ءۇندىستاننىڭ «Marwah Studios Complex» تانىمال ويىن-ساۋىق يندۋسترياسى ورتالىعىندا (نويدا قالاسى, ۋتتار-پرادەش شتاتى) رەجيسسەرى نۇرگەلدى سادىعۇلوۆتىڭ «بالۋان شولاق» كوركەم ءفيلمىنىڭ كينو كورسەتىلىمى ءوتتى, دەپ حابارلايدى Egemen.kz سىرتقى ىستەر مينيسترلىگىنە سىلتەمە جاساپ.
كورسەتىلىم قازاقستان مەن ءۇندىستان اراسىنداعى ديپلوماتيالىق قاتىناستاردىڭ 30 جىلدىعىن مەرەكەلەۋگە ارنالعان سالتاناتتى ءىس-شارالار اياسىندا ۇيىمداستىرىلعان.
ءىس-شارا قازاقستاننىڭ ۇندىستانداعى ەلشىلىگى مەن «Marwah Studios Complex» كومپانياسىمەن بىرلەسىپ, شاكەن ايمانوۆ اتىنداعى «قازاقفيلم» اق قولداۋىمەن وتكەن.
قازاقستان-ءۇندىستان كينو جانە مادەنيەت فورۋمى 300-دەن استام كورەرمەندى جينادى. ولاردىڭ قاتارىنا ديپلوماتيالىق كورپۋس وكىلدەرى, ءۇندىستان كينەماتوگرافياسىنىڭ ونەر قايراتكەرلەرى, جاس جانە جاڭادان باستاعان كينەماتوگرافيستەر بولدى.
فورۋم قوناقتارىنا اباي قۇنانباي ۇلىنىڭ حيندي تىلىنە اۋدارىلعان «قارا سوزدەر» تۋىندىسى تاراتىلدى.
سونىمەن قاتار حايداراباد قالاسىندا (تەلانگانا شتاتى) بەلگىلى قازاقستاندىق رەجيسسەر اقان ساتاەۆتىڭ قازاق حالقىنىڭ جوڭعارلارعا قارسى ازاتتىق سوعىسى تۋرالى باياندايتىن «جاۋجۇرەك مىڭ بالا» كارتيناسى كورسەتىلدى.