قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلى الىبەك باقاەۆ ەقىۇ باس حاتشىسى حەلگا شميدكە سەنىم گراموتالارىن تابىستادى, دەپ حابارلايدى Egemen.kz.
ەقىۇ تۇراقتى كەڭەسىنىڭ جاڭا مۇشەسىن قارسى الىپ, باس حاتشى قازاقستاندىق ديپلوماتتى ماڭىزدى لاۋازىمعا تاعايىندالۋىمەن قۇتتىقتادى جانە ەلەمىزدىڭ ۇيىم مەن بارلىق ءۇش ولشەمدە ءوزارا ىنتىماقتاستىقتىڭ جوعارى دارەجەسىن اتاپ ءوتتى. ح.ءشميدتىڭ ايتۋىنشا, بۇگىنگى تاڭدا قازاقستان ەقىۇ-نىڭ ەڭ بەلسەندى قاتىسۋشى مەملەكەتتەردىڭ ءبىرى بولىپ تابىلادى جانە ونىڭ قىزمەتىندە ماڭىزدى ءرول اتقارادى.
ءوز كەزەگىندە, ءا.باقاەۆ حاتشىلىقتىڭ كۇردەلى كەزەڭدەگى ۇيىمنىڭ جۇمىسىن ۇيلەستىرۋ جونىندەگى كۇش-جىگەرىن اتاپ ءوتىپ, ەقىۇ-نىڭ بۇكىل وڭىرىندە نازار ساقتاعانى ءۇشىن العىسىن ءبىلدىردى. تۇراقتى وكىل ەكونوميكالىق-ەكولوگيالىق ولشەم الەۋەتىن ودان ءارى دامىتۋ قاجەتتىگىنە نازار اۋدارىپ, قازاقستان اۋماعىندا, اتاپ ايتقاندا ەنەرگەتيكا جانە سۋ رەسۋرستارىنىڭ قاۋىپسىزدىگى سالالارىندا ىسكە اسىرىلىپ جاتقان بىرقاتار جوبالاردى ەرەكشە اتاپ ءوتتى.
قازاقستاندا جۇرگىزىلىپ جاتقان ساياسي جانە الەۋمەتتىك-ەكونوميكالىق وزگەرىستەردى تالقىلاۋ بارىسىندا باس حاتشى قازاقستاندىق تاراپقا دەموكراتيالىق ينستيتۋتتار جانە ادام قۇقىقتارى جونىندەگى بيۋرو ساراپشىلارىن وسى پروتسەستەرگە بەلسەندى جۇمىلدىرعانى ءۇشىن العىس ءبىلدىردى.
كەزدەسۋ سوڭىندا تاراپتار قازاقستاننىڭ ەقىۇ-مەن ءارتۇرلى دەڭگەيدەگى ديالوگتى قولداۋ جانە ءوزارا ءتيىمدى ىنتىماقتاستىقتى نىعايتۋ بويىنشا كەلەشەك قادامداردى بەلگىلەدى.