قورعانىس ءمينيسترىنىڭ تاپسىرماسى بويىنشا قارۋلى كۇشتەردىڭ باسشىلىق قۇرامى اسكەري بولىمدەرگە جۇمىس ساپارلارىن جالعاستىرۋدا. ونىڭ ىشىندە شالعايداعى گارنيزوندارعا دا ەرەكشە نازار اۋدارىلىپ وتىر, دەپ حابارلايدى Egemen.kz.
قورعانىس ۆەدومستۆوسىنىڭ ءبىر توپ وفيتسەرلەرى قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆتىڭ باسشىلىعىمەن الماتى, جامبىل جانە جەتىسۋ وبلىستارىندا ورنالاسقان قۇرامالار مەن اسكەري بولىمدەردە بولدى.
گۆاردەيسك, جەتىگەن, قوناەۆ, لۋگوۆوي, تاراز جانە سارىوزەك گارنيزوندارىندا قورعانىس ءمينيسترىنىڭ ورىنباسارى اسكەري قىزمەتشىلەرمەن, ازاماتتىق پەرسونالمەن جانە ولاردىڭ وتباسى مۇشەلەرىمەن كەزدەستى. ول پرەزيدەنتتىڭ «ادىلەتتى مەملەكەت, ءبىرتۇتاس ۇلت. بەرەكەلى قوعام» جولداۋىنىڭ نەگىزگى باعىتتارى اياسىندا ەلدىڭ ودان ءارى دامۋ كوكجيەگى تۋرالى ايتتى.
جۇمىس توبىنىڭ وكىلدەرى اسكەري قىزمەتشىلەردى زەينەتاقىمەن, تۇرعىن ۇيمەن جانە مەديتسينالىق قامتاماسىز ەتۋدى رەتتەيتىن زاڭنامانىڭ ەرەكشەلىكتەرىن, قارۋلى كۇشتەردىڭ جەكە قۇرامىن الەۋمەتتىك قامتاماسىز ەتۋدى جەتىلدىرۋ جونىندەگى قورعانىس ۆەدومستۆوسىنىڭ قابىلداعان شارالارىن ءتۇسىندىردى.
– وتان قورعاۋشىلار وزدەرىن قىزمەتكە تولىعىمەن ارناۋى ءۇشىن مەملەكەت بارلىق قاجەتتى جاعدايدى جاساپ جاتىر. ەل قاۋىپسىزدىگىن قامتاماسىز ەتە وتىرىپ, ءبىز ميلليونداعان ازاماتتارىمىزعا بەيبىت اسپان استىندا ءومىر سۇرۋگە, ەڭبەك ەتۋگە جانە بالالاردى تاربيەلەۋگە, ادىلەتتى قازاقستان قۇرۋعا مۇمكىندىك بەرەمىز, - دەدى كەزدەسۋ بارىسىندا گەنەرال-لەيتەنانت سۇلتان كامالەتدينوۆ.
قورعانىس مينيسترلىگىنىڭ وكىلدەرى گارنيزون تۇرعىندارىنىڭ كوكەيىندە جۇرگەن سۇراقتارعا جاۋاپ بەردى. سونداي-اق جابىق جانە وقشاۋلانعان اسكەري قالاشىقتاردا تۇراتىن اسكەري قىزمەتشىلەر جانە بۇرىن قىزمەتتە بولعاندارعا قاتىستى وزگە دە ماسەلەلەر ءتۇسىندىرىلدى.