حالىقارالىق الاش سىيلىعىنىڭ لاۋرەاتى, اقىن اقۇشتاپ باقتىگەرەەۆامەن اڭگىمە
قازاقستان پرەزيدەنتى نۇرسۇلتان نازارباەۆتىڭ بۇدان تۇپ-تۋرا جيىرما جىل بۇرىن ماسكەۋ مەملەكەتتىك ۋنيۆەرسيتەتىندە ايتقان ەۋرازيالىق وداق يدەياسىنا تۇڭعىش قولداۋ كورسەتكەندەر نەگىزىنەن رەسەي مەن قازاقستانداعى قالىڭ جۇرتشىلىق پەن عىلىمي قوعامداستىق جانە شىعارماشىلىق وكىلدەرى بولدى. ەگەر بۇگىنگى كۇنى بۇل يدەيا ناقتىلى ءىس-قيمىلداردىڭ ەگجەي-تەگجەيلى باعدارلاماسىنا اينالدى دەپ ەسەپتەسەك وعان زيالى قاۋىمنىڭ دا قوسقان قوماقتى ۇلەسىن ايتپاي كەتۋ بەرى سالعاندا قيانات. حالقىمىزدىڭ ۇعىمى مەن تۇسىنىگىندە يگىلىك دەگەن ءماندى دە ماعىنالى ءسوز بار. بۇعان قاتىستى ايتىلاتىن ناقىلدار مەن قاعيداتتار دا جەتەرلىك. سونىڭ ءبىرى – يگىلىكتىڭ ەرتە-كەشى جوق دەلىنەدى. ەندەشە, ەۋرازيالىق ەكونوميكالىق وداق قۇرۋ ماسەلەسىنە دە وسىنداي حالىقتىق فيلوسوفيا تۇرعىسىنان كەلسەك شىندىقتان الشاق كەتپەيمىز. بۇل شىن مانىندە ۇلتتىق ەكونوميكالار ءۇشىن عانا ەمەس, وسى وداققا كىرگەلى وتىرعان ەلدەردىڭ قاراپايىم تۇرعىندارىنا دا يگىلىك اكەلۋى ءتيىس. بۇگىنگى قازاق پوەزياسىنىڭ كورنەكتى وكىلى اقۇشتاپ باقتىگەرەەۆامەن اڭگىمە وسىنداي باعىتتا ءوربىدى.
– اقۇشتاپ اپا, تاياۋدا قول قويىلعالى وتىرعان ەۋرازيالىق ەكونوميكالىق وداق جونىندەگى وي-پىكىردى وزىڭىزدەي قازاقتىڭ تاماشا اقىن قىزىنىڭ اۋزىنان ەستۋ گازەت وقىرماندارى ءۇشىن قىزىقتى دا تارتىمدى ءارى قاجەتتى بولار دەپ ويلايمىز.
– راحمەت, قاراعىم. بۇگىنگى كەزدە ىرگەڭدى قىمتاپ, تاس بۇركەنىپ الىپ ءومىر ءسۇرۋ ەش مۇمكىن بولماي قالدى عوي. ءومىردىڭ ءمانى دە, ءسانى دە كورشىلەرمەن ارالاس-قۇرالاستىق ەكەنىنە كوزىمىز ايقىن جەتىپ كەلەدى. بۇل و باستان تاتۋ-ءتاتتى تىرشىلىكتى مۇرات تۇتقان, وسى ارقىلى ءوزىنىڭ ىرىسى مەن نەسىبەسىن ەشكىمنەن كەم قىلماعان حالقىمىزدىڭ قانىندا بۇرىننان بار قاسيەتتەر. بۇگىنگى ينتەگراتسيا ۇعىمى بۇرىنعى حالىقتىق ديپلوماتيا جونىندەگى تۇسىنىكتەر مەن داستۇرلەردەن قاشىققا كەتە قويمايدى. ەكونوميكالىق ينتەگراتسيا وسى حالىقتىق تۇسىنىكتەر مەن قاعيدالاردىڭ بۇگىنگى زامان تالابىنا ساي تەرەڭدەتىلگەن, مازمۇنى مەن ماعىناسى تۇبەگەيلى جاڭعىرتىلعان ۇلگىسى مەن ءتۇرى دەۋگە دە بولادى.
