جەلىدە اقتاۋ ماڭىنداعى كاسپيگە لاس قوڭىر سۋدىڭ توگىلىپ جاتقانى بەينەلەنگەن ۆيدەو تارادى. وسىعان بايلانىستى ەكولوگيا دەپارتامەنتىنىڭ ماماندارى كاسپيدەگى بۇزۋشىلىقتاردى انىقتادى, دەپ حابارلايدى Egemen.kz.
ماڭعىستاۋ وبلىسىنىڭ ەكولوگيا دەپارتامەنتى ورىن العان جاعدايعا تۇسىنىكتەمە بەردى.
دەپارتامەنت باسشىسى رۋسلان توكەنوۆ «كاسپي سۋ تۇششىلاندىرۋ زاۋىتى» جشس جانە «وربيتا» سپورت كەشەنى بۇل ارناعا سۋ اعىزۋ جۇمىستارىن جۇرگىزىپ جاتقانىن اتاپ ءوتتى.
ماڭعىستاۋ وبلىسى بويىنشا ەكولوگيا دەپارتامەنتىنىڭ ماماندارى وقيعا ورنىنا جەدەل بارىپ, كانال بويىنداعى لاستانۋ ايماعىن تەكسەردى. تەكسەرۋ بارىسىندا №1 جەو شىعارۋ قۇبىرىنىڭ كاسپي تەڭىزىنە اعىزۋ كوزىنەن, «ماەك-قازاتومونەركاسىپ» جشس كانالىنا اعىزۋ كوزىنەن جانە «كاسپي تۇششىلاندىرۋ زاۋىتى» جشس اعىزۋ قۇبىرىنىڭ كوزىنەن سۋ سىنامالارى الىندى.
«زەرتتەۋ ناتيجەلەرى بويىنشا «كاسپي تۇششىلاندىرۋ زاۋىتى» جشس توگۋ قۇبىرىنىڭ كوزىنەن جانە №1 جەو شىعارۋ قۇبىرىنىڭ كوزىنەن تەمىر مەن فوسفات, مىس قۇرامىنىڭ اسىپ كەتۋى انىقتالدى. انىقتالعان فاكتىلەر بويىنشا زاڭنامادا بەلگىلەنگەن تارتىپپەن قاجەتتى شارالار قابىلدانىپ, اتقارىلعان جۇمىستىڭ ناتيجەلەرى تۋرالى قوسىمشا حابارلانادى», دەپ ءتۇسىندىردى رۋسلان توكەنوۆ.