قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيانىڭ مۇشەلەرى كوميسسيا توراعاسى قۋانىش سۇلتانوۆتىڭ باسشىلىعىمەن ەلورداداعى №4 ەمحانادا بولىپ قايتتى.
استانا تۇرعىندارى امبۋلاتورلىق تۇردە ەم قابىلدايتىن ەمحاناعا بارۋدىڭ نەگىزگى ماقساتى جالپى ەمدەۋ مەكەمەسىنىڭ جاعدايىمەن, ازاماتتاردىڭ قازاقستان رەسپۋبليكاسىنىڭ كونستيتۋتسياسى مەن «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىندە, قازاقستان راتيفيكاتسيالاعان ەكونوميكالىق, الەۋمەتتىك جانە مادەني قۇقىقتار تۋرالى حالىقارالىق پاكتىدە كەپىلدىك بەرىلگەن قۇقىقتارىنىڭ ساقتالۋىمەن تانىسۋ بولاتىن.
ەلباسى جانىنداعى ادام قۇقىقتارى جونىندەگى كوميسسيا مۇشەلەرى دارىگەرلەرمەن جانە پاتسيەنتتەرمەن اڭگىمەلەسۋ بارىسىندا ازاماتتاردىڭ دەنساۋلىعىن قورعاۋعا جانە بىلىكتى ءارى قولجەتىمدى مەديتسينالىق كومەك الۋعا كونستيتۋتسيالىق قۇقىقتارىن قامتاماسىز ەتۋ, دارىگەرلەر مەن باسقا دا مەديتسينالىق قىزمەتكەرلەردىڭ الەۋمەتتىك-قۇقىقتىق قورعالۋى, ولاردىڭ ەۋروپالىق وداق ەلدەرىندە جانە الەمنىڭ باسقا دا دامىعان ەلدەرىندە بىلىكتىلىكتەرىن كوتەرۋ ماسەلەلەرىنە ەرەكشە كوڭىل ءبولدى.
ساپار بارىسىندا كوميسسيا مۇشەلەرى استانا قالالىق دەنساۋلىق ساقتاۋ باسقارماسىنا اتالعان ەمحانانىڭ وڭ جۇمىس تاجىريبەسىن ەلوردانىڭ جانە ەلىمىزدىڭ باسقا دا ەمدەۋ مەكەمەلەرىنە تاراتۋدى ۇسىندى.
ەمدەۋ مەكەمەسىندە بولعان ساپاردا جينالعان ماتەريالدار كوميسسيانىڭ ەلباسىنىڭ قاراۋىنا ۇسىناتىن «قازاقستان رەسپۋبليكاسىنداعى ادام قۇقىقتارىنىڭ احۋالى تۋرالى» بايانداماسىنىڭ «ازاماتتاردىڭ دەنساۋلىعىن قورعاۋعا جانە بىلىكتى مەديتسينالىق كومەك الۋعا كونستيتۋتسيالىق قۇقىقتارى» بولىمىنە ەنگىزىلەتىن بولادى.
بۇل ءىس-شارا قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيانىڭ 2014 جىلعا ارنالعان جۇمىس جوسپارىنا سايكەس جۇرگىزىلدى.
«ەگەمەن-اقپارات».