بۇگىنگى ينتەگراتسيانىڭ مۇمكىندىكتەرى وراسان مول. بۇل بەلگىلى ءبىر شەكتەۋلەر مەن بىرقالىپتى ستاندارتتاردىڭ شەڭبەرىنە سىيا المايدى. ءيا, مۇنىڭ ءوزى بىزگە بۇرىن-سوڭدى بەرىلمەگەن تىڭ ءارى جاڭا مۇمكىندىكتەر. مىنە, قازىر وسىنى تولىق ىسكە اسىرۋ كەزەڭى دە ەسىك قاعىپ تۇر. ەلباسىمىز اتاپ كورسەتكەندەي, بۇل ءبىزدىڭ مەملەكەتتەرىمىزدىڭ قازىرگى جانە بولاشاق بۋىن ازاماتتارىنىڭ الدىنداعى ورتاق پارىزى. ەگەر بۇگىن ءبىزدىڭ قوعام وزىنە جۇكتەلگەن وسى پارىزدى ۋاقىتىندا ورىنداماسا, ەرتەڭگى ۇرپاق بۇعان كەشىرىممەن قاراي الاتىنىنا ەشكىم كەپىلدىك بەرە المايدى.
– ءسىزدىڭ ويىڭىزشا ەۋرازيالىق مەملەكەتتەر ينتەگراتسياسى قاراپايىم ادامداردىڭ الەۋمەتتىك-تۇرمىستىق دەڭگەيىن ودان ءارى جاقسارتۋ ءۇشىن نەندەي جاقسىلىقتارى مەن يگىلىكتەرىن اكەلمەك؟
– ارينە, ەۋرازيالىق ەكونوميكالىق وداق قۇرۋداعى باستى ماقسات ەلدەر ەكونوميكاسىنىڭ سەرپىندى دامۋىن قامتاماسىز ەتۋ ەكەندىگى بەلگىلى. مىنە, وسى تۇپقازىقتان حالىقتىڭ ءال-اۋقاتىن كوتەرۋ ءجونىندەگى ءماندى دە ماڭىزدى ماسەلەنى ەش بولەك, وقشاۋ قاراي المايمىز. بۇل ەكەۋى ۇدايى ءبىرىن-ءبىرى تولىقتىرىپ, ءبىرىن-ءبىرى بايىتىپ تۇرعان قوعامدىق قۇندىلىقتار. قانە, وسى ماسەلەنىڭ ارعى الەۋمەتتىك استارىنا كوز جۇگىرتىپ كورەيىكشى. نەنى بايقار ەدىك؟ كسرو تاراعاننان كەيىنگى كەزەڭدە تمد قۇرامىنا كىرگەن كەيبىر ورتالىق ازيا ەلدەرى وزدەرىنىڭ ستراتەگيالىق دامۋ جولدارىن ايقىن بەلگىلەي الماعاندىقتان ونداعى تۇرعىندار بولماشى تيىن-تەبەن ءۇشىن بۇرىنعى كەڭەستىك كەڭىستىكتىڭ ءار قيىرىنا جۇمىس, ناپاقا ىزدەپ تارىداي شاشىراپ كەتكەنى بەلگىلى.
