2022 جىلدىڭ توعىز ايىندا پرەزيدەنتتىڭ اتىنا 41 مىڭ ءوتىنىش كەلىپ ءتۇستى, ولاردىڭ ءاربىر ءتورتىنشىسى قۇقىق قورعاۋ ورگاندارىنىڭ قىزمەتىنە جانە سوت شەشىمدەرىنە قاتىستى بولدى, دەپ حابارلايدى Egemen.kz.
«ەلدىڭ پرەزيدەنتى رەتىندە, مەن ءۇشىن ادىلدىك – ەڭ جوعارى قۇندىلىق. سوندىقتان مەنىڭ اكىمشىلىگىمدە ازاماتتاردىڭ وتىنىشتەرىن قابىلداۋمەن جانە ولاردىڭ تالاپ-تىلەكتەرىن قاراستىرۋىمەن اينالىساتىن ارنايى ءبولىم بار. بۇل جۇمىستى ءوز باقىلاۋىمدا ۇستايمىن. بيىلعى 9 ايدا مەنىڭ اتىما 41 مىڭ ءوتىنىش كەلىپ ءتۇستى, ولاردىڭ ءاربىر ءتورتىنشىسى قۇقىق قورعاۋ ورگاندارىنىڭ قىزمەتىنە جانە سوت شەشىمدەرىنە قاتىستى. بۇل قۇقىقتىق رەفورمانى جالعاستىرۋدىڭ ماڭىزدىلىعىن كورسەتەدى», دەدى پرەزيدەنت الماتى وبلىسىنىڭ جۇرتشىلىعىمەن كەزدەسۋى بارىسىندا.
مەملەكەت باسشىسى قاڭتار ايىندا ەلىمىزدە ورىن العان قايعىلى جاعدايلاردا بەلگىلى ءبىر كۇشتەردىڭ جەتەگىنە ەرگەن جانە كىشىگىرىم قىلمىستار جاساعان ازاماتتارعا راقىمشىلىق جاسالعانى تۋرالى ەسكە سالدى.
«ەلىمىزدە زاڭ ۇستەمدىگى بولۋعا ءتيىس. ونسىز قوعامدىق ءتارتىپ ورناتۋ مۇمكىن ەمەس. باسقاشا ايتقاندا, ىشكى ساياساتىمىزدا زاڭ مەن ءتارتىپتى باسشىلىققا الامىز. تەك سوندا عانا ءبىز ازاماتتارىمىزدىڭ يگىلىگىنە باعىتتالعان ەكونوميكالىق رەفورمالاردى ءتيىمدى جۇرگىزۋ ءۇشىن قولايلى جاعداي جاساي الامىز. زاڭ مەن ءتارتىپ مەملەكەتىمىزدىڭ بەدەلىنە شىن مانىندە نۇقسان كەلتىرگەن قايعىلى قاڭتار وقيعاسىنىڭ قايتالانۋىنا جول بەرمەۋگە مۇمكىندىك بەرەدى. ودان ساباق الۋ كەرەك جانە بۇزاقىلار مەن لاڭكەستەردەن باتىر جاساۋدىڭ ەش قاجەتى جوق. بەلگىلى ءبىر كۇشتەردىڭ جەتەگىنە ەرگەن جانە كىشىگىرىم قىلمىستار جاساعاندارعا راقىمشىلىق جاريالادىم», دەپ اتاپ ءوتتى قاسىم-جومارت توقاەۆ.
پرەزيدەنتتىڭ ايتۋىنشا, مەملەكەتكە ساتقىندىق جاساعاندار, ەكىجۇزدىلىك جانە قورقاقتىق تانىتقاندار سوت الدىندا جاۋاپ بەرەدى.
«بۇزاقىلاردى, كىسى ولتىرۋشىلەردى, توناۋشىلاردى قولداۋعا تىرىساتىنداردان ساق بولۋ كەرەك. ولار حالقىمىزدىڭ تۇپكى مۇددەسىنە مۇلدەم ساي كەلمەيتىن جەكە ماقساتتى كوزدەيدى. جۋىق ارادا مەملەكەتكە ساتقىندىق جاساعاندار, ەكىجۇزدىلىك جانە قورقاقتىق تانىتقاندار سوت الدىندا جاۋاپ بەرەدى. قايعىلى جاعدايعا جول بەرگەن نەمەسە ارانداتۋشىلىق ارەكەت جاساعانداردىڭ ىستەرى بويىنشا تەرگەۋ جالعاسادى», دەپ تۇيىندەدى مەملەكەت باسشىسى.