وتباسى قۇندىلىعىن جاڭعىرتىپ, اكە مەن انا مارتەبەسىن ارتتىرۋ ماقساتىندا ۇيىمداستىرىلىپ كەلە جاتقان «مەرەيلى وتباسى» ۇلتتىق كونكۋرسىنا سىر بويىنان 2014 جىلدان بەرى 1 700 وتباسى ءوتىنىم بەرگەن. وسى جىلى سەگىزىنشى رەت وتكىزىلگەلى تۇرعان ءىس-شاراعا قاتىسۋعا وبلىستان 178 شاڭىراق نيەت ءبىلدىردى.
ولاردىڭ اراسىنان كونكۋرستىڭ وبلىستىق ىرىكتەۋ كەزەڭىنە قالا مەن اۋدانداردان 17 وتباسىنىڭ قۇجاتى تاپسىرىلدى. وسى جىلعى 15 شىلدە كۇنى وتكەن وبلىستىق ىرىكتەۋ كوميسسياسىنىڭ قورىتىندىسى بويىنشا كونكۋرستىڭ باس جۇلدەسى مەن ءۇش ورىن, جەتى نوميناتسيا بەلگىلەندى. وبلىستىق جارىستىڭ باس جۇلدەسىن نارتاي اۋىلىندا تۇراتىن بايجانوۆتار اۋلەتى جەڭىپ الدى.
جاز ايىندا وبلىستىق ىرىكتەۋ قورىتىندىسى بويىنشا دوستىق ۇيىندە ماراپاتتاۋ ءراسىمى ءوتىپ, وبلىس اكىمى نۇرلىبەك نالىباەۆ جەڭىمپاز جانە جۇلدەگەر وتباسىلاردى قۇتتىقتاعان ەدى.
− قازاق حالقى ءۇشىن وتباسى – قاسيەتتى ۇعىم, قاستەرلى قۇندىلىق. وتباسىنىڭ بىرلىگى – وتاننىڭ بەرىكتىگى, اعايىننىڭ تاتۋلىعى – اتامەكەننىڭ تۇتاستىعى, ۇلتتىق تاربيەنىڭ, ادامگەرشىلىك پەن يماندىلىقتىڭ باستاۋ بۇلاعى. مەملەكەت باسشىسى قاسىم-جومارت كەمەل ۇلى توقاەۆ ء«اربىر وتباسىن ساقتاۋ – وتانىمىزدىڭ بەرىك بولۋىنىڭ كەپىلى. ولاردىڭ ارقايسىسىنا تۇتاستىق پەن تاتۋلىقتىڭ ءداستۇرىن ورنىقتىرۋىمىز كەرەك», دەگەن بولاتىن. بۇگىندە ەلىمىزدە وتباسى ينستيتۋتىنا قامقورلىق پەن كومەك ۇزدىكسىز كورسەتىلىپ كەلەدى. انا مەن بالانى قورعاۋعا ارنالعان مەملەكەتتىك قولداۋلار جىل سايىن جەتىلدىرىلۋدە. 2014 جىلدان باستاۋ العان «مەرەيلى وتباسى» ۇلتتىق كونكۋرسى وتباسى قۇندىلىقتارى مەن قازاق ءۇشىن قاشاندا كيەلى سانالاتىن ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ناسيحاتتاۋدا ورنى ەرەكشە, تاعىلىمدى ءىس-شارا. بۇل بايقاۋعا قاتىسقان وتباسىلاردىڭ بارلىعى دا – ناعىز مەرەيلى جەڭىمپازدار, − دەيدى ءوڭىر باسشىسى.
باس جۇلدە العان بايجانوۆتار اۋلەتىنىڭ ۇلكەنى – 99 جاستاعى سارسەنبەك بايجانوۆ اقساقال. عۇمىرىنىڭ تابانداي قىرىق جىلىن ۇستازدىققا ارناعان سوعىس ارداگەرى ماراپاتتارىنىڭ قاتارىندا «II دارەجەلى ۇلى وتان سوعىسى», «قىزىل جۇلدىز» وردەندەرى, «گەرمانيانى جەڭگەنى ءۇشىن», «ەڭبەك ارداگەرى» مەدالدارى بار. مايدانگەر ۇستاز «شيەلى اۋدانىنىڭ قۇرمەتتى ازاماتى» اتاعىن دا العان.
بۇگىندە ومىردەن ءوتىپ كەتكەن قوساعى, «باتىر انا» ءجاميلا اپا ەكەۋى 11 ۇل-قىز ءوسىرىپ, ولاردان 41 نەمەرە, 50 شوبەرە ءسۇيدى. سارسەنبەك اقساقالدىڭ اۋلەتى ەندى رەسپۋبليكالىق دودادا باق سىنايدى.
وبلىستىق ىرىكتەۋ كەزەڭىنىڭ قورىتىندىسىندا جالاعاشتىق ماشتاەۆتار وتباسى جۇلدەلى ءىىى ورىندى, شيەلى اۋدانىنان قاتىسقان رىسپەمبەتوۆتەر اۋلەتى ءىى ورىندى يەلەندى. ال ءى ورىن جۇلدەسى قىزىلوردا قالاسىنىڭ ەرمانوۆتار اۋلەتىنە تابىستالدى. سونداي-اق بايقاۋعا بەلسەندى قاتىسقان وتباسىلار ارنايى اتالىمدارمەن ماراپاتتالدى. سولاردىڭ قاتارىندا قازالىلىق سۇلەيمەنوۆتەر اۋلەتى – «ونەرلى وتباسى», قارماقشىلىق بەردىباەۆتار شاڭىراعى – «ونەگەلى وتباسى», قارماقشىلىق شامشاتوۆتار – «ۇلگىلى وتباسى», جالاعاشتىق بەكنيازوۆتار – «بەرەكەلى وتباسى», ارالدىق سىدىقوۆتار اۋلەتى – «تالانت تۇعىرى», سىرداريالىق ەسەنحوجاەۆتار – «وزات وتباسى», جاڭاقورعاندىق تولەگەنوۆتەر «تولاعايلار وتباسى» اتالىمدارىن يەلەنىپ, ولارعا ارنايى جۇلدە تاپسىرىلدى.
ۇلتىمىزدا وتباسى ۇعىمىنىڭ ورنى بولەك. تۋعان جەرىنە تامىر جايىپ, سايالى بايتەرەككە اينالعان جاندار قاشاندا قۇرمەتكە يە. ولاردىڭ ءومىرى جاراسىم, سۇيىسپەنشىلىك, مەيىرىم سەكىلدى ىزگى قاسيەتتەر ارقىلى عانا شاڭىراق بيىك قۇرىلىپ, كەرەگەسى كەڭەيىپ, ءتۇتىنى ءتۇزۋ ۇشاتىنىنىڭ دالەلى.
سوڭعى ءۇش جىلدا سىر بويىندا بالا تۋ كورسەتكىشى 16 پايىزعا ارتىپ, شاڭىراقتاردا ىڭگالاعان سابيلەر ءۇنى كوبەيىپ كەلەدى. وبلىستاعى 141 مىڭ وتباسىنىڭ 48 مىڭنان استامى – كوپبالالى شاڭىراقتار. التىن قۇرساقتى انالارىمىزدىڭ 17 مىڭعا جۋىعى – «التىن القا» جانە «كۇمىس القا» يەگەرى.
قىزىلوردا وبلىسى