ەراسىل ەردىلدا قىرعىزستانداعى جارىستىڭ ءابسوليۋتتى چەمپيونى اتاندى

Team Kazakhstan اكادەمياسىنىڭ تۇلەگى ەراسىل اۋەلى جۇپتىق سىندا قازاقستاندىق ۆيتالي زاتسەپينمەن بىرگە ۇزدىك شىقتى. قازاقستاندىق جۇپ فينالدا رەسەيلىكتەر ماكار ەلەسين - دانيل ستەپانوۆتى ۇتتى. ەسەپ - 6:3, 6:3. سودان كەيىن ەراسىل جەكەلەي سىندا د.ستەپانوۆتى ايقىن باسىمدىقپەن جەڭدى. ەسەپ- 6:1, 6:2.

وسىلايشا, قىزىلوردا قالاسىندا تۋىپ-وسكەن ەردىلدا ITF دودالارىنداعى بەسىنشى تيتۋلىنا قول جەتكىزدى.

سونداي-اق فرانتسيانىڭ ديجون قالاسىندا ءتورتىنشى ساناتتاعى ITF Juniors جارىسىندا زارا داركەن جۇپتىق سىندا جەڭىمپاز اتاندى. ول ۋكراينالىق اناستاسيا فيرمانمەن بىرگە سوڭعى باسەكەدە ۋكراينالىقتار سەرافيما بوبروۆنيكوۆا - ستەفانيا پۋشكاردى تىزە بۇكتىردى. ەسەپ - 7:5, 6:3.

ەرەۆان قالاسىندا 12 جاسقا دەيىنگىلەر اراسىندا ەكىنشى ساناتتاعى Tennis Europe تۋرنيرىندە اسقار ءامىر ءوزىنىڭ حالىقارالىق جارىستاعى العاشقى تروفەيىنە يە بولدى. ول فينالدا رەسەيلىك پاۆەل يارومسكيمەن بىرگە رەسەيلىكتەر فيليپپ سميرنوۆ - اركادي ۆاحليننەن باسىم ءتۇستى. ەسەپ - 6:2, 6:7 (2:7), 10:7.