رەسەيدىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ ىسساپارمەن ماڭعىستاۋ وبلىسىندا بولدى. بۇل ونىڭ سوڭعى بەس جىلدا كيەلى ولكەگە ەكىنشى رەت قادام باسۋى ەكەن.
كورشى رەسەي ەلىمەن قارىم-قاتىناس دوستىق باعىتتا جالعاسىپ كەلەدى. بەلارۋس ەلىمەن بىرگە قازاقستان جانە رەسەي ەلدەرى ەۋرازيالىق ەكونوميكالىق وداق شارتىنا قول قويۋ تابالدىرىعىندا تۇر. بۇل كەلەشەكتە جاسار جۇمىستاردىڭ باعىتىن سارالاپ, ءوزارا تۇسىنىستىك پەن كەلىسسسوزدەر اياسىن كەڭەيتۋ تۇرعىسىندا جۇزەگە اسادى. ماڭعىستاۋعا ساپارىندا ايماق باسشىلىعىمەن قازاقستان مەن رەسەي ەلدەرى اراسىنداعى ءوزارا ىنتىماقتاستىق پەن ونىڭ كەلەشەگى, ەكىجاقتى ارىپتەستىك ماسەلەسى تالقىلاندى, ەكونوميكالىق بايلانىستاعى ماڭعىستاۋ وبلىسىنىڭ ماڭىزى جان-جاقتى اڭگىمەلەندى. مۇناي سالاسى, قارا التىن ءوندىرۋدىڭ ۇلەسىن كوبەيتۋ تاسىلدەرى ءسوز بولعان كەزدەسۋدە م.بوچارنيكوۆ ەكىجاقتى بايلانىستى ايماقتىڭ تابيعي دامۋى مەن كولىك-لوگيستيكالىق ورتالىعى جوسپارلارىن دامىتۋعا بايلانىستى دا وربىتۋگە بولاتىندىعىن جەتكىزدى. ەلشى كاسپي جاعالاۋىنداعى بەس مەملەكەت اراسىندا ءتيىمدى كەلىسسوزدەر جۇرگىزىلىپ جاتقانىن ايتىپ, كۇز ايلارىنىڭ بىرىندە اتىراۋ قالاسىندا بەس مەملەكەت پرەزيدەنتتەرىنىڭ قاتىسۋىمەن وتەتىن سامميت كورشى ەلدەر اراسىنداعى ىنتىماقتىڭ ودان ءارى ارتا تۇسۋىنە سەپ بولاتىندىعىن ايتتى.
ماڭعىستاۋ وبلىسىنىڭ اكىمى ا.ايدارباەۆتىڭ قابىلداۋىندا وسى ماسەلەلەر توڭىرەگىندە ءسوز وربىتكەن ەلشى اقتاۋ قالاسىنىڭ اكىمى ە.جاڭبىرشينمەن دە كەزدەستى. كەزدەسۋگە رەسەيدىڭ ورال قالاسىنداعى باس كونسۋلى سايد زابيتوۆ قاتىستى.
اقتاۋ قالاسى بىرنەشە الىس-جاقىن قالالارمەن دوستىق, باۋىرلاستىق قارىم-قاتىناس ورناتۋعا تالپىنىپ, وسى باعىتتا ءبىراز ارىپتەستەر تاۋىپ ۇلگەرگەن, ولارمەن الەۋمەتتىك تۇرعىدا جاقسى قاتىناس قالىپتاستىرا العان قالا. قالا باسشىسى كەزدەسۋدە اقتاۋ قالاسى, ونىڭ الەۋمەتتىك-ەكونوميكالىق جاعدايى مەن كولىك-لوگيستيكالىق الەۋەتى, دامۋ پەرسپەكتيۆاسى, الەۋمەتتىك نىسانداردىڭ قۇرىلىسى, كوممۋنالدىق شارۋاشىلىعىنداعى وزەكتى ماسەلەلەردى شەشۋدەگى الىنعان ناقتى شارالار, كوگالداندىرۋ باعىتىنداعى جۇمىستارمەن, ەنگىزىلگەن جاڭا تەحنولوگيالارمەن تانىستىرىپ, اقتاۋ جۋىردا عانا مۇشەلىگىنە وتكەن «بىرىككەن قالالار جانە جەرگىلىكتى بيلىك» بۇكىلالەمدىك ۇيىمى تۋرالى باياندادى. ۇيىم شەڭبەرىندە بيىل تامىز ايىندا اقتاۋ قالاسىندا وتكىزىلۋى جوسپارلانعان «ەۋرازيا قالالارىنىڭ الەمدىك مۇراسى» VII حالىقارالىق كونفەرەنتسياسى جونىندە ايتىپ, كورشى ەلدىڭ ەلشىسىنەن قالالار اراسىنداعى باۋىرلاستىق قاتىناستاردىڭ تاريحي نەگىزىن قالاۋشىسى ءارى بۇل باعىتتاعى تاجىريبەسى مول ۆولگوگراد قالاسىمەن اقتاۋدىڭ باۋىرلاستىق قاتىناسىن ورناتۋعا ىقپال ەتۋىن سۇرادى, سونداي-اق م.بوچارنيكوۆتىڭ قۇرعاق وڭىردە حالىقتى سۋمەن, جىلۋمەن جانە ەلەكتر ەنەرگياسىمەن قامتۋ تۋرالى سۇراعىنا جاۋاپ بەرىلدى.
ساپار سوڭىندا ميحايل بوچارنيكوۆ رەسەي-قازاقستان اراسىنداعى ارىپتەستىك قاتىناستارى جايىندا ءسوز قوزعاي كەلە, اقتاۋ قالاسىندا رەسەي مەملەكەتىنىڭ كونسۋلدىق وكىلدىگىن اشۋ جونىندە ماسەلەنىڭ وزەكتىلىگىن العا تارتتى.
– قازىرگى تاڭدا قازاقستاننىڭ باتىس ايماعىندا رەسەيدىڭ كونسۋلدىعى بار. الايدا, ەكىجاقتى قاتىناستاردىڭ نىق ەكەنىن ەسكەرە وتىرىپ, قازىرگە تەوريا نەگىزىندە ماڭعىستاۋ وڭىرىندە كونسۋلدىق وكىلدىكتىڭ بولعانىن قۇپ سانايمىز. اقتاۋ قالاسى جان-جاقتى دامۋ قارقىنىمەن, تارتىمدى ينۆەستيتسيالىق الەۋەتىمەن قازاقستانداعى قالالاردىڭ الدىڭعى ساپىندا كەلەدى. ءبىز ەكى ەل مەن ونىڭ قالالارىنىڭ دوستىعى ءۇشىن قۋانامىز. ءوندىرىستى ماڭعىستاۋ ءوڭىرى رەسەيلىك كاسىپكەرلەردىڭ قىزىعۋشىلىعىنا يە, بولاشاقتا ارىپتەستىك بايلانىستارىمىز دامي بەرەدى دەپ سەنەمىن, – دەدى ول.
قازاقتىڭ قانىندا بار قاسيەت قوي, دوستىق تەڭىزىنىڭ جاعاسىنداعى ماڭعاز ماڭعىستاۋ, اقمارجان اقتاۋ دوستىق پەيىلدەن ەشقاشان باس تارتقان ەمەس. دوس بولامىن دەگەنگە قاشاندا كوڭىلى دارقان, ءتورى كەڭ.
گۇلايىم شىنتەمىرقىزى,
«ەگەمەن قازاقستان».
اقتاۋ.