باس پروكۋراتۋرانىڭ ءبىرىنشى قىزمەتى باسشىسىنىڭ ورىنباسارى ەلدوس قيلىمجانوۆ قازاقستاندا قاڭتارداعى جاپپاي تارتىپسىزدىككە قاتىسۋشىلاردىڭ قانشاسى راقىمشىلىققا ىلىنگەنىن ايتتى, دەپ حابارلايدى Egemen.kz.
ونىڭ ايتۋىنشا, قازىرگى ۋاقىتتا 1071 ادام راقىمشىلىققا ىلىنگەن.
«اتاپ ايتقاندا, تەرگەۋ ورگاندارى سوتقا دەيىنگى ساتىدا اۋىرلىعى ورتاشا قىلمىستاردى جاساعان سەگىز كۇدىكتىنىڭ ۇستىنەن قىلمىستىق قۋدالاۋدى توقتاتتى. سوت توعىز ادامعا قاتىستى ءىستى توقتاتتى, ال 77 ادامعا قاتىستى جازا مەرزىمى قىسقاردى», دەدى ەلدوس قيلىمجانوۆ.
سونداي-اق ول سوتتار 902 سوتتالۋشىنىڭ جازا مەرزىمىن قىسقارتقانىن, ونىڭ ىشىندە 827-ءسى شارتتى تۇردە, 75-ءى جازادان بوساتىلعانىن ايتتى.
وتكەن ايدا راقىمشىلىق اكتىسىن قولدانۋ ارقىلى باس بوستاندىعىنان ايىرۋ ورىندارىنان 60 ادام, پروباتسيالىق باقىلاۋدان 68 ادام بوساتىلدى.