ەل اۋماعىندا ءوتىپ جاتقان «قاراسورا» وپەراتسياسى بارىسىندا 607 ەسىرتكى قىلمىسى انىقتالدى. بۇل تۋرالى ىشكى ىستەر مينيسترلىگى ەسىرتكى قىلمىسىنا قارسى ءىس-قيمىل دەپارتامەنتىنىڭ وكىلى دانيار ورالوۆ ايتتى, دەپ حابارلايدى Egemen.kz.
«جىل سايىن ماۋسىمنان قازانعا دەيىن «قاراسورا» اۋقىمدى وپەراتسياسى بارىسىندا گاشيش پەن ماريحۋانانى دايىنداۋ, ساقتاۋ جانە ساتۋدىڭ مىڭنان استام فاكتىلەرىن انىقتايمىز. ارناۋى وپەراتسيانىڭ 2,5 ايىنىڭ قورىتىندىسى بويىنشا قازىردىڭ وزىندە 607 ەسىرتكى قىلمىسى اشكەرەلەندى. ونىڭ ىشىندە 299 ساتۋ, 76 ساقتاۋ جانە 167 ءوسىرۋ فاكتىسى بار», دەدى دەپارتامەنت وكىلى مينيسترلىكتىڭ ءباسپاسوز قىزمەتى الاڭىندا وتكەن بريفينگتە.
دانيار ورالوۆتىڭ دەرەگىنشە, زاڭسىز اينالىمنان 2 توننا 690 كەلى ەسىرتكى زاتتارى تاركىلەندى. ونىڭ ىشىندە 1 توننا 98 كەلى ماريحۋانا, 113,3 كەلى گاشيش, 19,3 كەلى سينتەتيكالىق ەسىرتكى جانە 278 678 ءتۇپ قۇرامىندا ەسىرتكى بار وسىمدىك, 60 توننادان استام جابايى قاراسورا جويىلدى.