بۇگىن - ماشينا جاساۋشىلار كۇنى

كاسىبي مەرەكە العاش رەت 1981 جىلى كسرو كەزىندە تويلانعان. كەڭەس وداعى تاراعاننان كەيىن بۇل مەرەكەنى بەلارۋس, قىرعىزستان, رەسەي ءوز كۇنتىزبەلەرىندە قالدىردى.

2017 جىلعى 31 قازاندا سول كەزدەگى قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ قر ۇكىمەتىنىڭ № 689 قاۋلىسىنا قول قويدى. «قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» اتالعان قاۋلىدا قىركۇيەكتىڭ سوڭعى جەكسەنبىسى ماشينا جاساۋشى كۇنى رەتىندە بەكىتىلگەن.

بۇگىن اتاۋلى مەرەكەمەن يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ قۇتتىقتادى.

«ماشينا جاساۋ سالاسى ەلىمىزدىڭ وڭدەۋشى سەكتورىندا جەتەكشى ءرول اتقارىپ, ەكونوميكانىڭ دامۋىنا ەلەۋلى ۇلەس قوسىپ كەلەدى. بۇگىندە اتالعان سالا يندۋستريالىق دامۋ باعدارلامالارىنىڭ باسىم باعىتى رەتىندە ايقىندالىپ وتىر. يندۋستريالاندىرۋ جىلدارى ماشينا جاساۋداعى ءوندىرىس كولەمى 376 ملرد تەڭگەدەن وتكەن جىلى 2,3 ترلن تەڭگەگە دەيىن ۇلعايىپ, 6 ەسەگە ارتقان.

جاڭا زاماننىڭ سىن-قاتەرلەرى وندىرىستىك ىنتىماقتاستىقتى نىعايتۋدى, ءونىمدى قايتا وڭدەۋ دارەجەسىن تەرەڭدەتۋدى جانە يننوۆاتسيالىق تەحنولوگيالاردى ەنگىزۋدى تالاپ ەتەدى. وسى رەتتە سىزدەرگە العا قويعان ماقساتتارىڭىزعا جەتۋگە مۇمكىندىك بەرەتىن كاسىبي داعدىلارىڭىز, تاجىريبەلەرىڭىز بەن بىلىكتىلىكتەرىڭىز جەتكىلىكتى دەپ سانايمىن.

بويلارىڭىزعا سارقىلماس كۇش-قۋات, وتباسىلارىڭىزعا اماندىق تىلەيمىن!», دەدى مينيستر.