ءاربىر وتباسى ءۇشىن ءومىردىڭ قىزىعى دا, باقىتى دا جاتجۇرتتا ەمەس, ءوز ەلىڭدە, ءوز توپىراعىڭدا ەڭبەك ەتىپ, ءومىردىڭ قىزىعىنا كەنەلۋ ەمەس پە. وسىنداي ءمۇمكىندىكتەن ايىرىلىپ قالۋ دا باقىتسىزدىقتىڭ ءبىر ءتۇرى ەكەنىمەن كەلىسەتىن شىعارسىز. شۇكىر, قازاقستاندا تاۋەلسىزدىكتىڭ العاشقى جىلدارىنداعى سىندارلى كەزەڭنىڭ وزىندە مۇنداي كورىنىستەر كەزدەسكەن جوق. ءارى مۇنىڭ ءوزىن كەزدەيسوقتىق ەمەس, زاڭدى قوعامدىق قۇبىلىس دەپ قاراستىرعانىمىز ءجون. ويتكەنى, تاۋەلسىزدىك تاڭى اتقاننان كەيىن ءبىز ەندى قايتىپ كۇن كورەمىز, الداعى باعىت-باعدارىمىز قانداي دەگەن ساۋالعا كەزىككەن جوقپىز. ەلباسى نۇرسۇلتان نازارباەۆتىڭ ءسوزىمەن ايتقاندا, تاۋەلسىزدىكتىڭ العاشقى كۇندەرىنەن باستاپ ەلىمىز بۇرالاڭسىز جانە تۇسىنىكسىز قيمىلدارسىز, الەۋمەتتىك سىلكىنىستەرسىز جانە ىشكى جانجالدارسىز دامىپ كەلەدى. ءبىز قاشاندا لايىقتى ارىپتەس بولىپ قالۋدامىز. فليۋگەر سەكىلدى ءوزىمىزدىڭ سىرتقى ساياسي باسىمدىقتارىن اۋىستىرمايمىز.
قاراپايىم ادامداردىڭ تۇرمىس دەڭگەيىن كوتەرۋدىڭ باستى كەپىلى شاعىن جانە ورتا بيزنەس قۇرۋ. سونداي-اق, بۇل جالپى ەۋرازيالىق ەكونوميكانىڭ دا نەگىزى. ەۋرازيالىق وداق قۇرۋ جولىندا نەبىر كۇردەلى سىن-قاتەرلەر دە كەزدەسەتىنىن مەملەكەت باسشىسى ماسكەۋ مەملەكەتتىك ۋنيۆەرسيتەتىندە وقىعان لەكتسياسىندا اشىق ايتتى. وعان توتەپ بەرە ءبىلۋدىڭ دە باستى جولى شاعىن جانە ورتا بيزنەس بولا الادى. تالاس جوق, تابيعاتىندا ءبىزدىڭ قازاق حالقى تالانتتى دا دارىندى حالىق. دەگەنمەن كەي كەزدەردە ۇستاپ قالاتىن جالقاۋلىعى مەن ەرىنشەكتىگى دە بار. بۇگىندە نيەت قويعان ادامعا جۇمىس تا, قىزمەت تە تابىلادى. كاسىپكەرلىكتى قولداۋ جونىندە مەملەكەت تاراپىنان بەلگىلەنگەن قولداۋلار مەن جەڭىلدىكتەر دە جەتەرلىك. تەك كەز كەلگەن ىسكە يكەمدىلىك پەن ەلگەزەكتىك تانىتا بىلسەڭ بولعانى. وسىنداي ومىرشەڭ كوزقاراس ورنىققان جاعدايدا ءاربىر وتانداسىمىز ەۋرازيالىق ەكونوميكالىق وداقتىڭ عۇمىرى ۇزاق بولۋىنا ءوز ۇلەسىن قوسا الادى.
