بۇگىن سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ كەزەكتى وتىرىسى ءوتتى. دەپۋتاتتار 2022 جىلعى 24 قاراشاعا جوسپارلانعان سەنات وتىرىسىنىڭ كۇن ءتارتىبىن بەكىتتى, دەپ حابارلايدى Egemen.kz.
الداعى پالاتا وتىرىسىندا سەناتورلار «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىن (سالىق كودەكسى) قولدانىسقا ەنگىزۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايدى.
ۇسىنىلعان تۇزەتۋلەردىڭ قاتارىندا ەڭبەكاقى تولەۋ قورىنا جۇكتەمەنى ازايتۋ جانە بىرىڭعاي تولەمدى ەنگىزۋ ماسەلەلەرى بار. دالىرەك ايتقاندا, قازىرگى ۋاقىتتا ميكرو جانە شاعىن بيزنەس سۋبەكتىلەرى ەڭبەكاقى تولەۋ قورىنان 34,5 پايىز تولەيدى. ال 2023 جىلدان باستاپ بىرتىندەپ 2028 جىلى 26,3 پايىزعا دەيىن وسە وتىرىپ, 20 پايىزدىق بىرىڭعاي تولەمدى ەرىكتى نەگىزدە تولەۋ ۇسىنىلادى.
ايتا كەتسەك, سەنات وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك جانە جەر قويناۋىن پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا قارالادى. اتالعان قۇجات جولدارداعى كولىكتىك باقىلاۋدى اۆتوماتتاندىرۋ بولىگىندە وزگەرىستەردى, تەڭىز كولىگى سالاسىنداعى حالىقارالىق شارتتاردىڭ نورمالارىن يمپلەمەنتاتسيالاۋدى, تەمىر جول كولىگىندەگى وقيعالاردى, كەمەلەرگە قاتىستى اپاتتىق جاعدايلاردى جانە ازاماتتىق اۆياتسيانى تەرگەۋ ءتارتىبىن جەتىلدىرۋدى كوزدەيدى.