استانا. 28 ءساۋىر. قازىرگى تاڭدا الەمنىڭ 111 مەملەكەتى قازاقستاندىق كاسىپورىندار شىعارعان دايىن ونىمدەردى ساتىپ الۋدا. بۇگىن م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ەۋرازيالىق ىقپالداستىق تاقىرىبىنداعى ءدارىسى بارىسىندا قازاقستان پرەزيدەنتى نۇرسۇلتان نازارباەۆ وسىلاي ءمالىم ەتتى. بۇل تۋرالى «قازاقپارات» حابارلادى.
«ءبىز قاشاندا «شيكىزاتتى مەملەكەت» بولعان ەدىك. بۇل تۇرعىدان رەسەيمەن ۇقساس ەلمىز. سوندىقتان دا, ەكونوميكانىڭ نەگىزگى باسىمدىعىن ەكسپورتقا بۇرۋدى قولعا الدىق. ناتيجەسىندە ەلىمىزدە بۇرىن شىعارىلماعان 250 ءونىم ءتۇرى پايدا بولدى, ال قازىرگى تاڭدا الەمنىڭ 111 مەملەكەتى قازاقستاندىق كاسىپورىندار شىعارعان دايىن ونىمدەردى ساتىپ الۋدا», - دەدى نۇرسۇلتان نازارباەۆ.
سونىمەن قاتار ەلباسى قازاقستان تمد كەڭىستىگىندە العاشقى بولىپ «جاسىل» ەكونوميكانى دامىتۋ ستراتەگياسىن قابىلداعانىن جەتكىزدى.
«2017 جىلى «ەكسپو-2017» حالىقارالىق كورمەسى وتەدى. ونىڭ باستى تاقىرىبى - «جاسىل» ەكونوميكانى دامىتۋ. وسىعان وراي ءبىزدىڭ عالىمدارىمىز بىرلەسە جۇمىس ىستەپ, بۇكىل الەمگە وسى باعىتتاعى جوبالاردى پاش ەتۋلەرىنە دە بولاتىن ەدى», - دەدى مەملەكەت باسشىسى.
سونداي-اق پرەزيدەنت بۇگىنگى تاڭدا ەلىمىزدە بۇعان دەيىن بولماعان ەكونوميكانىڭ جاڭا نەگىزدەرى قالىپتاسىپ جاتقانىن دا اتاپ ءوتتى. ونىڭ ىشىندە اۆتوموبيل سالاسى, اۆياقۇرىلىس, تەپلوۆوزدار مەن تەمىرجول كولىگىن شىعارۋ, جەر سەرىگىن دامىتۋ سەكىلدى سالالار بار.
«اۋىل شارۋاشىلىعى سالاسى دا ازىق-ت ۇلىك ءوندىرىسىنىڭ وڭىرلىك ورتالىعى رەتىندە جەدەل دامىپ كەلە جاتىر. قازاقستان بۇعان دەيىن 10-12 ملن. توننا استىقتى ەكسپورتتاپ كورمەگەن ەدى», - دەدى مەملەكەت باسشىسى.
قۇرىش نۇرىمبەت.
دەرەككوز: «قازاقپارات».
فوتو: www.socio.msu.ru.