جاستاردىڭ وتان الدىنداعى مىندەتىن وتەۋگە جاپپاي قۇلشىنىسى وسىنى ايعاقتايدى, دەيدى سولتۇستىك قازاقستان وبلىستىق قورعانىس ءىسى جونىندەگى دەپارتامەنتىنىڭ باستىعى مۇراتبەك زەينۋللين.
– مۇراتبەك بەگايدار ۇلى, مىنە, جاستاردى كوكتەمگى اسكەر قاتارىنا شاقىرۋ مەرزىمى دە اياقتالىپ قالدى. تۇتاستاي العاندا, ونىڭ قورىتىندىسى قالاي اياقتالعالى وتىر؟
– كەڭ بايتاق وتانىمىزدىڭ تىنىشتىعىن كىرپىك قاقپاي كۇزەتۋ, تاۋەلسىز مەملەكەتىمىزدى كوزدىڭ قاراشىعىنداي قورعاۋ – ءاربىر قازاقستاندىق ءۇشىن زور ابىروي. بۇل ورايدا, ەلىمىزدىڭ ەرتەڭى, بولاشاعى – جاستارعا, جاس ۇرپاققا ۇلكەن ءمارتەبە بولارى انىق. اتا زاڭىمىزدا “قازاقستان رەسپۋبليكاسىن قورعاۋ – ونىڭ ءاربىر ازاماتىنىڭ قاسيەتتى پارىزى جانە مىندەتى” دەپ ايقىن جازىلعان. دەمەك, ەلىمىزدىڭ ازاماتتارى زاڭدا بەلگىلەنگەن ءتارتىپ پەن تۇرلەر بويىنشا اسكەر قىزمەتىن اتقارۋ بارىسىندا ءبىر عانا ماقساتتى كوزدەيدى. ول – رەسپۋبليكا قىزمەتىنىڭ تۇبەگەيلى قاعيدالارى بولىپ تابىلاتىن قوعامدىق تاتۋلىق پەن ساياسي تۇراقتىلىققا, بۇكىل حالىقتىڭ يگىلىگىن كوزدەيتىن ەكونوميكالىق دامۋعا, قازاقستاندىق پاتريوتيزمگە ادال قىزمەت ەتۋ. قازاقستان وزگە ەلدەرمەن ىنتىماقتاستىق پەن تاتۋ كورشىلىك قارىم-قاتىناس جاساۋ, ءبىر-ءبىرىنىڭ ىشكى ىستەرىنە ارالاسپاۋ, قارۋلى كۇشتى ءبىرىنشى بولىپ قولدانۋدان باس تارتۋ ساياساتىن جۇرگىزە وتىرىپ مەملەكەت اۋماعىنىڭ تۇتاستىعىن, قول سۇعىلماۋىن جانە بولىنبەۋىن قامتاماسىز ەتەدى. مۇنداي مارتەبەلى ءىس قازاقستان قارۋلى كۇشتەرىنە جۇكتەلگەن. بۇگىندە قىزىلجار ءوڭىرىنىڭ 1500-گە جۋىق جاستارى ەلىمىزدىڭ ءار قيىرىندا مەرزىمدى اسكەري بورىشتارىن ادال اتقارىپ ءجۇر. بۇدان تىسقارى كەلىسىم-شارت بويىنشا اسكەر قاتارىندا شىڭدالۋعا 200-گە جۋىق جاس ءوز قالاۋلارىن ءبىلدىردى.
قازاقستان رەسپۋبليكاسى قارۋلى كۇشتەر قاتارىن رۋحى مىقتى, وتانشىلدىق سەزىمى كۇشتى, ەلىن, جەرىن جان-تانىمەن سۇيەتىن, قيىندىقتان قايمىقپايتىن, سانا-سەزىمى جوعارى جاۋىنگەر-ساربازدارمەن تولىقتىرىپ وتىرۋ كۇندەلىكتى ادەتىمىزگە اينالعان. كوكتەمگى جاۋاپتى شارا كەزىندە اسكەر قاتارىنا 750-دەي جاس ىرىكتەلىپ الىندى. ولاردىڭ العاشقى لەگىن ابىلايحاننىڭ رەزيدەنتسياسى الدىندا سالتاناتتى تۇردە شىعارىپ سالدىق. بۇدان كەيىن رەسپۋبليكالىق گۆارديا مەن اەروموبيلدىك بولىمشەلەرگە جولداما العان جاستار قالا ورتالىعىنداعى ەلىمىزدىڭ مەملەكەتتىك رامىزدەرى بەينەلەنگەن كومپوزيتسيالىق الاڭنان اسقاق كەيىپپەن اتتاندى. سوڭعى توپتى جۋىردا پايدالانۋعا بەرىلگەن جەڭىس ساياباعىنان ەستە قالارلىقتاي اتتاندىرۋدى كوزدەپ وتىرمىز.
