جاقىندا ماسكەۋدە رەسەي كۇرەس فەدەراتسياسىنىڭ پرەزيدەنتى ميحايل مامياشۆيلي, بەلارۋستەن ءۇش دۇركىن وليمپيادا, جەتى دۇركىن الەم چەمپيونى الەكساندر مەدۆەد, قازاقستاننان رەسەي استاناسىنا ارنايى بارعان دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ جانە باسقا دا بەدەلدى ماماندار قاتىسقان حالىقارالىق كۇرەس فەدەراتسياسىنىڭ القالى جيىنىندا قازاق كۇرەسىنىڭ ءFىLA قۇرامىنا ەنگەنى تۋرالى حابارلاندى. وسىعان وراي ءتول كۇرەسىمىزدىڭ ءFىLA اياسىندا 2011 جىلى وتەتىن دۇنيەجۇزىلىك ويىندار مەن ەۋروپالىق ويىندار باعدارلاماسىنا كىرەتىنى, ال 2012 جىلى ليتۆانىڭ شاۋلياي قالاسىندا جالاۋىن كوتەرەتىن تافيسا ويىندارىنا دا ءبىزدىڭ ۇلتتىق كۇرەستەن جارىستاردىڭ وتەتىنى بەلگىلى بولدى. سونىمەن بىرگە ماسكەۋدە وتكەن باسقوسۋدا ماماندار حالىقارالىق دارەجەدەگى تورەشى سەرىك وڭعارباەۆتىڭ وليمپيادالىق ەمەس كۇرەس تۇرلەرى بويىنشا ءFىLA-نىڭ تورەشىلەر القاسىنىڭ توراعاسى بولىپ سايلانعانىن حاباردار ەتتى.
وسى ماسەلەگە بايلانىستى جاقىندا ماسكەۋدە وتكەن جيىنعا قاتىسقان دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆپەن اڭگىمەلەسكەنىمىزدە, ول بىزگە بىلاي دەدى:
– 12-15 مامىر كۇندەرى ءماسكەۋدە حالىقارالىق كۇرەس فەدەراتسياسىنىڭ القالى جيىنى ءوتتى. بۇل جيىنعا قازاق كۇرەسىنىڭ ءFىLA قۇرامىنا قابىلداۋ جونىندە ءوتىنىش بەرگەن ەدىك. وسى ءوتىنىشىمىز ءبىراۋىزدان قابىلداندى. قازاق كۇرەسىنىڭ حالىقارالىق كىلەمگە شىعۋى ءبىزدىڭ كوپتەن بەرگى ماقساتىمىز ەدى. مۇنىڭ الدىندا وزدەرىڭىزگە بەلگىلى, ءتول كۇرەسىمىزدەن ەكى رەت الەم, بىرنەشە رەت ازيا چەمپيوناتىن وتكىزگەن بولاتىنبىز. وسى ءباسەكەلەردىڭ ءبارى ۇلتتىق كۇرەسىمىزدىڭ دامۋىنا سەپتىگىن تيگىزۋدە. دەگەنمەن, قازاق كۇرەسىنىڭ ءFىLA-نىڭ قۇرامىنا قابىلدانۋى بۇل ءتول سپورتىمىزدىڭ ناسيحاتتالىپ, دامۋىنا وزگەشە سەرپىن بەرەدى دەپ ويلايمىز.
– بيىلعى جيىندا قانداي ءماسەلەلەر قارالدى, ونىڭ وتكەن جىلدارعىدان ەرەكشەلىگى بولدى ما؟
– جيىندا ءFىLA-نىڭ كۇرەس تۇرلەرى جونىنەن كوميتەتىنىڭ پرەزيدەنتى بولىپ ۆيلەيتا گينتاۋتاس سايلاندى. سونىمەن بىرگە حالىقارالىق فەدەراتسيا كوميتەتىنىڭ جانىنان ءتورت دەپارتامەنت قۇرىلدى. سپورت جانە ويىندار دەپارتامەنتىنىڭ توراعاسى بولىپ الەكساندر مەدۆەد, ۇلتتىق كۇرەس تۇرلەرى دەپارتامەنتىنىڭ باسشىلىعىنا الەكسەي كىلاسوۆ, قارجى جانە ماركەتينگ دەپارتامەنتى توراعالىعىنا المامبەت اناپياەۆ سايلاندى. سونداي-اق, كوميتەت جانىنان ءبىلىم, مەديا جانە ناسيحات, دوپينگكە قارسى جانە مەديتسينالىق قامتاماسىز ەتۋ دەپارتامەنتتەرى قۇرىلدى. وسى جيىندا ءبىزدىڭ ەلىمىز ءۇشىن بولعان تاعى ءبىر قۋانىشتى وقيعا, مۇندا ءFىLA-نىڭ تورەشىلەر القاسىنىڭ توراعاسى بولىپ سەرىك وڭعارباەۆ سايلاندى. ول وليمپياداعا تورەلىك جاساعان, 2003 جىلى بۋساندا وتكەن جازعى ازيا ويىندارىنىڭ باس تورەشىسى بولعان وتە ءتاجىريبەلى مامان. ەندى ءبىز 15-16 ماۋسىم كۇندەرى شۆەيتساريادا ورنالاسقان حالىقارالىق كۇرەس فەدەراتسياسىنىڭ شتاب پاتەرىنە بارىپ, ءFىLA-نىڭ پرەزيدەنتى مارتينەتتيدەن قازاق كۇرەسىنىڭ سەرتيفيكاتىن الاتىن بولامىز. وسى قۇجات ءتول كۇرەسىمىزدەن دۇنيە ءجۇزىنىڭ ءار تۇكپىرىندە قۇرلىقتىق فەدەراتسيالار اشۋعا مۇمكىندىك بەرەدى.
