اقتوبە قالاسىنداعى “قونىس” سپورت سارايىندا وليمپيالىق ويىنداردىڭ كۇمىس ءجۇلدەگەرى, الەم كۋبوگىنىڭ ەكى دۇركىن يەگەرى, ەكى مارتە ەۋروپا چەمپيونى, كسرو-عا ەڭبەگى سىڭگەن سپورت شەبەرى سەرىك قوناقباەۆتىڭ جۇلدەسى ءۇشىن بوكستان ءXVىىى حالىقارالىق تۋرنير سالتاناتتى جاعدايدا اشىلدى. بوكس دەسە ىشكەن اسىن جەرگە قوياتىن جانكۇيەرلەردى, تۋرنيرگە قاتىسۋشىلاردى اقتوبە وبلىستىق بوكس فەدەراتسياسىنىڭ پرەزيدەنتى, اقتوبە قالاسىنىڭ اكىمى ارحيمەد مۇحامبەتوۆ قۇتتىقتادى.
تۋرنيرگە قاتىسۋشىلار مەن كورەرمەندەرگە ايتۋلى سپورت ساڭلاعى, قازىرگى پارلامەنت ءماجىلىسىنىڭ دەپۋتاتى سەرىك قوناقباەۆ جىلى لەبىزىن ارنادى. وسىنداي شارادان ءۇمىت كەمەسىنە وتىراتىن جاس ۇرپاقتىڭ بويىندا سپورتقا دەگەن قىزىعۋشىلىق تۋاتىنىنا قۋانىشتىلىعىن جاسىرمادى. كۇنى ەرتەڭ-اق اقتوبەدەن دە “سەن تۇر, مەن اتايىن” ساڭلاق بوكسشىلار قاۋلاپ ءوسىپ شىعاتىنىنا, الەم چەمپيونى گاليب جافاروۆتىڭ ءىزباسارلارى بۇرىنعىدان كوبەيە تۇسەتىنىنە سەنىم ارتتى. ءوزىنىڭ اتىنداعى ءتۋرنيردىڭ ەلىمىزدىڭ وڭىرلەرىندە كەزەكتەسىپ وتكىزىلۋىنىڭ ماقساتى دا وسى ەكەنىن جەتكىزدى. وسىلاي جالپى سپورتتى, سونىڭ ىشىندە بوكستى ناسيحاتتاي وتىرىپ, جاستاردى سالاماتتى ءومىر سالتىن ۇستانۋعا مولىنان تارتۋ كەرەكتىگىن ءمالىمدەدى. بوكستان ءوتىپ جاتقان حالىقارالىق جارىستىڭ باس تورەشىسى ۆالەري لاپتەۆ كەزدەسۋلەر كەزىندە قيانات بولمايتىنىنا سەندىردى.
ءتۋرنيردىڭ سالتاناتتى اشىلۋىنان سوڭ الدىن الا جەكپە-جەكتەر جالعاستى. فينالدىق كەزدەسۋلەر سەنبى كۇنى وتكىزىلەدى. مۇندا قازاقستان, رەسەي, اقش, تاجىكستان, ارمەنيا, تۇركىمەنستان, وزبەكستان, ۋكراينانىڭ, سونداي-اق قازاقستاننىڭ بارلىق وبلىستارىنىڭ قۇراما كوماندالارى قاتىسۋدا. جارىستىڭ جۇلدەلىك قورى 110 مىڭ دوللاردى قۇرايدى. تۋرنيردىڭ دەمەۋشىلەرى – “تاسساي” ساۋدا بەلگىسى, “دينا” سۋپەر- ماركەتتەر جەلىسى جانە “كەڭەس” جيھاز ءۇيى.
ساتىبالدى ءساۋىرباي, اقتوبە وبلىسى.