– جاسىراتىنى جوق, بۇرىندارى جاستار اسكەر قاتارىنا بارۋدان قاشقاقتايتىن. لاجى بولسا, ءتۇرلى جولدارمەن قالىپ قويۋعا تىرىساتىن. بۇل ادەتتەرىن نامىس, ار كورمەيتىن. قازىر كەرىسىنشە, ءسىزدىڭ سوزىڭىزدەن دە اڭعارىلىپ وتىرعانداي, وتان الدىنداعى مىندەتتى بورىشتارىن وتەۋگە ۇمتىلىس وسە تۇسكەن ءتارىزدى. مۇنى نەمەن تۇسىندىرەر ەدىڭىز؟
– تاۋەلسىزدىكتىڭ العاشقى جىلدارىنداعى اۋىرتپالىقتار قارۋلى كۇشتەرگە دە ءوز سالقىنىن تيگىزبەي قويعان جوق. اسكەردەن قاشۋ, الىمجەتتىك جاساۋ سەكىلدى كەلەڭسىز جايتتاردىڭ ورىن العانىن ءبارىمىز بىلەمىز. ەلىمىز ۋاقىتشا قيىندىقتاردان سۇرىنبەي ءوتتى. قازىر جاعداي ءمۇلدەم وزگەشە. ەلىمىزدىڭ تۇڭعىش پرەزيدەنتى, رەسپۋبليكا قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ سارابدال ساياساتىنىڭ ارقاسىندا اسكەري رەفورمالار جۇيەلى جۇرگىزىلىپ, ءوز جەمىسىن بەردى. تەمىردەي ءتارتىپ ورناپ, اسكەري-پاتريوتتىق تاربيە جولعا قويىلدى. اسكەري قۇرىلىمدار كاسىبي بىلىكتى وفيتسەر كادرلارمەن تولىقتى. ساربازداردىڭ وتانشىلدىق رۋحىن كوتەرۋ ماقساتىندا دا كوپ جۇمىستار اتقارىلدى. قازىر جاستاردىڭ بويىندا قازاقستانعا, ەلگە, جەرگە دەگەن سەزىم كۇشتى. وتان قورعاۋدى بيىك سىن, ازاماتتىق بەلەس دەپ تۇسىنەدى. جالپى, اسكەري بولىمدەردىڭ سولتۇستىكقازاقستاندىق ساربازدارعا دەگەن ءىلتيپاتى ەرەكشە, قۇرمەتى جوعارى. ونى العىس حاتتاردىڭ ءجيى كەلۋىنەن دە اڭعارۋعا بولادى. دەپارتامەنت تە, اتا-انالار دا ءجيى حابارلاسىپ, جان-جاقتى ماعلۇمات الىپ وتىرادى. “نۇر وتان” حدپ جاستار قاناتى, سوعىس, ەڭبەك ارداگەرلەرى, قادىرمەندى اقساقالدارىمىز, قوعامدىق ۇيىمدار دا بەلسەندى جۇمىس ىستەيدى مۇنىڭ ءبارى, ءسوز جوق, ءار جاستىڭ كوڭىل-كۇيىنە ەرەكشە اسەر ەتەرى ءسوزسىز.
– اسكەرگە شاقىرىلۋشىلار اراسىندا دەنساۋلىعى سىر بەرىپ, جاراماي جاتاتىندارى كوپ پە؟ نەگىزىنەن قانداي اۋرۋلار ءجيى كەزدەسەدى؟
– بۇرىندارى جاستار سالماقتىڭ ازدىعىنان, بويدىڭ كەمدىگىنەن زارداپ شەگىپ جاتاتىن. ارالارىندا مايتاباندارى دا كەزدەسىپ قالاتىن. قازىر بۇل كەلەڭسىزدىك تولىق جويىلماسا دا سيرەدى دەۋگە بولادى. بالكىم, مۇنى تۇرمىسىمىزدىڭ جاقسارۋىمەن, تىرشىلىگىمىزدىڭ وڭالۋىمەن تۇسىندىرۋگە بولار. دەسەك تە, اسقازان اۋرۋلارى ءالى دە ۇشىراسادى. سوڭعى كەزدەرى كوز اۋرۋلارى, قوزعالىس-تىرەك مۇشەلەرىنىڭ كەمىستىگى پايدا بولا باستادى. بۇلار – دۇرىس تاماقتانباۋدىڭ, كومپيۋتەردى شامادان تىس پايدالانۋدىڭ سالدارى.
تۇتاستاي العاندا, اسكەرگە شاقىرىلۋشىلار اراسىندا دەنساۋلىعى جاقسى, سپورتقا ءۇيىر, سالاماتتى ومىرگە بەيىم ۇلاندار مول. ولاردى جوعارى جانە ورتا ارناۋلى اسكەري وقۋ ورىندارىنا ىرىكتەۋ دە قاتاڭ ءتارتىپ بويىنشا جۇرگىزىلەدى. بولاشاق وفيتسەرلەر قازاقستانمەن قاتار, رەسەيدە, ءازىربايجاندا, بەلارۋستا, تۇركيادا, گەرمانيادا, اقش-تا, ءۇندىستاندا دايارلانادى. ولارعا تىلەك بىلدىرۋشىلەر كوپ. بيىلدان باستاپ ءبىر ايلىق اسكەري جيىن ءوتكىزۋدى قولعا العالى وتىرمىز. العاشقى لەكتە 75 ادام قامتىلاتىن بولادى.
ءبىزدىڭ الداعى ماقساتىمىز — وتان الدىنداعى ازاماتتىق بورىشتى وتەۋ قاسيەتتى پارىز ەكەنىن جاس ۇرپاققا ۇعىندىرا بەرۋ.
— اڭگىمەڭىزگە راحمەت.
اڭگىمەلەسكەن ءومىر ەسقالي. پەتروپاۆل.