋ-جاتتىعۋلارىن وتكىزۋ, تاجىريبە جانە اقپارات الماسۋ كوزدەلىپ وتىر», دەپ اتاپ ءوتتى سەناتور سۇيىندىك الداشەۆ.
سەناتورلار «قازاقستان رەسپۋبليكاسىنىڭ ۇكىمەتى مەن شۆەيتساريا كونفەدەراتسياسىنىڭ فەدەرالدىق كەڭەسى اراسىنداعى باعالى مەتالداردان جاسالعان بۇيىمدارداعى سىنامالىق تاڭبانى ءوزارا تانۋ جونىندەگى كەلىسىمدى راتيفيكاتسيالاۋ تۋرالى» زاڭ جوباسىن دا قارادى. زاڭ جوباسىنىڭ ەرەجەلەرى ەلدەر اراسىنداعى ىنتىماقتاستىقتى جەڭىلدەتۋ ءۇشىن باعالى مەتالداردان جاسالعان بۇيىمدارداعى سىناما تاڭباسىن ءوزارا تانۋدى كوزدەيدى.
دەپۋتاتتار سونىمەن قاتار اگلومەراتسيالاردى قالىپتاستىرۋ جانە دامىتۋ ءۇشىن قۇقىقتىق جاعدايلار جاساۋعا باعىتتالعان «اگلومەراتسيالاردى دامىتۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگلومەراتسيالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن دا تالقىلادى. زاڭ جوبالارىنىڭ ەرەكشەلىگى اگلومەراتسياعا كىرەتىن ەلدى مەكەندەردىڭ الەۋمەتتىك-ەكونوميكالىق دامۋىنىڭ قازىرگى جاي-كۇيىن, قالالىق جانە كەڭىستىكتى جوسپارلاۋ, كوممۋنالدىق, كولىكتىك جانە الەۋمەتتىك ينفراقۇرىلىمدى دامىتۋ پروبلەمالارىن باعالاۋ قامتىلاتىن كەشەندى دامۋ جوسپارىن ازىرلەۋ بولىپ تابىلادى. زاڭ جوبالارىنىڭ ەرەجەلەرى وڭىرلىك جانە رەسپۋبليكالىق دەڭگەيدەگى اگلومەراتسيالار بويىنشا كەڭەستەر قۇرۋدى دا كوزدەيدى.
كوميتەتتىڭ كەڭەيتىلگەن وتىرىسىنىڭ قورىتىندىسى بويىنشا وسى زاڭ جوبالارىن پالاتانىڭ قاراۋىنا جىبەرۋ تۋرالى شەشىم قابىلداندى.