بۇگىندە يننوۆاتسيالىق دامۋ بارلىق سالادا تاڭسىق ەمەس دۇنيەگە اينالعالى قاشان. ال وسى يننوۆاتسيانىڭ عىلىممەن بايلانىسى اسا ءتۇسىندىرۋدى قاجەت ەتپەسە كەرەك-ءتى. سەبەبى, يننوۆاتسيا جاڭا, جاڭارۋ سوزدەرىنىڭ ۇعىمىن بەرەدى. ولاي بولسا ءسوز ەتكەن عىلىم دا جاڭارىپ, جەتىلىپ وتىراتىن سالا. مىنە, وسىنى نەگىزگە العان استانا قالاسىنداعى ىرگەلى وقۋ ورىندارىنىڭ ءبىرى «تۇران-استانا» ۋنيۆەرسيتەتى جۋىردا «عىلىمي-يننوۆاتسيالىق دامۋ – جوعارى ءبىلىمدى جەتىلدىرۋ فاكتورى» اتتى حالىقارالىق عىلىمي-ادىستەمەلىك كونفەرەنتسيا وتكىزدى.
كونفەرەنتسيا قازاقستان جوعارى وقۋ ورىندارىن اككرەديتتەۋدىڭ جانە اكادەميالىق سارالاۋدىڭ ادىسنامالىق نەگىزى, پانارالىق بايلانىستاردى كىرىكتىرۋ جاعدايىندا بولاشاق مامانداردىڭ كاسىبي قۇزىرەتتىلىگىن قالىپتاستىرۋ, قازىرگى كەزەڭدە مامانداردى دايارلاۋداعى اقپاراتتىق-كوممۋنيكاتسيالىق تەحنولوگيالار, قازاقستان ەكونوميكاسىنىڭ يننوۆاتسيالىق-يندۋستريالىق دامۋىن ەسەپكە الا وتىرىپ, مودۋلدىك ءبىلىم باعدارلامالارىن قۇرۋ ماسەلەلەرىن قامتىدى.
پروفەسسور دجەم تانوۆا (سولتۇستىك كيپردەن), رەسەيلىك عالىم ۆاسيلي چەكمارەۆ, قىتاي حالىق رەسپۋبليكاسىنان نۇرباي ءابدىساليح, ەستونيادان كەلگەن پروفەسسور حانون بارابانەر, ازەربايجاندىق عالىم ورحان حاسانوگلۋ جانە شۆەيتساريا مەن بىزگە كورشى ەلدەردەن كەلگەن باسقا دا كوپتەگەن وقىمىستىلار ءسوز الىپ, اقپاراتتىق تەحنولوگيالار جەدەل دامىپ كەلە جاتقان قازىرگى زاماندا ءبىلىم بەرۋدىڭ جاڭا جولدارى قالىپتاسقاندىعىن اتاپ ءوتتى.
عالىمداردىڭ ايتۋىنشا, قازىرگى كۇنى عىلىمي-يننوۆاتسيالىق دامۋ ماسەلەسى بۇكىل الەم بويىنشا اسا وزەكتى بولا تۇسۋدە. جاڭالىقتار كۇن سايىن اشىلا باستادى. مىنە, وسىنداي جاعدايدا ءبىلىم بەرۋ ءىسىنىڭ زامان تالابىنا ساي جەدەل دامۋىنىڭ ءوزى وڭاي ەمەس. وقىتۋشى عالىمدار وسى ماسەلەنى جان-جاقتى تالقىلادى.
نۇرلان مانسۇروۆ.
استانا.