ءومىرىن ۇلت تاعدىرىنىڭ ءوسىپ-وركەندەۋىنە بايلاعان تۇلعانىڭ ايتقان ءسوزى, جۇرگەن جولى, ىستەگەن ءىسى جاستارعا قاشاندا ۇلگى-ونەگە. سونداي ونەگەلى جاننىڭ ءبىرى اسانباي اسقاروۆتىڭ ەسىمىن ەل اسقان سۇيىسپەنشىلىكپەن ەسكە الاتىنى تۋرالى اڭگىمە كوپ. «باسشى بولساڭ اسەكەڭدەي بول!» دەپ وتىراتىن كورىنەدى تامام تۇستىكتىڭ جۇرتى. سول كىسىنىڭ ءومىرى مەن قىزمەتى تۋرالى ورتالىق مەملەكەتتىك ارحيۆ ازىرلەگەن «اسانباي اسقاروۆ» اتتى ەكى تومدىق كىتاپ شىقتى جاقىندا.
جيىرما التى جىل بويى جامبىل, وڭتۇستىك قازاقستان, الماتى وڭىرلەرىن ابىرويمەن باسقارعان اسانباي اسقاروۆ تۋرالى, ونىڭ ونەگەلى ىستەرى حاقىنداعى ماتەريالداردىڭ ءبارى وسىندا. تەك قانا ماقالالار مەن ءارتۇرلى جازبالار عانا ەمەس, ارحيۆتىك قۇجاتتار دا قامتىلىپتى. سانالى عۇمىرىن ەل يگىلىگى جولىنا سارپ ەتكەن قوعام قايراتكەرى دىنمۇحامەد قوناەۆ سىندى زاڭعار تۇلعانىڭ سەنىمدى سەرىگى بولعانىنىڭ ءوزى ءبىراز جايدان حابار بەرەدى. قاي جەردە قانداي قىزمەت اتقارسا دا «ۇلتقا, قازاققا جاناشىرلىق كەرەك» دەگەن ءسوزدى مۇرات تۇتقان تۇلعانىڭ قايراتكەرلىك جولى جاستارعا وسىنداي ەڭبەكتەر ارقىلى تارايتىنى ءسوزسىز. «بىرەۋدەن بىرەۋ الىپ ەلگە تارار» دەپ حاكىم اباي تەككە ايتپاعان. «كراسنوگور اۋدانىنىڭ ءبىرىنشى حاتشىسى كەزىندە اۋىل باسشىسى ومىرزاقوۆقا ايتىپ كەنەن ازىرباەۆقا جاڭا ءۇي سالعىزىپ بەرگەنى دە ەل ەسىندە. ال جامبىل وبلىسىن باسقارعان كەزىندە قاراتاۋ, جاڭاتاس كەن ورىندارى اشىلدى. ءتىپتى بۇگىندە وبلىستىڭ اتىن يەمدەنگەن جىر الىبى جامبىلدىڭ ەڭسەلى ەسكەرتكىشىن دە وسى اسقاروۆ ورناتقان بولاتىن», دەلىنگەن كىتاپتاعى ءبىر مالىمەتتە. الماتىدا, تاعى باسقا جەرلەردەگى يگىلىكتەر سالۋعا قالاي قول جەتكىزگەنىن ءبىلۋ ءۇشىن قوس تومدىقتى پاراقتاۋعا تۋرا كەلەدى.