بالالار جىلى اياسىندا وڭىردە بالدىرعاندارعا جاسالىپ جاتقان قامقورلىق از ەمەس. تاياۋدا عانا تارازدىڭ توبەسىنە قارا ءتۇتىن توندىرگەن «قازفوسفات» جشس جۇرتتىڭ نارازىلىعىن تۋدىرعانىمەن, سەرىكتەستىككە قاراستى تاعى ءبىر مەكەمە ءبىرشاما ۋاقىت بۇرىن بالالاردىڭ العىسىن الىپ ۇلگەرىپتى.
انىعىراق ايتساق, جاقىندا عانا «قازفوسفات» جشس يەلىگىندەگى قاراتاۋ تاۋ-كەن قايتا وڭدەۋ كەشەنىنە قاراستى «جۇلدىز» بالالاردى ساۋىقتىرۋ لاگەرىنىڭ ءۇشىنشى ماۋسىمى جابىلدى. ەلىمىزدە قالىپتاسقان ەپيدەميالىق احۋالعا بايلانىستى لاگەر جۇمىسى ەكى جىل بويى توقتاپ قالعان بولاتىن. 2022 جىلى لاگەر جۇمىسىن جانداندىرۋ ءۇشىن اعىمداعى جوندەۋ جۇمىستارى جۇرگىزىلدى.
«بيىل ءبىز بالالاردىڭ جاقسى دەمالۋىنا كۇش سالدىق. جالپى, دەمالۋشىلارعا ارناپ بەس مەزگىل دايىندالاتىن اس ءمازىرى بار, ويىن-ساۋىق كەشەندەرى جەتكىلىكتى. بالالاردىڭ جان-جاقتى دامۋى ءۇشىن قولدان كەلگەن جۇمىستاردى اتقارىپ جاتىرمىز. بىرنەشە ۇيىرمە جۇمىس ىستەدى. ەڭ باستىسى, باسسەينىمىزدى تالاپقا ساي جاڭعىرتتىق», دەيدى لاگەر ديرەكتورى قارلىعاش قاناپينا.
ونىڭ ايتۋىنشا, لاگەر 3 ماۋسىم بويى ءۇزىلىسسىز جۇمىس ىستەدى. لاگەردىڭ 14 كۇنگە سوزىلاتىن ءبىرىنشى ماۋسىمىنا 235 بالا قابىلدانعان, سونىڭ ىشىندە اتا-اناسىنىڭ قامقورلىعىنسىز قالعان بالالارعا تەگىن جولداما بەرىلگەن. ال ەكىنشى ماۋسىمدا 280 بالا قابىلدانسا, ونىڭ بارلىعى تولىق وتباسىنان شىققاندار. ءۇشىنشى ماۋسىمعا 235 بالا كەلگەن.
ايتا كەتەيىك, جالپى «قازفوسفات» جشس بيىل بالالارعا ارنالعان بارلىق ءىس-شارالارعا 130 ملن تەڭگە قارجى بولگەن. كەلەسى جىلدىڭ ءساۋىر ايىنان باستاپ, لاگەردى ودان ءارى دامىتۋ ماقساتىندا سپورت كەشەندەرىن سالۋ جوسپارلانعان. سونىمەن قاتار بالالار ويىن الاڭى بوي كوتەرمەك.
جامبىل وبلىسى