قازاقستاننىڭ بۇرىنعى قورعانىس ءمينيسترى مۇرات بەكتانوۆقا قاتىستى قىلمىستىق ءىس سوتقا جەتتى. بۇل تۋرالى وكق-دا باس پروكۋراتۋرانىڭ قىلمىستىق قۋدالاۋ قىزمەتى باستىعىنىڭ ورىنباسارى ەلدوس قيلىمجانوۆ مالىمدەدى, دەپ حابارلايدى Egemen.kz.
«قازىرگى ۋاقىتتا سوتتا بۇرىنعى قورعانىس ءمينيسترى بەكتانوۆتىڭ ءىسى قارالۋدا», دەدى ەلدوس قيلىمجانوۆ.
سونداي-اق ول الماتى قالاسى, الماتى جانە قىزىلوردا وبلىستارى ۇقك دەپارتامەنتتەرىنىڭ بۇرىنعى باسشىلارىنا جانە الماتى وبلىسى پوليتسيا دەپارتامەنتىنىڭ, الماتى اۋەجايىنىڭ جەلىلىك پوليتسيا ءبولىمىنىڭ بۇرىنعى باسشىلارىنا قاتىستى ىستەر بويىنشا سوتقا دەيىنگى تەرگەۋ ماتەريالدارىمەن تانىسۋ ءراسىمى ءجۇرىپ جاتقانىن ايتتى.
بۇدان باسقا, تالدىقورعان جانە الماتى قالالارىندا تەرگەۋدىڭ رۇقسات ەتىلمەگەن ادىستەرىن قولدانۋ فاكتىسى بويىنشا سوتقا سەگىز پوليتسيا قىزمەتكەرىنە قاتىستى ەكى قىلمىستىق ءىس جىبەرىلدى.
«بارلىعى قۇقىق قورعاۋ جانە ارنايى ورگانداردىڭ 29 قىزمەتكەرى كۇدىكتى دەپ تانىلدى, ونىڭ 8-ءى سوتتا, 20-سى ءىس ماتەريالدارىمەن تانىسۋ ساتىسىندا جانە بىرەۋى تەرگەۋدە», دەپ ءتۇسىندىردى ەلدوس قيلىمجانوۆ.
ەسكە سالا كەتسەك, 19 قاڭتاردا مەملەكەت باسشىسى قازاقستاننىڭ بۇرىنعى قورعانىس ءمينيسترىن كومانديرلىك قاسيەتتەرىنىڭ جوقتىعى ءۇشىن سىنعا الدى. سول كۇنى پرەزيدەنت جارلىعىمەن مۇرات بەكتانوۆ قورعانىس ءمينيسترى قىزمەتىنەن بوساتىلدى.
19 اقپاندا باس پروكۋراتۋرا بۇرىنعى قورعانىس ءمينيسترى مۇرات بەكتانوۆقا قاتىستى قىزمەتتەگى ارەكەتسىزدىك فاكتىسى بويىنشا سوتقا دەيىنگى تەرگەۋدى باستادى.
20 اقپاندا مۇرات بەكتانوۆ ۇستالىپ, ۋاقىتشا ۇستاۋ يزولياتورىنا قاماۋعا الىندى.