جاقىندا الەۋمەتتىك جەلىدەن قىزىلوردا قالاسىندا كارىز قۇدىعىنا ءتۇسىپ كەتكەن ءسابيدى قۇتقارىپ قالعان بوزبالا جايلى ءبارىمىز وقىدىق. بىراق وسى وقيعا بولعان تۇستان ءوتىپ بارا جاتقان ءبىر تۇرعىن تۇسىرگەن فوتوداعى قۇتقارۋشىنىڭ اتى-ءجونى بەلگىسىز بولىپ قالىپ ەدى.
وبلىستىق «سىر بويى» گازەتىنىڭ ءتىلشىسى, ارىپتەسىمىز گۇلبانۋ ماقاجان سول بوزبالانى ىزدەپ تاۋىپتى. تەرەڭ قۇدىققا قورىقپاي قويىپ كەتكەن باتىر 15 جاستاعى ارمان امانجول بولىپ شىقتى. ارال اۋدانى بوگەن اۋىلىنان وبلىس ورتالىعىنداعى كوللەدجدەردىڭ بىرىنە قۇجات تاپسىرۋعا كەلىپتى. اكەسى جاڭالىق جۇمىسسىز, اناسى مايرا مەكتەپ اسحاناسىندا ىستەيدى. الدىندا ەكى اپكەسى, ەكى اعاسى بار ارمان ءۇيدىڭ كەنجەسى ەكەن.
ء«بارى اياق استىنان بولدى. اناسى مەن ونىڭ الدىنا ءتۇسىپ الىپ, قۇلدىراڭداپ ءسابي ءسال ىلگەرى كەتىپ بارا جاتقان. كەنەت اناسىنىڭ جان داۋىسى شىقتى. قاقپاعى اشىق قۇدىقتى كورگەندە-اق ءبىر وقىس وقيعانىڭ بولعانىن بىلە قويدىم. ويلانباستان قۇدىققا ءتۇستىم. بالانى قولىما العان ساتتە جەتىپ كەلگەن ءبىر اعاعا تاپسىردىم. ارتىنشا مەنى دە سول كىسى شىعارىپ الدى», دەيدى ول.
م.ىقسانوۆ اتىنداعى قىزىلوردا پوليتەحنيكالىق كوللەدجىنە قۇجاتتارىن وتكىزگەن ارمان بولاشاقتا ەلەكتريك بولعىسى كەلەدى. ۇياڭداۋ بوزبالا ەرلىگىنىڭ جالپاق جۇرتقا ايان بولىپ كەتكەنىنە قىسىلاتىن سەكىلدى. «مەنىڭ ورنىمدا كەز كەلگەن ادام وسىنى جاسار ەدى عوي» دەيدى ك ۇلىمسىرەپ. وقيعادان حاباردار بولعاندار ارمانعا حابارلاسىپ, العىس ايتىپ جاتىر ەكەن. ارنايى شاقىرتىپ, كەيبىر ءىس-شارالارعا قاتىستىرعىسى كەلەتىندەر دە بار كورىنەدى. «سىر مەديا» جشس عيماراتىندا اتى-ءجونىن اتاماۋدى وتىنگەن ءبىر زامانداسىمىز ەرلىك كورسەتكەن بوزبالاعا قارجىلاي سىي تابىس ەتتى.
قينالعانعا قايىرىم كورسەتىپ, قالعىپ بارا جاتقان قوعامدى ءبىر سىلكىپ الاتىن وسى ارمانداي اينالايىندار عوي...
قىزىلوردا