جەلىدە بالقاش كولىندە ءىرى كولەمدە بالىقتاردىڭ قىرىلۋى تۋرالى بەينەجازبا جاريالاندى. اتالعان فاكتىگە قاتىستى ەكولوگيا, گەولوگيا جانە تابيعي رەسۋرستار مينيسترلىگى رەسمي اقپارات بەردى, دەپ حابارلايدى Egemen.kz.
«2022 جىلعى 27 شىلدەدە Instagram جەلىسىندە جەتىسۋ وبلىسى, قاراتال اۋدانى, كوپبىرلىك اۋىلى ماڭىنداعى قاراتال وزەنىنە قۇيا بەرىستەگى بالقاش كولىندە بالىقتاردىڭ ءىرى كولەمدە قىرىلۋى تۋرالى بەينەجازبا جاريالاندى», دەلىنگەن حابارلامادا.
اتالعان فاكت تۋرالى جۇمىس توبىنا حابارلانعان.
«بۇگىن اتالعان فاكتىنى تەكسەرىپ, زەرتتەۋ ماقساتىندا بالقاش-الاكول وبلىسارالىق باسسەيندىك بالىق شارۋاشىلىعى ينسپەكتسياسىنىڭ, الماتى وبلىسىنىڭ مامانداندىرىلعان تابيعات قورعاۋ پروكۋراتۋراسىنىڭ, الماتى وبلىسى پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ تابيعاتتى قورعاۋ جونىندەگى جەدەل قىزمەتىنىڭ جانە الماتى وبلىسى ەكولوگيا دەپارتامەنتىنىڭ وكىلدەرىنەن تۇراتىن جۇمىس توبى بالىقتار قىرىلعان جەرگە باردى», دەلىنگەن حابارلامادا.
ەكولوگيا مينيسترلىگى ۇسىنعان مالىمەتكە سايكەس, راستالماعان اقپارات بويىنشا بالىقتاردى بەلگىسىز بىرەۋلەر زاڭسىز اۋلاعان. كەيىن وتكىزۋدىڭ مۇمكىن ەمەستىگىنەن جانە كۇننىڭ ىستىعىنان تەز بۇزىلۋىنا بايلانىستى ولاردى سۋعا تاستاي سالعان.
«ولگەن بالىقتاردىڭ سانىنا قاتىستى تولىق اقپارات جۇمىس توبى مۇشەلەرىنىڭ زەرتتەۋ قورىتىندىسىنا سايكەس قوسىمشا حابارلانادى», دەپ تولىقتىردى ۆەدومستۆو.