بەسىنشى رەت توعىزقۇمالاقتان NIS جەلىلىك سپارتاكياداسىنىڭ ءابسوليۋتتى چەمپيونى رەتىندە قىزىلوردا قالاسىنداعى زياتكەرلىك مەكتەپتىڭ قۇراما كومانداسى تانىلدى. زياتكەرلىك پەن ءداستۇردى توعىستىرعان توعىزقۇمالاق ويىنى بۇگىندە NIS جەلىسىندە سۇرانىسقا يە سپورتقا اينالدى.
جىل سايىن زياتكەرلىك مەكتەپتەردەگى جۇزدەگەن وقۋشى اسىعا كۇتەتىن ەرەكشە وقيعالاردىڭ ءبىرى – توعىزقۇمالاقتان داستۇرگە اينالعان جەلىلىك چەمپيونات. جاس سپورتشىلار ءۇشىن توعىزقۇمالاقتىڭ ءمانى ويىننان دا تەرەڭىرەك.
شىمكەنت قالاسىنداعى فيزيكا-ماتەماتيكا باعىتىنداعى NIS وقۋشىسى نۇراي ماحامبەتالى ءتورتىنشى جىل قاتارىنان سپارتاكيادا قاتىسۋشىلارىنىڭ تىزىمىنە ەندى. توعىزقۇمالاقتى ماتەماتيكانىڭ ومىردەگى تاعى ءبىر كورىنىسى رەتىندە تۇسىنەتىن قايسار قىز جەڭىلۋدەن قورىقپايدى.
– بولاشاقتا ۇلتتىق زياتكەرلىك ويىندى شەتەلدىك دوستارىمنىڭ اراسىندا تانىتقىم كەلەدى, – دەيدى نۇراي.
ەڭ جاس قاتىسۋشى اتانعان تالدىقورعان قالاسىنداعى زياتكەرلىك مەكتەپتىڭ وقۋشىسى اينەل قايرات وسىعان دەيىن جەلىلىك چەمپيوناتتىڭ قوس كۇمىسىن يەلەنگەن, بيىل دا جەڭىمپاز اتانۋ ويىندا. ال وسكەمەندىك تورەجان قاليبەك ۇلى ءۇشىن توعىزقۇمالاق وتباسىلىق داستۇرگە ۇلاسقان. ول بۇل ويىندى ماقتانىشپەن جالعاستىرىپ كەلە جاتقانىن جەتكىزدى. قاراعاندىداعى NIS وقۋشىسى ادىلەت ساناتحان بولسا, توعىزقۇمالاقتى ويناپ قانا قويماي, ونىڭ تاريحىن زەرتتەۋدى قولعا العان ەكەن.
– «تۋعان ەلگە تاعزىم» ولكەتانۋ-زەرتتەۋ ەكسپەديتسياسى اياسىندا بۇل ويىننىڭ تاريحى مەن تۋعان وڭىرىمدە قانشالىقتى كەڭ تارالعانىن زەرتتەدىم. بۇل ۇلتتىق قازىنامىزعا جاڭا كوزقاراسپەن قاراۋعا مۇمكىندىك بەردى, – دەيدى جاس ورەن.
اقبەرەن باقىتبەرگەن جەلىلىك سپارتاكياداعا العاش رەت قاتىسادى. بيىل «وركەن» گرانتىنىڭ يەگەرى اتانىپ, قىزىلورداداعى زياتكەرلىك مەكتەپكە ءتۇستى. ول توعىزقۇمالاق سپورتىمەن التى جىلدان استام ۋاقىت اينالىسىپ كەلەدى جانە اتالعان ويىن NIS-كە ءتۇسۋ ءۇشىن قاجەتتى داعدىلاردى دامىتۋعا سەپتىگىن تيگىزدى دەپ سانايدى. تالدىقورعان قالاسىنداعى NIS-ءتىڭ 6-سىنىپ وقۋشىسى ابىلايحان تىنىشتىقباي كىشى توپتا ءابسوليۋتتى چەمپيون اتاندى. ول سونداي-اق العاش رەت 2019 جىلى جەلىلىك ءتۋرنيردىڭ ۇزدىك ويىنشىسى بولعان ەدى.
