جاقىندا قازاقستان پارلامەنتى سەناتىنىڭ دەپۋتاتى, قازاقستان جازۋشىلار وداعىنىڭ توراعاسى نۇرلان ورازالين تۇركپا الەۋمەتتىك, مادەني جانە گۋمانيتارلىق ماسەلەلەر كوميسسياسىنىڭ بىشكەكتە وتكەن 3-ءشى وتىرىسىنا قاتىستى, دەپ حابارلادى سەناتتىڭ ءباسپاسوز قىزمەتى.
شارا تۇركى تىلدەرىن دامىتۋ ماسەلەلەرىنە ارنالدى. وتىرىس بارىسىندا تۇركى تىلدەرىنىڭ قازىرگى كەزدەگى جاعدايى مەن ونىڭ قولدانىس اياسىن كەڭەيتۋ ماسەلەلەرى جان-جاقتى تالقىلاندى. كەڭەستە ءسوز العان سەناتور ن.ورازالين تۇركى حالىقتارى تاريحىنىڭ تامىرلاستىعى جانە تىلدەرى تۋىس ەكەنى جايىندا ايتا كەلىپ, قازىرگى كەزدە تۇركى تىلدەرىن وزىق عىلىم مەن ءبىلىم جانە مادەنيەت تىلدەرىنە اينالدىرۋ قاجەتتىگىنە نازار اۋداردى.
پىكىرسايىس بارىسىندا جوعارى وقۋ ورىندارىندا تۇركى تىلدەرىنىڭ بىرىنەن ەكىنشىسىنە كاسىبي دەڭگەيدە ءتارجىمالاي الاتىن اۋدارماشىلار دايىنداۋ ماسەلەلەرى دە كوتەرىلدى.
وتىرىس قورىتىندىسى بويىنشا تۇركى تىلدەس مەملەكەتتەردىڭ باسقا حالىقارالىق ۇيىمدار اياسىنداعى ءوزارا ءىس-قيمىلىنا قاتىستى ۇسىنىستار قابىلداندى.