قاڭتار ايىنداعى تارتىپسىزدىكتەر بارىسىندا پوليتسەيلەرگە قاتىستى زورلىق-زومبىلىق جاساعان ەكى ايىپتالۋشىعا سوت ۇكىمى جاريالاندى. بۇل تۋرالى وكق بريفينگىندە ءىىم تەرگەۋ دەپارتامەنتىنىڭ باستىعى سانجار ءادىلوۆ مالىمدەدى, دەپ حابارلايدى Egemen.kz.
«5 قاڭتاردا سەمەيدە بولعان تارتىپسىزدىك كەزىندە قالا تۇرعىنى زاڭسىز ارەكەتتەردى توقتاتۋ تۋرالى قىزمەتكەرلەردىڭ زاڭدى تالاپتارىنا باعىنباي, قوعامدىق ءتارتىپتى قامتاماسىز ەتۋگە قاتىسقان ۇلتتىق ۇلاننىڭ اسكەري قىزمەتشىسىنە دەنە جاراقاتىن سالعان. سوت ۇكىمىمەن ول كىنالى دەپ تانىلىپ, 4 جىلعا باس بوستاندىعىنان ايىرىلدى», دەدى سانجار ءادىلوۆ.
3 قاڭتاردا وسكەمەندە پوليتسيا قىزمەتكەرلەرىنىڭ زاڭسىز ميتينگ ۇيىمداستىرۋ ارەكەتتەرىنىڭ جولىن كەسۋ كەزىندە قالا تۇرعىنى ولارعا زورلىق-زومبىلىقپەن قارسىلىق كورسەتكەن. وسكەمەن سوتىنىڭ ۇكىمىمەن ول كىنالى دەپ تانىلىپ, 3 جىلعا باس بوستاندىعىنان ايىرىلدى.
«جاپپاي تارتىپسىزدىك كەزىندە قىزمەتكەرلەرگە قاتىستى زورلىق-زومبىلىق كورسەتۋ فاكتىلەرى بويىنشا بىرقاتار قىلمىستىق ءىس وندىرىسكە الىنعان, جاقىن ارادا ولار سوتقا جىبەرىلەدى», دەپ تولىقتىردى س. ءادىلوۆ.