قر بۇرىنعى دەنساۋلىق ساقتاۋ ۆيتسە-ءمينيسترى ولجاس ابىشەۆ سوتتا تەرگەۋ كەزىندە وعان مورالدىق قىسىم كورسەتىلگەنىن ءمالىم ەتتى, دەپ حابارلايدى Egemen.kz.
ولجاس ابىشەۆ باس پروكۋراتۋراعا قارجى مونيتورينگى اگەنتتىگىنىڭ قىزمەتكەرلەرىنە قاتىستى 4 شاعىم تۇسىرگەن.
ول بۇل جايىندا بۇگىن ءوتىپ جاتقان بۇرىنعى دەنساۋلىق ساقتاۋ ءمينيسترى ەلجان بىرتانوۆقا قاتىستى سوت وتىرىسىندا ايتتى. بۇل ىستە ولجاس ابىشەۆ تە ايىپتالۋشى رەتىندە جاۋاپ بەرىپ جاتىر.
ونىڭ مالىمدەۋىنشە, اتالعان اگەنتتىك قىزمەتكەرلەرى وعان جانە وتباسىنا قاۋىپ توندىرگەن.
سونداي-اق, و. ابىشەۆ پروكۋراتۋراعا جولدانعان بىرنەشە ءوتىنىشتىڭ ءالى كۇنگە دەيىن ەلەنبەي, قاراۋسىز قالعانىن ايتىپ وتىر.
«2020 جىلدىڭ تامىزىندا قارجى مونيتورينگى اگەنتتىگىنىڭ قىزمەتكەرى ماعان بىرنەشە رەت مورالدىق جانە فيزيكالىق قىسىم كورسەتتى. ول تەرگەۋ يزولياتورىنا كەلىپ, وسى مەكەمە ورىنباسارىنىڭ كابينەتىندە 3 ساعات بويى ماعان قىسىم جاسادى», دەدى سوتتا ولجاس ابىشەۆ.
ودان بولەك, ەكس ۆيتسە-ءمينيستردىڭ ايتۋىنشا, اگەنتتىك قىزمەتكەرى 12 جىلعا باس بوستاندىعىنان ايىرۋ قاۋپى ءتونىپ تۇرعانىن ايتىپ قورقىتقان. ەگەر ايىپتى قۇقىق قورعاۋ ورگاندارىمەن ىنتىماقتاستىق تانىتسا, وعان جۇمساق جازا بولاتىنىنا ۋادە بەرگەن.
سوت بارىسىندا سۋديا ابىشەۆتەن قىسىمنىڭ ناقتى قالاي جاسالعانىن سۇرادى.
ءوز كەزەگىندە ايىپتالۋشى ءبىر تەرگەۋ يزولياتورى كامەراسىنان ەكىنشىسىنە ءجيى اۋىستىرعانىن ايتىپ, اۋىر قىلمىس جاساعان كۇدىكتىلەرمەن بىرگە وتىرعىزعانىن دالەلگە كەلتىردى.
«قارجى مونيتورينگى اگەنتتىگى مەن باس پروكۋراتۋرانىڭ ماعان تاققان ايىبىن جەدەلدەتۋ ماقساتىندا توسەگىمنىڭ استىنا ەسىرتكى تاستاۋ, sim-كارتا سالىپ جىبەرۋ, ياعني تىيىم سالىنعان زاتتاردى تىقپالاۋعا تالپىنىس جاسالدى», دەدى بۇرىنعى دەنساۋلىق ساقتاۋ ۆيتسە-ءمينيسترى.
ەسكە سالا كەتەيىك, بۇرىنعى دەنساۋلىق ساقتاۋ ۆيتسە-ءمينيسترى ولجاس ابىشەۆ 2020 جىلى 2 تامىزدا قاماۋعا الىندى.
وعان مەملەكەتتىك بيۋدجەت قاراجاتىن جىمقىردى دەگەن ايىپ تاعىلدى.