استانادا «قازاقستاننىڭ ساياسي ترانسفورماتسياسى: ۇردىستەر مەن كەلەشەك» ساراپشىلىق فورۋمى ءوتتى, دەپ حابارلايدى Egemen.kz.
فورۋمدى اشقان مەملەكەتتىك كەڭەسشى ەرلان قارين ءوز سوزىندە ءماجىلىس كونستيتۋتسيالىق رەفورمانى ىسكە اسىرۋعا باعىتتالعان التى زاڭ جوباسىنىڭ پاكەتىن سەناتقا تاپسىرعانىن اتاپ ءوتتى.
«بۇل سايلاۋ تۋرالى, ساياسي پارتيالار تۋرالى, پرەزيدەنت تۋرالى, پارلامەنت جانە دەپۋتاتتاردىڭ مارتەبەسى تۋرالى, كونستيتۋتسيالىق سوت تۋرالى زاڭداردىڭ جوبالارى. پارلامەنت اتالعان زاڭدار پاكەتىن ءبىر جارىم اي ىشىندە قابىلدايدى دەپ كۇتەمىز. بۇل كونستيتۋتسيالىق رەفورما اياسىنداعى زاڭ جوبالارىنىڭ العاشقى پاكەتى عانا ەكەنىن اتاپ وتكىم كەلەدى», دەدى ەرلان قارين.
مەملەكەتتىك كەڭەسشىنىڭ ايتۋىنشا, ەلدەگى ساياسي رەفورمالار ارقىلى قازاقستان جالپى پوستكەڭەستىك كەڭىستىكتە جاڭا ترەند ورناتۋدا.
«وسىلايشا, بيلىك دەموكراتيانىڭ كەڭ سپەكترىن باستادى. پارلامەنتتىڭ ءرولىن كۇشەيتۋ, ءماجىلىس پەن وبلىستىق ءماسليحاتتار دەپۋتاتتارىن سايلاۋدىڭ ارالاس جۇيەسىن ەنگىزۋ, اۋىلدىق جانە اۋداندىق اكىمدەردىڭ, قالالىق جانە اۋداندىق ءماسليحاتتار دەپۋتاتتارىنىڭ تىكەلەي سايلانۋى بۇعان دالەل بولا الادى», دەپ اتاپ ءوتتى ول.
ول كەلەسى جىلدىڭ قاڭتار ايىنان باستاپ ازاماتتاردىڭ قۇقىقتارىن قورعاۋدىڭ جاڭا قۇقىقتىق جانە ينستيتۋتسيونالدىق تەتىكتەرى ىسكە قوسىلاتىنىن قوسا ايتتى.
«مۇنىڭ ءبارى بيلىك تارماقتارى اراسىنداعى وڭتايلى تەپە-تەڭدىكپەن مەملەكەتتىك قۇرىلعىنىڭ جاڭا ينستيتۋتسيونالدىق ديزاينىن قالىپتاستىرادى. «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداتى بويىنشا ينستيتۋتتاردىڭ تۇراقتى جۇيەسى قالىپتاسادى», دەدى مەملەكەتتىك كەڭەسشى.