پرەزيدەنت قاسىم-جومارت توقاەۆ ماڭعىستاۋ وبىسىنداعى كوممۋنالدىق قىزمەتتىڭ ساپاسىنا كوڭىلى تولمايتىنىن ءبىلدىردى, دەپ حابارلايدى Egemen.kz.
«وبلىس تۇرعىندارىن مازالايتىن تاعى ءبىر ماسەلە – كوممۋنالدىق قىزمەتتىڭ ساپاسى. قازىر اقتاۋ قالاسىنىڭ ينجەنەرلىك جۇيەسىنىڭ 75 پايىزى ەسكىرگەن. ۇكىمەتكە وبلىس ورتالىعىنىڭ ينجەنەرلىك جۇيەسىن قايتا جابدىقتاۋعا قاجەتتى قاراجات ءبولۋدى تاپسىرامىن. اقتاۋ قالاسىنداعى قۇرىلىس ماسەلەسىنە ارنايى توقتالعىم كەلەدى», دەپ اتاپ ءوتتى پرەزيدەنت ماڭعىستاۋ وبلىسىنىڭ جۇرتشىلىعىمەن كەزدەسۋ بارىسىندا.
سونداي-اق مەملەكەت باسشىسى وبلىس ورتالىعىنداعى ەسكى ۇيلەردىڭ ماسەلەسى تەز ارادا شەشىمىن تابۋ قاجەت ەكەنىن ايتتى.
ء«بىز اقتاۋ قالاسىن ەلىمىزدىڭ باستى تۋريزم ورتالىعىنىڭ ءبىرى رەتىندە دامىتۋدى كوزدەپ وتىرمىز. تەڭىز جاعاسىنداعى قالا قازىرگى زامانعى وزىق تالاپتارعا ساي بولۋعا ءتيىس. وبلىس ورتالىعىنداعى ەسكى ۇيلەردىڭ ماسەلەسىن شەشۋ قاجەت. قالادا مۇنداي 280 ءۇي بار. ۇكىمەتكە اقتاۋ قالاسىنداعى تۇرعىن ۇيلەردى جاڭعىرتۋ جونىندە ارنايى باعدارلاما ازىرلەۋدى تاپسىرامىن», دەپ قوستى قاسىم-جومارت توقاەۆ.
پرەزيدەنت جاڭاوزەندى كەشەندى دامىتۋ ماقساتىندا 580 ميلليارد تەڭگەدەن استام قاراجات بولىنگەنىن اتاپ ءوتتى.
«جاڭاوزەندى كەشەندى دامىتۋ ماسەلەسىنە باسا نازار اۋدارۋ قاجەت. ونداعى كۇردەلى تۇيتكىلدەردى شەشۋگە 580 ميلليارد تەڭگەدەن استام قاراجات ءبولىندى. بۇل – ءبىر قالا ءۇشىن قوماقتى قارجى. ونى ماقساتىنا ساي ءتيىمدى جۇمساۋ قاجەت. جالپى, وبلىس اكىمدىگىنىڭ جاڭاوزەندى دامىتۋ ءۇشىن قابىلداپ جاتقان شارالارى تولىق ورىندالۋعا ءتيىس. الەۋمەتتىك ماڭىزى بار جوبالاردى سوزبالاڭعا سالماي دەر كەزىندە ىسكە اسىرۋ قاجەت», دەپ تۇيىندەدى قاسىم-جومارت كەمەل ۇلى.