– جاڭا تاۋەلسىزدىكتىڭ قادىر-قاسيەتى جونىندە جاقسى مىسالدار كەلتىردىڭىز. كەيدە ەل ءىشىندە اتالعان ينتەگراتسيالىق قۇرىلىم وسى تاۋەلسىزدىكتىڭ اسپانىنا الا بۇلت ۇيىرەدى ەكەن-مىس دەگەن الىپقاشپا اڭگىمەلەر دە ەستىلىپ قالىپ ءجۇر. بۇعان نە دەيسىز؟
– مەنىڭ ويىمشا, بۇل تۇبىرىمەن قاتە تۇسىنىك. جاڭادان قۇرىلاتىن ەۋرازيالىق ەكونوميكالىق وداق تاۋەلسىزدىگىمىزدىڭ باياندى بولۋىنا ەشقانداي نۇقسان كەلتىرمەيدى دەر ەدىم. كەرىسىنشە, مۇندا ءبىرىنشى كەزەكتە ءار ەلدىڭ ۇلتتىق-مەملەكەتتىك مۇددەسى تۇرعانىن ايتقىم كەلەدى. بۇل تايعا تاڭبا باسقانداي ايقىن ماسەلە. ينتەگراتسياعا قاتىسۋشى ەلدەردىڭ ەشقايسىسىنا ۇستەمدىك پەن وزبىرلىق جۇرمەيدى. بۇل باعىتتا ولاردىڭ ءبارىنىڭ قۇقىقتارى تەڭ بولۋعا ءتيىس. ەۋرازيالىق وداققا مۇشە ەلدەردىڭ ىشكى ءىسى مەن مەملەكەتتىك قۇرىلىم تارتىبىنە ەشكىم قول سۇعا المايدى دەپ سانايمىن. ءار حالىقتىڭ ءوز قۇقى مەن ەجەلدەن قالىپتاسقان سالت-داستۇرلەرى بار. وعان قۇرمەتپەن قاراۋ احۋالى قالىپتاساتىنىنا سەنىمىم مول.
بۇل رەتتە نۇرسۇلتان ءابىش ۇلىنىڭ ەۋرازيا حالقى باسەكەلەستەر ەمەس, وداقتاستار دەگەن ءتۇسىنىك-پايىمىندا دا ناقتى شىندىق بار ەكەنى انىق. ال وداقتاس بولۋ دەگەن ۇعىم قىزعانۋشىلىقتان, كۇندەستىكتەن جانە كورەالماۋشىلىقتان بيىك تۇرعان, كەرىسىنشە, ءبىر-بىرىنە ۇدايى نيەتتەس, تىلەكتەس بولۋ قام-قارەكەتىنەن ورىستەيتىن اسا قۇندى قوعامدىق يگىلىك. ارينە باسەكە دە كەرەك. الايدا, ونىڭ ارعى تۇكپىرىندە «ءوزىمنىڭ شىعار تاۋىم بيىك بولسىن» دەگەن تابيعي تىلەك تۇرادى. مۇنى دا تۇسىنۋگە بولادى. دەگەنمەن, ەلدەردىڭ ورتاق ەكونوميكالىق مۇددەلەرى جاعدايىندا مۇنداي وزىمشىلدىك وزىنەن ءوزى ىعىسىپ, تەڭ ارىپتەستىككە جول بەرەدى. ويتكەنى, ەەو-نىڭ وزەگىن ءوزارا سەنىم مەن تەڭ قۇقىقتىلىق, ىنتىماقتاستىق پەن وداقتاستىق قۇرايدى. بۇل قۇندىلىقتاردى تەك بۇگىنگى كۇنمەن شەكتەي سالۋعا بولمايدى. مۇنداي ساباقتاستىق ۇرپاقتان ۇرپاققا ءارى قاراي جالعاسا بەرۋىن قالار ەدىك. تەك سوندا عانا بۇل ينتەگراتسيالىق بىرلەستىكتىڭ اياسى مەن شەڭبەرى ودان ءارى كەڭەيىپ قۇلاشىن كەڭگە جايا تۇسەدى.
