بۇل ءوڭىر جايلى ءسوز قوزعالا قالعاندا كەلەشەگىنە الاڭداۋشىلىق, الىپقاشپا اڭگىمە الدان شىعاتىنى بار. كەن قورى ازايدى, ءوندىرىس اۋقىمى تارىلىپ بارادى, جۇمىس تابۋ قيىندادى دەلىنەدى. بەلگىسىز ەمەس جايت. جەزقازعان مىس قورىتۋ زاۋىتىنىڭ گيدرومەتاللۋرگيالىق تەحنولوگياعا كوشۋىنە بايلانىستى قۋات ارتتىرۋعا توقتاتىلۋى, ساتباەۆتاعى بايىتۋ فابريكاسىنىڭ قايتا جاڭعىرتۋعا قويىلۋى ونەركاسىپ ءونىمىن, ينۆەستيتسيا كورسەتكىشىن تومەندەتكەنى راس. راس بولعاندا, نەگىزگى تىرەك سانالاتىن ەكى كاسىپورىن جۇمىسىنداعى ۋاقىتشا ىركىلىس بۇل. جاعداي مۇلدەم سونداي كۇيدە قالماق ەمەس.
الداعى جىلداردا قايتا جاندانىس بىتەتىن وسىناۋ قوس ءوندىرىس ورلەۋ وزەگى بولعالى تۇرسا, جەزقازعان, ساتباەۆ قالالارىن جانە ۇلىتاۋ اۋدانىن ەكونوميكالىق-الەۋمەتتىك دامىتۋدىڭ 2012-2020 جىلدارعا ارنالعان كەشەندى جوسپارىن جۇزەگە اسىرۋ ايماق ومىرىنە ودان سايىن ۇلكەن جاڭعىرۋ جاساتادى. مۇنىمەن بىرگە, ەكى جاقتان تارتىلۋداعى جەزقازعان – سەكسەۋىل, شۇباركول – ارقالىق تەمىرجولى وزگەرىستەرگە باستاپ جاتىر. مىنە, قىسقا قايىرىپ ايتقاندا, مىستى ولكە بولاشاعىنا الاڭدايتىن ەشتەڭە جوقتىعى وسى جايلاردان بايقالادى ەمەس پە.
ال بۇل باعىتتاعى ىستەر وبلىستىڭ باستى نازارىندا ەكەنىن كوپشىلىك بىلۋگە ءتيىس. ەلباسىنىڭ تاپسىرماسى بويىنشا ايماقتى دامىتۋ باعدارلاماسى ناقتىلانىپ, قوسىمشا شارالارمەن تولىقتىرىلىپ, تىڭعىلىقتى اتقارىلۋىنا تالاپ كۇشەيىپ وتىر. سوندىقتان جەزقازعاندا ءجيى بولاتىن وبلىس اكىمى باۋىرجان ابدىشەۆ كەزەكتى ساپارىندا جاعدايمەن تاعى ءبىر تىكەلەي تانىسىپ, ۇلكەن مىندەتتەر قويدى. اتاپ ايتقاندا, مينەرالدىق-شيكىزاتتىق بازانى كەڭەيتۋ, يندۋستريالىق-يننوۆاتسيالىق دامۋدى قامتاماسىز ەتۋ, كوممۋنالدىق جانە الەۋمەتتىك ينفراقۇرىلىمدى جەتىلدىرۋ باعىتىنداعى 80 شارانى قامتيتىن اتالعان اۋقىمدى جوسپارعا بولىنگەن 350 ملرد. تەڭگە ءبىر تيىنى شاشاۋ ەتىلمەي ءارى بەلگىلەنگەن مەرزىمدەرىنە سايكەس يگەرىلۋى قاجەت. ءوڭىردىڭ وندىرىستىك الەۋەتىن كوتەرۋگە مۇمكىندىك بەرەتىن جەزدىدە مارگانەتس, قياقتىدا قوڭىر كومىر ءوندىرۋ, سارىوبا, يتاۋىز, جومارت كەنىشتەرىنەن كەن الۋ كولەمىن ارتتىرۋ, تەحنوگەندىك قالدىقتاردى وڭدەۋ, قۇرامى باي جاڭا كەن كوزدەرىن تاۋىپ, يگەرۋ جولعا قويىلادى.
بۇل ءبىر دەسەك, سونداي-اق, ۇلىتاۋ اۋدانىنىڭ قارساقباي, بايقوڭىر, كۇمكول تارابىن باسىپ وتەتىن جاڭا تەمىرجول بويىندا 5 ستانسا, 12 رازەزد بوي كوتەرەتىندىگى الىستاعى ەل ىشىنە قۋانىشتى وقيعا بولعالى تۇر. وڭ قۇبىلىستىڭ باسى تامىرىن جايا باستادى. مۇنىمەن بىرگە, جاڭارتىلىپ جاتقان جەزقازعان – قىزىلوردا, ۇلىتاۋ – ارقالىق اۆتوجولدارى بولىكتەرى دە كۇرە جولداردان بۇرىستاۋ ايماقتىڭ وڭىرلەرمەن بايلانىسىن كەڭەيتەدى. اتالعان كەشەندى جوسپار اياسىندا ءوندىرىس ورىندارىن اشۋعا, شاعىن جانە ورتا بيزنەستى قولداۋعا, ەكونوميكانى ارتاراپتاندىرۋعا ارنالعان ءىس-شارالار ءوڭىردىڭ تىنىسىنا تىڭ سەرپىن بەرە باستاعانى كۇننەن-كۇنگە بايقالىپ كەلەدى. جۇمىسقا قامتىلماق 10 مىڭ ادامنىڭ الدى جاپاندى دۇبىرلەتكەن ەڭبەككە ارالاستى.
سەگىز جىلعا بەلگىلەنگەن باعدارلامانىڭ ارقانىڭ كەڭگە سالىنباي, كەزەڭ-كەزەڭىمەن تىندىرىمدى اتقارىلۋىنا تالاپ بيىكتەي بەرەتىن بولادى. جاۋاپكەرشىلىكتىڭ ورتاق ەكەنى جيىندا باسا ايتىلىپ, كوتەرىلگەن بارلىق ماسەلەلەر بويىنشا ناقتى تاپسىرمالار بەرىلدى.
ايقىن نەسىپباي,
«ەگەمەن قازاقستان».
جەزقازعان.