– ماسكەۋدەگى جيىندا قازاق كۇرەسىنىڭ تافيسا ويىندارىنىڭ باعدارلاماسىنا ەنگەنى تۋرالى دا حابارلانىپتى. وسى ماسەلە ءجونىندە ايتىپ بەرسەڭىز.
– بۇل ءتورت جىلدا ءبىر رەت وتەتىن ويىن. وندا باعدارلاماعا ەنگەن ءاربىر حالىقتىڭ ۇلتتىق ونەرى كورسەتىلىپ, سپورت تۇرلەرىنەن جارىستار وتەدى. ءبىز وسى ويىندارعا ءFىLA-نىڭ اياسىندا قازاق كۇرەسىنەن جارىستار وتكىزۋگە مۇمكىندىك الىپ وتىرمىز.
– الداعى كەزدە قازاق كۇرەسىن وليمپيا ويىندارىنا ەنگىزۋ ماسەلەسى شەشىلە مە؟ وسى ماقساتتا قازىر قانداي جۇمىستار ىستەلىنىپ جاتىر؟
– ءبىزدىڭ قازىرگى ماقساتىمىز قازاق كۇرەسىن دۇنيە جۇزىنە كەڭىنەن ناسيحاتتاۋ, ودان قۇرلىقتىق چەمپيوناتتار وتكىزۋ. قازىر كۇرەستىڭ وليمپيادا باعدارلاماسىنا ەنۋى ءۇشىن كەم دەگەندە 100-دەن استام ەلدەر قاتىساتىن الەم چەمپيوناتىن وتكىزۋ كەرەك. بۇل الداعى كەزدە شەشىلەتىن ماسەلە. قازاق كۇرەسىنىڭ وليمپياداعا ەنۋى ءۇشىن ءبىز العاشقى بەلەستەن ءوتىپ وتىرمىز. ءتول كۇرەسىمىز ءFىLA-نىڭ قۇرامىنا قابىلداندى, ەندىگى ماقساتىمىز ۋاقىت وتە كەلە قۇرلىقتىق باسەكەلەر مەن حالىقارالىق تۋرنيرلەردى كوپتەپ وتكىزىپ, قازاق كۇرەسىن بارىنشا دامىتۋ.
– قازىر ەكى جىلدا ءبىر رەت الەم, ازيا چەمپيوناتتارى وتكىزىلىپ كەلەدى. بيىلعى جىلى وسى بايراقتى باسەكەلەر قاي جەردە وتەتىن بولادى؟
– بيىل ازيا چەمپيوناتى 10-17 ماۋسىم ارالىعىندا وسكەمەندە وتەدى. وسى جەردە قۇرلىقتىق ءباسەكەنى وتكىزۋگە قولدا بار ءمۇمكىندىگىن جاساپ جۇرگەن ازيا فەدەراتسياسىنىڭ پرەزيدەنتى, قىزىلوردا وبلىسى اكىمىنىڭ ورىنباسارى رزاقۇل نۇرتاەۆ پەن ونىڭ ءبىرىنشى ۆيتسە-پرەزيدەنتى, وسى وبلىستىڭ دەنە تاربيەسى جانە سپورت باسقارماسىنىڭ باستىعى سادىق مۇستافاەۆقا العىسىمىزدى بىلدىرگىمىز كەلەدى. ال الەم چەمپيوناتى 24-27 قىركۇيەكتە استانا نەمەسە اقتاۋ قالاسىندا وتكىزۋ جوسپارلانۋدا.
– اڭگىمەڭىزگە راحمەت.
اڭگىمەلەسكەن داستان كەنجالين.