الماتى قالاسىندا 2-4 جەلتوقسان ارالىعىندا ء«سوز – جاستارعا. جاستار تۋرالى ءسوز» تاقىرىبىمەن جازۋشىلار مەن پۋبليتسيستەردىڭ ءۇشىنشى حالىقارالىق فورۋمى وتەدى. جاس ادەبيەتشىلەر مەن پۋبليتسيستەردىڭ كاسىبي دەڭگەيىن كوتەرۋگە ارنالعان حالىقارالىق ادەبي باسقوسۋدىڭ ۇيىمداستىرۋشىسى قازاق پەن-كلۋبى قوعامدىق بىرلەستىگى الماتىعا الەمنىڭ ءارتۇرلى ەلدەرىنەن ادەبيەت پەن پۋبليتسيستيكانىڭ ءار جانرى بويىنشا سەمينار جۇرگىزۋگە بەلگىلى جازۋشىلار مەن پۋبليتسيستەردىڭ شاقىرىلىپ وتىرعانىن حابارلادى. فورۋمعا 12 ەلدىڭ بەلگىلى قالامگەرلەرى جانە قازاقستاننىڭ 40-43 جاس جازۋشىسى مەن ءپۋبليتسيسى قاتىسادى.
قازاق ادەبيەتىن شەتەلگە ناسيحاتتاۋ, الەم ادەبيەتىنىڭ كۇردەلى پروبلەمالارى بويىنشا پىكىر الماسۋ جانە قازاق جازۋشىلارى مەن پۋبليتسيستەرىنىڭ شەتەل ارىپتەستەرىمەن شىعارماشىلىق بايلانىسىن نىعايتۋ, جاس جازۋشىلار مەن پۋبليتسيستەردىڭ شىعارماشىلىق پروبلەمالارىن تالقىلاۋ, شەتەل جازۋشىلارىنىڭ قازاق ادەبيەتىنە دەگەن ىقىلاسىن ارتتىرۋ – فورۋم كوتەرەر باستى تاقىرىپقا اينالماق.
العاشقى كىتابىن شىعارۋ وڭاي بولماعان وتكەن كەزەڭمەن سالىستىرعاندا, شىعارماشىلىق ەركىندىككە قول جەتكىزگەن بۇگىنگى ادەبيەتتە سىرت قاراعاندا كوپ قيىندىق جوق سەكىلدى قابىلدانادى. بىراق ءار كەزەڭ جاس قالامگەرگە ءوز قيىندىعىن تاڭادى. سوندىقتان ۇيىمداستىرۋشىلار حالىقارالىق اۋقىمدى فورۋمنىڭ الاڭى ادەبيەتتەگى بۇگىنگى جاس قالامگەرلەردىڭ تۇتاس شىنايى بەينەسىن ولاردىڭ شىعارمالارى ارقىلى تانۋدىڭ تاپتىرماس مۇمكىندىگى دەپ وتىر. قازاق پەن-كلۋبى فورۋم جۇمىسىنا قاتىسۋعا تالانتتى جاستار ساناتىنان (جاسى 40-تان اسپاعان) 40-43 قازاق جازۋشىسىن ىرىكتەپ الدى, ولار ءوز جۇمىستارىن ۇيىمداستىرۋ كوميتەتىنە الدىن الا تاپسىرعان. تاپسىرىلعان جۇمىستاردىڭ ءبىرازى اۋدارىلىپ, سەمينار جەتەكشىلەرىنە جىبەرىلدى. سەمينار جەتەكشىلەرىنىڭ ساناتىندا قازاقستاننىڭ التى بەلگىلى جازۋشىسى بار.
ءۇشىنشى حالىقارالىق فورۋمنىڭ جۇمىسى «جاس اۆتورلارعا قولداۋ كورسەتۋ: ىزدەۋ, كاسىبي دامىتۋ. ىلگەرى دامىتۋ» اتتى ماسەلەنى قاۋزايتىن پلەنارلىق وتىرىسپەن باستالىپ, مۇندا جاس جازۋشىلاردىڭ بايانداماسى تىڭدالادى. ال «ادەبي ءبىلىم: پروبلەمالار, شەشىم, ۇسىنىستار» اتتى دوڭگەلەك ۇستەلدە بۇگىنگى پوەزيا, پروزا, پۋبليتسيستيكاداعى ورتاق ماسەلەلەر بەزبەندەلەدى. سونداي-اق سەمينار جەتەكشىلەرى مەن مەيماندار ديسپۋت جۇرگىزۋشىلەرى رەتىندە شاعىن شوعىرعا ءبولىنىپ, جاستار شىعارماشىلىعىن بىرلەسە تالقىلايدى. بۇل كۇنى ب.كەنجەەۆ, ۆ.كارتسەۆ, ە.ابدۋللاەۆ, ە.گەر, م.شەۆچەنكو جانە باسقالار شەبەرلىك ساباقتارىن وتكىزەدى.
جازۋشىلار مەن پۋبليتسيستەردىڭ ءۇشىنشى حالىقارالىق فورۋمىن ۇيىمداستىرۋ كوميتەتىنىڭ جەتەكشىسى, قازاق پەن-كلۋبى پرەزيدەنتى بيگەلدى عابدۋللين: «وسىمەن ءۇشىنشى رەت قازاق پەن-كلۋبى وسىنداي اۋقىمدى فورۋم وتكىزگەلى وتىر. بۇعان دەيىنگى فورۋمداردا قازىرگى ادەبيەتتىڭ ەڭ كۇردەلى ماسەلەلەرى جونىندە اڭگىمە قوزعالدى.
«جاستار تۋرالى ءسوز. جاستارعا – ءسوز» باسقوسۋىنىڭ مودەراتورلارى بولىپ بيگەلدى عابدۋللين, باقىت كەنجەەۆ جانە جۇسىپبەك قورعاسبەك بەكىتىلىپ وتىر. فورۋمنىڭ سوڭعى وتىرىسىنان كەيىن ءارتۇرلى اتالىمدار بويىنشا ۇزدىك جۇمىستاردىڭ قورىتىندىسى حابارلانادى. جاس جازۋشىلار مەن پۋبليتسيستەردىڭ شىعارماشىلىعىنا ارنالعان كەلەلى كەڭەستىڭ مازمۇندى ءارى پايدالى بولاتىنىنا قازىردەن سەنىم مول. اسا ماڭىزدى ادەبي جيىننىڭ باستى نازارىن جاستار شىعارماشىلىعىنا اۋدارىپ وتىرۋداعى ماقسات تا سول – ءوز ەلىنىڭ ناسيحاتشىسى بولىپ وتىرعان قالامگەردى ۋاقىتقا لايىق دايارلاۋ.
الماتى