كەشە ماسكەۋدە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ ەۋرازيالىق ەكونوميكالىق كوميسسيا (ەەك) كەڭەسىنىڭ وتىرىسىنا قاتىستى, دەپ حابارلادى پرەمەر-ءمينيستردىڭ ءباسپاسوز قىزمەتى.
ەرتەڭ مينسكىدە قازاقستان, رەسەي جانە بەلارۋس پرەزيدەنتتەرىنىڭ قاتىسۋىمەن وتەتىن جوعارعى ەۋرازيالىق ەكونوميكالىق كەڭەس وتىرىسى قارساڭىندا, ەەك كەڭەسى كەدەن وداعى مەن ءبىرتۇتاس ەكونوميكالىق كەڭىستىكتى ودان ءارى دامىتۋدىڭ مەيلىنشە كوكەيكەستى ماسەلەلەرىن قارادى.
تاراپتار ەۋرازيالىق ەكونوميكالىق وداق تۋرالى كەلىسىم جوباسى, سونداي-اق مەملەكەتتەردىڭ ءوزارا ءتيىمدى مۇددەلەرىن قاناعاتتاندىرۋعا جانە ينتەگراتسيانى ودان ءارى دامىتۋعا باعىتتالعان جوبالاردى جاساۋ بارىسىنداعى ارىپتەس ەلدەرمەن بىرلەسكەن جۇمىستاردىڭ نەگىزگى اسپەكتىلەرىن تالقىلادى.
بەك كەڭەسى باسەكەلەستىكتى دامىتۋ, مۇناي مەن مۇناي ونىمدەرىن الىپ ءوتۋ, گاز جانە اۆتوكولىك تاسىمالى, تەمىرجول تاريفتەرىن قولدانۋ مەن اۋىل شارۋاشىلىعىن مەملەكەتتىك قولداۋ سالالارىنداعى ءوزارا ءىس-قيمىل پەرسپەكتيۆالارىن انىقتادى.
ونەركاسىپتىك, اگروونەركاسىپتىك, ۆاليۋتالىق سالالاردى, قارجى رىنوكتارىن قامتيتىن, ەكونوميكانىڭ نەگىزگى سەكتورلارى بويىنشا بۇل سالالاردى ءوزارا ءتيىمدى دامىتۋ جونىندەگى ورتاق تۇسىنىستىككە قول جەتكىزىلدى.
وتىرىس قورىتىندىسى بويىنشا كەدەن وداعىنداعى سىرتقى ەكونوميكالىق قىزمەتتەر شارتتارىن ىقشامداۋ جانە جەتىلدىرۋ, اتاپ ايتقاندا, «ءبىر تەرەزە» جۇيەسىن ەنگىزۋ جونىندەگى ودان ارعى ءوزارا ءىس-قيمىل تۋرالى شەشىم قابىلداندى.
تاراپتار ەكونوميكالىق ينتەگراتسيانى دامىتۋ باعىتىنداعى بىرلەسكەن جۇمىستىڭ جوعارعى ىنتىماقتاستىق دەڭگەيىنىڭ جانە تەڭ قۇقىقتى قارىم-قاتىناس الەۋەتىن ءتيىمدى پايدالانۋعا پەيىل ەكەندىكتەرىنىڭ جارقىن كورىنىسى بولىپ تابىلاتىنىن اتاپ كورسەتتى.