تاسىمال تاسقىندايدى

ەكى ەل اراسىنداعى الىس-بەرىستى ارتتىرۋعا تاعى ءبىر قارىشتى قادام جاسالدى دوستىق ارقاۋىنا نەگىزدەلگەن قارقىندى قارىم-قاتىناس قاشاندا زور جەتىستىكتەرگە جەتەلەپ, يگى شاراپاتىن تيگىزەتىنى حاق. وسىنداي ىنتىماقتى بەرىك بايلانىس ىرگەمىزدە جاتقان قىتاي ەلىمەن جىل وتكەن سايىن نىعايىپ, بارىس-كەلىس كوبەيىپ, ساۋدا-ساتتىق ۇلعايىپ كەلەدى. بۇل ورايدا, بۇدان بۇرىن حابارلانعانىنداي, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قىتاي حالىق رەسپۋبليكاسىنا مەملەكەتتىك ساپارى بارىسىندا ليانيۋنگان تەڭىز پورتىنداعى ءبىرىنشى قازاقستان-قىتاي كولىك-لوگيستيكالىق تەرمينالى كەشەنىن ىسكە قوسۋ سالتاناتتى ءراسىمى بولىپ, وندا تەلەكوپىر وتكىزىلدى. ەلباسى نۇرسۇلتان نازارباەۆ پەن قحر توراعاسى سي تسزينپين قىتايدىڭ شىعىس جاعالاۋىنداعى العاشقى بىرلەسكەن لوگيستيكالىق جوبا قىزمەتىنىڭ اشىلۋىن باستاپ بەرىپ, ءسات ساپار تىلەدى. ءسويتىپ, ەكى ەلدىڭ سەنىمدى سەرىكتەس ەكەندىگى ناقتى ىسپەن دالەلدەندى. اۋماعى 21,6 گەكتارعا ەسەپتەلگەن لوگيستيكالىق كەشەننىڭ قۇرىلىسىن 2014 جىلدىڭ سوڭىنا دەيىن تولىق اياقتاۋ جوسپارلانىپ وتىر. «قازاقستان تەمiر جولى» ۇلتتىق كومپانياسى مەن ليانيۋنگان پورتىنىڭ بىرلەسكەن ينۆەستيتسيالارى 100 ملن. اقش دوللارىن قۇرايدى. ليانيۋنگان پورتى ترانسقۇرلىقتىق ترانزيتتىك ءدالىزدىڭ شىعىس جاعالاۋىنداعى تەڭىز قاقپاسى رەتىندە قازاقستانمەن تىكەلەي تەمىرجول قاتىناسى ارقىلى تىعىز بايلا­نىستا. ليانيۋنگان پورتىندا تەرمينالدىڭ ىسكە قوسىلۋىنا بايلانىستى, «قازاقستان تەمiر جولى» ۇلتتىق كومپانياسى وڭتۇستىك-شىعىس ازيا ەلدەرىنەن ورتالىق ازيا, كاۆكاز, رەسەي, ەۋروپا جانە پارسى شىعاناعى ەلدەرى باعىتىنا, سونداي-اق كەرى باعىتقا جول تارتاتىن جۇكتەردى  شوعىرلاندىرۋ جانە قايتا وڭدەۋ ەسەبىنەن لوگيستيكالىق قىزمەتتەر اۋقىمىن كەڭەيتۋ مۇمكىندىگىن الادى. بىرلەسكەن جوسپارلارعا سايكەس, تەرمينال ارقىلى كونتەينەرلەردى تاسىمالداۋ كولەمى   2015 جىلى 250 مىڭ كونتەينەردەن استام دەڭگەيگە جەتەدى نەمەسە 2020 جىلعا قاراي كەيىننەن 2 ەسە ۇلعايتۋ ارقىلى 3 ميلليون توننا جۇكتى قۇرايدى. ءسويتىپ, اتالعان جوبا قازاقستان رەسپۋبليكاسىنىڭ ترانزيتتىك جانە ەكسپورتتىق الەۋەتىن ايتارلىقتاي كولەمدە ءوسىرىپ, قازىناعا قوماقتى قارجى قۇيادى. ءساتىن سالسا, تاسىمال تاسقىنداپ, تالاي اسۋلاردان اساتىنىمىز انىق. مارات اققۇل, «ەگەمەن قازاقستان».