وسىدان شامالى ۋاقىت بۇرىن زايسان قالاسىندا ەلەۋلى وقيعا بولدى. جازۋشى, جۋرناليست اسقار ءسابيتوۆتىڭ (مارقۇم) ۇيىمداستىرۋىمەن جارىق كورگەن «زايساننىڭ جايساڭ بالۋاندارى» اتتى كىتاپتىڭ تۇساۋكەسەرىنە الماتى مەن ەلوردادان, ەلىمىزدىڭ باسقا ەلدى مەكەندەرىنەن كەزىندە بوز كىلەمدە جاسىن ويناتقان بۋرا سان, بوتا تىرسەك بالۋاندار جينالىپ, جەرلەستەرىمەن جۇزدەستى. ولار ءۇش كۇن بويى كۇرەسپەن شۇعىلدانىپ جۇرگەن بالالاردىڭ ونەرىن تاماشالادى, وزدەرى دە بوز كىلەمدە ونەر كورسەتتى.
جاس ۇرپاققا ۇلگى-ونەگە, ءتالىمى مول كەزدەسۋ تۋرالى ايتا كەتكەن ورىندى.
– «زايساننىڭ جايساڭ بالۋاندارى» رەسپۋبليكالىق ۇيىمىن قۇرۋداعى ماقسات», – دەدى وسى ءىس-شارانى ۇيىمداستىرۋشىلاردىڭ ءبىرى, ۇيىم توراعاسى ەركىن ۋانباەۆ, – زايسان اۋدانىنىڭ جاس بالۋاندارىنىڭ سپورتتا, ومىردە جوعارى جەتىستىكتەرگە جەتۋىنە كومەكتەسۋ, بالۋاندىق ونەردى وسكەلەڭ ۇرپاققا, حالىققا ناسيحاتتاۋ, بولاشاعى بار اۋدان جاستارىن قولدايتىن قور ۇيىمداستىرۋ, اۋدانداعى ورتا مەكتەپتە وقيتىن بالالاردى كۇرەس تۇرلەرىنە تارتۋ, تاعىسىن تاعىلار.
اۋدان حالقى شالعايدان ات ارىتىپ كەلگەن اتاقتى جەرلەستەرىن ساعىنىپ قالىپتى. اتاقتى بالۋان, ەڭبەك سىڭىرگەن جاتتىقتىرۋشى, وسكەمەن قالاسى مەن زايسان اۋدانىنىڭ قۇرمەتتى ازاماتى, وليمپيادا جۇلدەگەرى مەن الەم چەمپيوندارىن باپتاعان بىلىكتى باپكەر ءجانادىل اتاەۆ, ەسىمدەرى ەلگە بەلگىلى جەڭىس سماعۇلوۆ, ەركىن ەلەۋباەۆ, مارات ساۋحاتوۆ, قادىلبەك سماعۇلوۆ, كەنجەبەك راحيموۆ, تاعى باسقالار ءوز اسەرلەرىمەن ءبولىستى. ولار قالادا بىرنەشە كەزدەسۋ وتكىزدى. بالعىن بالۋانداردىڭ جارىسىن تاماشالادى. رەسپۋبليكالىق ۇيىم قورىندا زايسان اۋدانىندا تۋىپ-ءوسىپ ەلىمىزدىڭ وزگە وڭىرلەرىندە ءتيىمدى جۇمىس ىستەپ جۇرگەن كاسىپكەرلەر مەن بالۋانداردىڭ جيناعان قارجىسىنا دزيۋدو كۇرەسىنەن رەسپۋبليكالىق, ەركىن كۇرەستەن وبلىستىق تۋرنير وتكىزىلدى. زايسان سپورت مەكتەبىنە جارىستاردى جوعارى دەڭگەيدە تۇسىرۋگە قاجەت 2 بەينەكامەرا مەن تەلەۆيزور سىيعا تارتىلدى. وسكەمەندە وقىپ ءجۇرىپ, جارىس كەزىندە جاراقات العان زايساندىق ەركىن ابدىرامانوۆقا قوماقتى قارجىلاي كومەك كورسەتىلدى. ومىردەن وتكەن بالۋاندار ەسكە الىنىپ, 300 ادامعا اس بەرىلدى. سونداي-اق رەسپۋبليكالىق ۇيىمنىڭ ۇيىمداستىرۋىمەن قازاق كۇرەسىنەن جاۋىرىنى جەرگە تيمەگەن تولەگەن ەرجان ۇلىنىڭ تۋعانىنا 100 جىل تولۋىنا وراي وبلىستىق ەسكە الۋ ءتۋرنيرى وتكىزىلدى. ءۇش كۇنگە سوزىلعان سپورتتىق, الەۋمەتتىك-مادەني ءىس-شارالاردىڭ باسى-قاسىندا بولعان, ۇيىمداستىرىلۋىنا قولايلى جاعداي جاساعان زايسان اۋدانىنىڭ بۇرىنعى سپورت ءبولىمىن باسقارعان تاجىريبەلى باسشى زاينولدا راحيمباەۆتىڭ, وبلىسقا بەلگىلى كاسىپكەر بالۋان, قورعا 1 ميلليون تەڭگەدەن استام قارجى قۇيعان قۋات ابجانوۆ پەن جارتى ميلليون تەڭگە قۇيعان ايزات سيىرباەۆتىڭ ەڭبەكتەرىن اتاپ وتكەن ورىندى. جەڭىمپازداردى, وسى جۇمىستارعا بەلسەنە اتسالىسقانداردى اۋدان اكىمى سەرىك زاينۋلدين, «زايساننىڭ جايساڭ بالۋاندارى» رەسپۋبليكالىق ۇيىمىنىڭ توراعاسى ەركىن ۋانباەۆ قۇتتىقتاپ, وسى ءىس-شاراعا ارنايى جاساتىلعان ەستەلىك مەدال تاپسىردى.
تاعىلىمى مول بۇل كىتاپتا اۋدان سپورتىنىڭ وركەندەۋىنە ەرەكشە ۇلەس قوسقان ازاماتتار مەن ازاماتشالار تۋرالى قىزىقتى ماقالالار بار. ال جان-جاقتان كەلگەن قۇرمەتتى قوناقتار ءۇش كۇنگە سوزىلعان سپورتتىق, مادەني ءىس-شارالاردان شابىت الىپ, اسەرلەنىپ قايتتى.
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
شىعىس قازاقستان وبلىسى,
زايسان اۋدانى