وسى ايدا بوكستان ەلىمىزدىڭ ەرەسەكتەر جانە جاستار قۇراما كوماندالارى ەكى بىردەي ءىرى حالىقارالىق تۋرنيرلەرگە قاتىستى.
11-17 مامىر كۇندەرى ەرەسەكتەر اراسىندا ۋكراينانىڭ حەرسون قالاسىندا وتكەن نيكولاي مانگەرانى ەسكە الۋعا ارنالعان تۋرنيردە قازاقستان ۇلتتىق قۇراماسى ءتورت التىن, ءبىر كۇمىس جانە ءۇش قولا ءجۇلدەنى مويىندارىنا تاعىپ قايتتى. بۇل باسەكەدە التىن مەدالدى ءىلياس سۇلەيمەنوۆ (48 كگ.), الماسبەك الىبەكوۆ (64 كگ.), المات سەرىموۆ (81 كگ.) جانە 91 كيلودان جوعارى سالماقتا دوسجان وسپانوۆ يەلەنسە, ءبىر كۇمىس جۇلدەنى 60 كيلودا كۇش سىناسقان عاني جايلاۋوۆ جەڭىپ الدى. سونىمەن بىرگە, حابيبۋللا يسمايل-احۋنوۆ (51 كگ.), ءمىرجان راقىمجانوۆ (54 كگ.) جانە دۋمان ءالىموۆ (57 كگ.) قولا مەدالگە قول جەتكىزدى.
وسى تۋرنيردە جاسى وردا بۇزار جاسقا كەلىپ قالسا دا سەمەي بوكس مەكتەبىنىڭ تۇلەگى م.راقىمجانوۆتىڭ جەكپە-جەكتەردى جوعارى دەڭگەيدە وتكىزىپ, جانكۇيەرلەرگە جاقسى قىرىنان كورىنگەنىن اتاپ ءوتۋ ءجون. ول تۋرنير باستالىسىمەن ءوزىنىڭ تاكتيكاسىن ۇتىمدى پايدالانىپ, اقتىق سىنعا دەيىنگى قارسىلاستارىنىڭ ءبارىن ايقىن باسىمدىقپەن جەڭدى. سونىمەن بىرگە, تۋرنيردە التىن جۇلدەگە يە بولعان بوكسشىلارمەن قاتار, كۇمىس مەدال يەلەنگەن جامبىلدىق ع.جايلاۋوۆتىڭ دا شارشى الاڭدا جاقسى ونەر كورسەتكەنىن اتاپ وتۋگە بولادى.
ەندى مىرزاعالي ايتجانوۆ جاتتىقتىراتىن ەلىمىزدىڭ باس كومانداسى الداعى جارىستارعا قاتىسۋ ءۇشىن وقۋ-جاتتىعۋ جيىندارىن ودان ءارى جالعاستىراتىن بولادى. وسى ورايدا قازاقستان بوكس فەدەراتسياسىنىڭ باسشىسى تيمۋر ق ۇلىباەۆتىڭ قازىر ۇلتتىق قۇرامانىڭ ءىرى حالىقارالىق تۋرنيرلەر مەن جارىستارعا جاقسى دايىندىقپەن بارۋلارىنا زور كوڭىل ءبولىپ وتىرعانىن اتاپ وتسەك ارتىق بولماس. قۇرامانىڭ باس باپكەرىنىڭ ايتۋىنشا, بوكس فەدەراتسياسىنىڭ تىزگىنىن تيمۋر ق ۇلىباەۆ ۇستاعالى بەرى ەلىمىزدىڭ بارلىق وڭىرلەرىندە سپورتتىڭ وسى ءتۇرىن دامىتۋدا جاڭا جوبالار ىسكە قوسىلىپ, ۇلتتىق جانە جاستار قۇراماسىنىڭ دايىندىعى ءۇشىن بارلىق جاعداي جاسالىپ وتىر.
تاعى ءبىر اتاپ وتەتىن نارسە, 9-14 مامىر ارالىعىندا الماتىدا كەڭەس وداعىنىڭ باتىرى, ارميا گەنەرالى, حالىق قاھارمانى ساعادات نۇرماعامبەتوۆتىڭ جۇلدەسى ءۇشىن وتكەن XV حالىقارالىق تۋرنيردە قازاق بوكسشىلارى 11 سالماقتىڭ بارىندە جۇلدە الدى. بۇدان باسقا, الماتىداعى ايقاسقا قاتىسۋ ءۇشىن قىتاي, قىرعىزستان, موڭعوليا, تاجىكستان, تۇركىمەنستان, ءوزبەكستان مەن ۋكراينا قۇرامالارى جينالعان باسەكەدە وتانداستارىمىز 8 كۇمىس جانە 11 سالماقتىڭ بارىندە قولا مەدالدى يەلەندى. مۇندا 91 كيلودان جوعارى سالماقتا شارشى الاڭعا كوتەرىلگەن ءرۇستەم ىرگەباەۆتىڭ دا كۇمىس جۇلدەنى ەنشىلەگەنىن اتاپ وتۋگە بولادى.