– تاۋەلسىزدىكتىڭ باستى ءبىر نىشانى – ۇلتتىق ۆاليۋتا. وسى ءتول تەڭگەمىزگە قاۋىپ ءتوندىرىپ قوياتىندار دا كەزدەسەدى. مۇنداي تەرىس پىكىردى تىقپالايتىندار ەۋرازيالىق ەكونوميكالىق وداق قۇرۋ جونىندەگى شارتقا قول قويىلعاننان كەيىن ورتاق قارجىلىق جانە ۆاليۋتالىق كەڭىستىك قۇرۋ قاجەتتىلىگى تۋىندايدى دا, تەڭگەمىز وزىنەن ءوزى قۇرىپ كەتەدى ەكەن دەگەن قاۋىپ ايتادى. ءسىز مۇنداي الىپقاشپا اڭگىمەلەردى ەستىگەن جوقسىز با؟
– ەستىمەپپىن. ەل ءىشى بولعان سوڭ ءارتۇرلى اڭگىمەلەر ايتىلا بەرەدى عوي. بۇل ساۋالعا قاتىستى ايتارىم, ەۋرازيالىق وداق ءجونىندەگى شارت تالاپتارىندا ورتاق ۆاليۋتانى اينالىسقا ەنگىزۋ ماسەلەلەرى قاراستىرىلماپتى. مەنىڭ قولىمداعى رەسمي دەرەك كوزدەرى وسىنداي ءتۇيىن جاساۋعا نەگىز قالايدى.
– اقۇشتاپ باقتىگەرەيقىزى, الەم ەلدەرى ەكونوميكاسىنىڭ دامۋ ساتىلارىنا كوز سالساق, ولار ينتەگراتسيالىق بىرلەستىكتەر ارقىلى العا قويعان ماقساتتارىنا جەتكەنىن كورەمىز. وسىنداي ينتەگراتسيالانعان قۇرىلىمداردىڭ باستاۋىندا ەۋرووداق تۇرعانى ءمالىم. قالاي ويلايسىز, ءوز ۋاقىتى كەلگەندە ەۋرازيالىق وداق ەۋرووداققا بالاما بولا الادى دەپ ەسەپتەيسىز بە؟
– بۇعان وسى باستان بال اشىپ بەرۋدىڭ قاجەتى بولا قويماس. ءبارى دە ۋاقىتتىڭ ەنشىسى مەن تورەلىگىندە ەمەس پە. بۇل رەتتە ەڭ الدىمەن وداقتىڭ گەوەكونوميكالىق جانە گەوساياسي سۇلباسى ايقىندالۋى كەرەك دەگەن ويدامىن. ءدال وسى ارادا جوعارىدا ايتىلعان باسەكەلەستىك دەگەن ۇعىمعا باسقا ءبىر قىرىنان وي جۇگىرتۋدىڭ رەتى كەلىپ تۇرعانداي. قازىرگى بۇكىل الەمگە ورتاق جاھاندانۋ جاعدايى ەۋرازيالىق وداققا مۇشە مەملەكەتتەرگە دە ءۇلكەن مىندەتتەر جۇكتەيدى. وسى تۇرعىدا ولار ەكونوميكالىق جانە وركەنيەتتى دامۋدىڭ ورتاق شەشىمى مەن كىلتىن تابا العان جاعدايدا عانا جاھاندىق باسەكەگە توتەپ بەرە الادى. سوندىقتان دا باسەكەلەستىككە قابىلەت ماسەلەلەرىن الدا قۇرىلاتىن وداق جاناشىرلارى وسى باستان كوتەرگەنى ەرتە بولمايدى.
الەمدىك ەكونوميكادا, جوعارىدا ايتىپ وتكەنىمدەي, ءتۇرلى داعدارىستار مەن كۇردەلى قۇبىلىستار بولماي تۇرمايدى. جاڭا قۇرىلاتىن وداققا وسىنداي سىني جاعدايلارمەن بەتپە-بەت كەلەتىن ساتتەر دە كەزدەسەرى كامىل. بۇل جونىندە ەلباسىمىز وسى باستان ەلەۋلى ەسكەرتۋ جاساۋى تەكتەن-تەك ەمەس. كەيدە تاجىريبەسىزدىكتىڭ ءوزى دە ءمۇلت كەتۋگە اكەلىپ سوقتىرادى. سوندىقتان, ءدال قازىرگى كۇنى ءبىزدى ەۋرووداققا بالاما تۇرعىسىنداعى ويدان گورى, ونىڭ بۇعان دەيىنگى ءىس-تاجىريبەسىنەن ۇيرەنۋ, ساباق الۋ قاجەتتىلىگى جونىندەگى ماسەلە كوبىرەك تولعاندىرعانى ءجون سەكىلدى.