– توعىزقۇمالاقتان مەكتەپتەگى باپكەرىم جەتپىسبەك كوكسوگوننىڭ ارقاسىندا سپورتتا عانا ەمەس, ماتەماتيكادان دا جاقسى جەتىستىكتەرگە جەتىپ ءجۇرمىن. ءار جەڭىس سايىن وزىمە دەگەن سەنىم ارتا تۇسەدى, – دەدى تالدىقورعاندىق ويىنشى.
سپارتاكيادانىڭ بارلىق قاتىسۋشىسى وزدەرىنىڭ توعىزقۇمالاقپەن بايلانىستى جەكە حيكايالارىن قۋانا بولىسەدى. ولاردىڭ كوپشىلىگى زياتكەرلىك ويىنعا NIS قابىرعاسىنا كەلگەلى قىزىعا باستاعان. وقۋشىلاردىڭ سوزىنە دەن قويساق, توعىزقۇمالاق ماتەماتيكالىق ساۋاتتىلىقتى, سىني ويلاۋ مەن لوگيكانى دامىتادى.
NIS-ءتىڭ تورەشىلەر توبىنىڭ جىل سايىنعى مۇشەسى, تالدىقورعانداعى سپورت مەكتەبىنىڭ توعىزقۇمالاقتان اعا جاتتىقتىرۋشىسى باۋىرجان شۋرين ۇلتتىق ويىنداردىڭ كومپيۋتەرلىك ويىنداردى ىعىستىرىپ جاتقانىنا سەنىمدى.
– توعىزقۇمالاق بويىنشا جەلىلىك سپارتاكيادانىڭ زياتكەرلىك مەكتەپتەردە ءداستۇرلى تۇردە وتكىزىلەتىنى قۋانتادى. ۇلتتىق ويىندار – ءبىزدىڭ بايلىعىمىز. ونىڭ كەز كەلگەن ءتۇرى تاريحىمىز بەن مادەنيەتىمىزگە, پاتريوتتىق سەزىمدەر مەن باتىلدىققا, سونداي-اق سپورتقا دەگەن سۇيىسپەنشىلىكتى تاربيەلەۋگە باعىتتالعان.
ءۇش جاس ساناتى بويىنشا تالدىقورعان, سەمەي جانە قىزىلوردا قالالارىنداعى زياتكەرلىك مەكتەپتەر كوماندالارى 2022 جىلدىڭ ءابسوليۋتتى چەمپيوندارى اتاندى. جەكە ەسەپتە كوكشەتاۋلىق اجار سارسەنباي, تالدىقورعاندىق ابىلايحان تىنىشتىقباي, سەمەيلىك ماليكا اسەمحانوۆا مەن ەركەبۇلان دوسان, اقتاۋلىق جانسايا جاردەم جانە ورالدىق ابىلاي مامەتان جەڭىس تۇعىرىنان كورىندى.
– قازاق حالقىنىڭ قايتالانباس مۇراسىنا اينالىپ, زياتكەرلىك پەن ءداستۇردى توعىستىراتىن توعىزقۇمالاق ويىنىنا قاتىساتىن وقۋشىلار سانىنىڭ ارتقانى – ءبىز ءۇشىن جەڭىس, – دەپ اتاپ ءوتتى NIS-ءتى دامىتۋ دەپارتامەنتى ديرەكتورىنىڭ ورىنباسارى ايدا اعادىل.
زياتكەرلىك مەكتەپتەردىڭ ەجەلگى ويىندى جانداندىرۋداعى اۋقىمدى باعدارلاماسى وقۋشىلاردىڭ ۇلتتىق تاريحقا, سالت-داستۇرلەرى مەن مادەنيەتىنە, حالىق فولكلورىنا, ويىندارى مەن تاعامدارىنا قىزىعۋشىلىعىن ارتتىرىپ, باۋلىعانىن راستايدى.
ايتا كەتەلىك, 2020 جىلدىڭ سوڭىندا توعىزقۇمالاق يۋنەسكو-نىڭ الەمدىك مۇرا نىساندارىنىڭ تىزىمىنە ەنگىزىلدى.