قورعانىس ءمينيسترىنىڭ ورىنباسارى دارحان احمەديەۆ ورتالىق كوممۋنيكاتسيالار قىزمەتىندە وتكەن بريفينگىدە جىل اياعىنا دەيىن اسكەري بولىمدەردىڭ قويمالارى اۆتوماتتاندىرىلعان ەسەپ فورماتىنا كوشەتىنىن ءمالىم ەتتى, دەپ حابارلايدى Egemen.kz.
«كەيىنگى 11 جىلدىڭ ىشىندە قارۋلى كۇشتەردى جابدىقتاۋ ءىسى نەگە ەلەكتروندى فورماتقا اۋىستىرىلمادى؟ سوندا اسكەري بولىمدەردەگى سىبايلاس جەمقورلىق ماسەلەلەرىنىڭ جولى كەسىلەر ەدى عوي», دەپ سۇرادى باق وكىلى ۆيتسە-مينيستردەن.
دارحان احمەديەۆتىڭ ايتۋىنشا, اتالعان ماقساتقا بيۋدجەتتەن ءبىرشاما قاراجات بولىنگەن.
«بۇل ماقساتقا بەلگىلى ءبىر مولشەردە قاراجات ءبولىندى. بىراق سونىڭ 37 پايىزى عانا يگەرىلدى. ال قالعانى بيۋدجەتكە قايتارىلىپ وتىرعان. وكىنىشكە قاراي, قازىر بۇل باعىتتاعى بۇكىل جۇمىس جارتىلاي قولمەن ىستەلەدى. ءمينيستردىڭ ماعان بەرگەن ءبىرىنشى تاپسىرماسى – قويما ەسەبىن اۆتوماتتاندىرۋ. ءبىز قازىر وسى باعىتتا جۇمىس ىستەپ جاتىرمىز. جىل اياعىنا دەيىن اياقتايمىز», دەدى ءمينيستردىڭ ورىنباسارى.
ونىڭ مالىمەتى بويىنشا, بيىل قارۋلى كۇشتەردە 7 سۋيتسيد ارەكەتى تىركەلىپ, تورتەۋى قايعىلى اياقتالعان.
«بيىلعى 5 ايدىڭ ىشىندە قازاقستاندا 4318 سۋيتسيد ارەكەتى ولىممەن اياقتالعان. سونىڭ ىشىندە تورتەۋى قارۋلى كۇشتەردە بولعان. سۋيتسيد ارەكەتتەرى – 4942. ونىڭ ىشىندە قارۋلى كۇشتەردەگىسى – 7. ياعني بۇل 0,6 پايىزى. بۇل جەردە مەن وسى سانداردىڭ ارتىنا جاسىرايىن دەپ تۇرعان جوقپىن, دۇرىس تۇسىنىڭىزدەر. جاڭا دا ايتقانىمداي, ارنايى توپ قۇرىلدى. سول توپ سۋيتسيد دەرەكتەرىن ازايتۋ بويىنشا جۇمىس جۇرگىزىپ جاتىر», دەدى دارحان احمەديەۆ.