نەگىزىنەن العاندا ەۋروپالىق جانە ەۋرازيالىق ەكونوميكالىق وداقتار ءبىر-بىرىمەن ۇندەس, ىڭعايلاس دەۋگە بولادى. بۇلاردى ءبىر-ءبىرىنەن اجىراتىپ, ءبولىپ قاراستىرۋعا, ءبىر-بىرىمەن سالىستىرۋعا بولمايدى دەگەن ويدامىن. ولار ءبىرىن-ءبىرى قاشىقتاتپاي, كەرىسىنشە, ءتۇسىنىسىپ, جاقىنداسىپ جاتسا تىپتەن عانيبەت. ال مۇنداي پەرسپەكتيۆانىڭ بولۋ مۇمكىندىگى جوعارى. بارىنە دە ۋاقىت تورەشى دەپ وتىرعانىم سوندىقتان.
– ەۋرازيالىق ينتەگراتسيانىڭ نەگىزىندە وعان مۇشە مەملەكەتتەردىڭ جيىنتىق ەكونوميكاسىنىڭ ءوسىمىن قامتاماسىز ەتۋ ماقساتى تۇرعانىمەن بۇل بىرلەستىك الەۋمەتتىك-گۋمانيتارلىق كەڭىستىك قۇرۋ جولىمەن جۇزەگە اساتىنى دا بەلگىلى بولىپ وتىر. ونىڭ وسى استارىنا وي جۇگىرتىپ كوردىڭىز بە؟
– ءيا, بولاشاق ەۋرازيالىق وداقتىڭ قىزمەتىن قۇر, جالاڭ ساۋدا-ەكونوميكالىق جانە كەدەندىك قىزمەت تۇرعىسىنان قاراستىرساق ۇستىرتتىككە ۇرىنارىمىز انىق. ايتالىق, قازاقستاننىڭ دا, رەسەيدىڭ دە, بەلورۋسسيانىڭ دا ءوز تاريحى, ادەبيەتى مەن مادەنيەتى بار. ينتەگراتسيالىق بىرلەستىك مىسالىندا وسىنداي تاريحي-رۋحاني جانە مادەني بايلانىستاردى ورنىقتىرۋدىڭ بەرەرى وتە مول. بۇل ەۋرازيالىق وداققا مۇشە مەملەكەتتەر تۇرعىندارىن ودان ءارى جاقىنداستىرا الاتىن قۇدىرەتتى فەنومەن. مۇنىڭ ءوزى ەلباسىمىز اتاپ كورسەتكەندەي, ءبىزدىڭ حالىقتارىمىزعا كوپقىرلى مەملەكەتارالىق بايلانىستاردىڭ جاڭا ۇلگىسىن قۇرۋعا مۇمكىندىك بەرەدى. سونداي-اق, الەۋمەتتىك-گۋمانيتارلىق سيپاتتاعى قارىم-قاتىناستار بەلگىلى ءبىر ەلدىڭ مادەنيەتى مەن ادەبيەتىنە جانە تاريحىنا قۇرمەتپەن قاراۋ سەزىمىن قالىپتاستىرا الادى.
مۇنداي ءىس-قيمىلدىڭ كورىنىستەرى قازىردىڭ وزىندە جەتكىلىكتى. بۇعان اقجايىق وڭىرىنەن دە جارقىن مىسالدار كەلتىرۋگە بولادى. جوعارى گۋمانيتارلىق جانە تەحنيكالىق ءبىلىم بەرۋ سالاسىندا باتىس قازاقستان مەملەكەتتىك جانە قازاقستان اقپاراتتىق جانە تەلەكوممۋنيكاتسيالىق جۇيەلەر ۋنيۆەرسيتەتى مەن كورشىلەس رەسەي جوعارى وقۋ ورىندارى اراسىنداعى بايلانىستاردى جوعارى باعالاي الامىن.
