مەكتەپ وقۋشىلارىن ىستىق تاماقپەن قامتۋ ماسەلەسى كۇن تارتىبىنەن تۇسپەۋگە ءتيىس. ويتكەنى بالانىڭ دۇرىس تاماقتانۋى دەنساۋلىقتىڭ كەپىلى بولماق. الايدا, وڭىرلەردەگى جاعداي ءماز ەمەس. مىسالى, الماتى وبلىسىنىڭ بىرقاتار اۋدانىنداعى مەكتەپتەردە بالانىڭ ىستىق تاماعى ءۇشىن بولىنگەن قارجى 500 تەڭگە عانا ەكەن.
بۇل جاعدايعا جاقىندا وبلىستىڭ ەڭبەكشىقازاق, ىلە, قاراساي, تالعار اۋداندارى مەن قوناەۆ قالاسىنداعى بىرنەشە مەكتەپتەردەگى اسحانالاردىڭ جۇمىسىن تەسەرگەن ءماسليحات دەپۋتتارىنىڭ وزدەرى كۋا بولدى.
– وقۋشىنىڭ ءبىر كۇندىك ىستىق تاماقپەن قامتىلۋ قۇنى 500 تەڭگە كولەمىندە. بۇعان مۇقتاج وتباسىنىڭ بالالارى ءۇشىن اسحانانى جالعا الۋشىنىڭ ەسەبىنەن تەگىن تاماق ۇيىمداستىرىلادى. بۇگىندە بالالاردى ىستىق تاماقپەن قامتۋ ماسەلەسىندە بىرقاتار ماسەلە تۋىنداپ وتىرعانىن جاسىرماۋ كەرەك. وسى ماسەلەنى شەشۋ ءۇشىن ءبىلىم بەرۋ ورىندارىنا ءماسليحاتتىڭ ارنايى كوميسسياسىن شاقىرىپ, جاعدايدى تانىستىرىپ تۇرامىز, – دەيدى الماتى وبلىسى ءبىلىم باسقارماسىنىڭ باسشىسى سالتانات بەسپاەۆا.
بالالاردىڭ دۇرىس تاماقتانباۋى سالدارىنان سوماتيكالىق اۋرۋلاردىڭ ۇلەسى ارتىپ كەلەدى. وبلىستىق ەپيدەميولوگيالىق باقىلاۋ دەپارتامەنتىنىڭ ينفەكتسيالاردى باقىلاۋ ءبولىمىنىڭ باسشىسى ينديرا كۇنباسوۆانىڭ ايتۋىنشا, وبلىستاعى وقۋشىلار اراسىندا انەميا, گاستريت جانە دۋودەنيت, اسقازاننىڭ فۋنكتسيونالدىق بۇزىلۋى, اس قورىتۋ جۇيەسىنىڭ اۋرۋلارى سياقتى دەرتكە شالدىققاندار كوبەيگەن.
الماتى وبلىسى