سونىمەن بىرگە, ەۋرازيالىق ەكونوميكالىق وداققا مۇشە مەملەكەتتەر اراسىنداعى مادەني-گۋمانيتارلىق بايلانىستارعا جان-جاقتى ءارى عىلىمي تۇرعىدان تەرەڭ وي جۇگىرتۋ قاجەت دەگەن ويدامىن. ايتالىق, ەۋرازيالىق كەڭىستىكتەگى رۋحاني-مادەني قۇندىلىقتاردىڭ سان الۋاندىعى مەن ايرىقشا ءبىتىم-بولمىسى وعان اسا ساق, پاراساتتىلىق تۇرعىسىنان قاراۋدى قاجەتسىنەدى. ەگەر بۇلاي ىستەي الماساق اتالعان قۇندىلىقتاردى ءوز قولىمىزبەن جويىپ الۋىمىز ابدەن مۇمكىن. كەز كەلگەن ەلدەگى مادەنيەتتىڭ ءتۇپ-توركىنىندە ۇلتتىق ءتۇر مەن مازمۇن, ەلەۋلى ەلدىك ەرەكشەلىك تۇرادى. ال ونىڭ ەروزياسىنا جول بەرەر بولساق, مادەنيەتتەر بايلانىسى دەپ جۇرگەنىمىزدىڭ ءوزى اشەيىن قۇر بوس ءسوز بولىپ شىعادى. ەگەر ەۋرازيالىق ەكونوميكالىق وداققا مۇشە مەملەكەتتەردەگى مەكتەپتەر مەن جوعارى وقۋ ورىندارىندا ءبىر-ءبىرىنىڭ تاريحى مەن ءتىلىن, ادەبيەتى مەن مادەني مۇرالارىن وقىپ-ۇيرەنۋگە كوڭىل اۋدارىلسا – بۇل ينتەگراتسيالىق بىرلەستىكتىڭ مازمۇنىن ودان ءارى بايىتادى.
ەلباسى نۇرسۇلتان نازارباەۆ بۇعان دەيىن دە كوپ ەتنوستى قازاقستان مەملەكەتى جاعدايىندا تىلدەردى ۇيرەنۋدى كۇشتەۋ جانە ماجبۇرلەۋ جولىمەن ەمەس, كەرىسىنشە, ەرىكتىلىك جانە ىنتالاندىرۋ جولىمەن جۇرگىزۋ ساياساتىن ۇستانعاندىعى بەلگىلى. تىلدەردى ۇيرەنۋدىڭ ەڭ وركەنيەتتى, ءتالىمدى دە تاعىلىمدى, تاجىريبەدە ءوزىن اقتاي العان جولى دا وسى ەكەنى تالاسسىز. بۇل باعىتپەن بۇگىندە قازاقستاندىقتاردىڭ قالىڭ توبى اجەپتاۋىر جەتىستىكتەرگە جەتكەنى دە جاعىمدى جايت. ەلباسىنىڭ ماسكەۋ ۋنيۆەرسيتەتىندە سويلەگەن سوزىندە ءدال وسى ءۇردىستى ەۋرازيالىق وداققا مۇشە مەملەكەتتەرگە ۇسىنۋى دا ولاردىڭ تاراپىنان قولداۋ تابا الادى دەگەن سەنىمدەمىن. مىنە, وسىنىڭ ءبارى يگىلىك ەمەس پە؟
– اقۇشتاپ اپا, اشىلىپ ايتقان اڭگىمەڭىز ءۇشىن سىزگە كوپ راحمەت.
اڭگىمەلەسكەن
تەمىر قۇسايىن,
«ەگەمەن قازاقستان».
باتىس قازاقستان وبلىسى.