رەسەي پرەزيدەنتى دميتري مەدۆەدەۆ ەكى كۇندىك ساپارمەن ۋكراينادا بولدى. ەكى ەلدىڭ اراسىن جاقىنداتاتىن تالاي اڭگىمەلەر ايتىلدى, تالاي قۇجاتتارعا قول قويىلدى. وسىنىڭ ءبارى ءبىراز ۋاقىت وكپەلەسكەن اعايىنداردىڭ قايتا تابىسقانىنداي كورىنەدى.
اعايىن ارالاسپاسا جات بولادى
جاسىرماي ايتساق, سوڭعى بەس-التى جىلدا رەسەي مەن ۋكراينا اراسى قاتتى شيەلەنىستى. تاريحى, گەنەتيكالىق تۋىستىعى جاعىنان دا ءبىر-بىرىنە ەڭ جاقىن ەكى حالىق وكپەلەستى. ەكى ادام وكپەلەسسە, ايىپ ەكى جاقتان دەيتىنىمىز بار. بىرەۋى اقىلدى بولسا, ەكىنشىسىن وكپەگە جىبەرمەس ەدى, ءتىل تابىسار ەدى دەيمىز. قالاي دەسەك تە, ورىستار مەن ۋكراينداردىڭ, جاعا جىرتىسپاعانمەن, ءبىر-بىرىنە تەرىس قاراعانى شىندىق.
وعان كىم كىنالى دەگەندە, بىرەۋلەر تاريحقا ۇڭىلەدى, ەندى بىرەۋلەر ەكى ەل باسشىلارىن نۇسقايدى, سونداي-اق ساياساتتان سىرتتاۋ بۇقارا حالىقتىڭ اراسىندا دا ءبىرىن-ءبىرى عايباتتاپ ايتاتىن ءسوزدى قۇلاق ەستىگەن. سونىڭ ءبارى ءبىر-بىرىمەن ساباقتاس ەكەنىن ايتقان ءجون. تاريحتا اعا حالىقتىڭ كىشىسىنە تىزەسى باتقانى بار. سودان شەمەن بولىپ قاتىپ قالعان وكپەنى جىبىتەر ارەكەت بولماسا, ونىڭ ءار كەز قايتا قوزۋى دا زاڭدىلىق. ارينە, وسى جەردە حالىققا جول سىلتەر باسشىلارعا كوپ نارسە بايلانىستى.
بۇل جەردە بۇرىس, دۇرىس دەگەندە, ەڭ الدىمەن اعايىن حالىقتاردىڭ ارقاشان ءبىر-بىرىمەن جاقىنداسقانىن, سوعان جاعداي جاسالعانىن ءجون سانايسىڭ. سوڭعى ۋاقىتتا ەكى ەل باسشىلارىنىڭ ءتىل تابىسا الماعانى حالىقتاردىڭ اراسىن اشتى, ەكى ەل اراسىنداعى بايلانىستا كەلەڭسىز جاعداي قالىپتاستىردى.
ۋكراينادا سايلاۋ ءوتىپ, بيلىككە جاڭا ادام كەلگەن سوڭ, جاعداي ايتارلىقتاي وزگەردى. ۆيكتور يانۋكوۆيچ العاشقى كۇننەن رەسەيمەن قارىم-قاتىناستى قالپىنا كەلتىرۋگە كۇش سالاتىنىن اڭعارتتى. ونى قۇپ العاندار دا, قارسى بولعاندار دا بار. بۇرىنعى بيلىك وكىلدەرى رەسەيمەن قارىم-قاتىناستى جاقسارتۋدى اعا حالىقتىڭ الدىندا باس يۋ, تاۋەلسىزدىككە نۇقسان كەلتىرۋ دەپ كورسەتكىسى كەلەدى.
ارينە, اڭگىمە ەكى ەل اراسىنداعى قارىم-قاتىناستى قالاي تۇسىنۋگە بارىپ تىرەلەدى. ءماسكەۋمەن بايلانىستى جاقسارتۋ استە دە كيەۆ ءۇشىن ونىڭ الدىندا باس يۋ, تاۋەلسىزدىككە نۇقسان كەلتىرۋ ەمەس. ەلدىڭ دامۋ جولىن باتىس ءوركەنيەتىنە باعىتتاعان كۇندە دە, رەسەيدەي الىپ دەرجاۆامەن تىعىز ەكونوميكالىق بايلانىستا بولۋ تەك تيىمدىلىك اكەلەتىنىن بىرەۋلەر بىلە تۇرىپ, ساياسي ۇپاي جيناۋ ماقساتىمەن وعان قارسى بولدى.
مەدۆەدەۆ ۋكرايناعا اعايىنمەن تابىسامىن دەپ كەلگەنىن قايتالاۋدان جالىقپادى. ونى رەسمي كەزدەسۋلەردە, حالىقپەن كەزدەسكەندە دە ايتتى. ەكى ەلدىڭ اراسىن قوساتىن دانەكەر كوپ. ەكى حالىقتى جاقىنداستىراتىن تاريح بار. بالە ىزدەگەنگە وكپەگە اپاراتىن جايلار دا جەتكىلىكتى. اڭگىمە – سونىڭ قايسىسىن قالاۋدا.
ال ءدال قازىر اسا قاجەتتى سانالاتىن ەكونوميكالىق بايلانىستىڭ تۇرلەرى دە كوپ-اق. بۇعان دەيىن داۋعا سەبەپ بولعان مۇناي دا, گاز دا, ەندى جاقىنداسۋدىڭ العىشارتتارىنا اينالا الادى. بۇرىن ەكى رەسپۋبليكانىڭ اۆياتسيا ونەركاسىبى قاتار دامىپ, ۋكراينادا “انتونوۆ” اۆياكاسىپورنىنىڭ داڭقى الەمگە جايىلعان ەدى, ەندى ول توقىراۋدا. كۇش بىرىكسە, قايتا كۇشەيمەك. مۇنى پرەزيدەنتتەر ايتىپ وتىر.
اعايىن ەلدەردى جاقىنداتار جايلار كوپ. ونىڭ تالايى ايتىلدى. ولاردىڭ ءبارىن ءتىزىپ شىعۋ دا قيىن جانە قاجەت تە ەمەس-اۋ. ەڭ باستىسى – نيەت. نيەت ءتۇزۋ بولسا, ارالاسۋعا جول تابىلادى. بۇعان دەيىن ەكى ەل اراسىنداعى تاۋار اينالىمى جىلىنا 25 ميلليارد دوللاردى قۇراسا, ەندى ول 100 ميلليارد بولماق.
اڭگىمە ەكونوميكامەن عانا شەكتەلمەيدى. كورشىلەس ۇلكەن ەكى ەلدىڭ اراسىنداعى قارىم-قاتىناستىڭ ساۋىعۋى بۇكىل ەۋروپا قۇرلىعىنا دا وڭ ىقپال ەتپەك. بۇرىن ۋكراينا باتىس پەن رەسەيدى بولگەندەي بولسا, ەندى ول ەكەۋىن جالعاستىراتىن كوپىر قىزمەتىن اتقارا الادى.
ەكى ەل جاقىنداسسا, ارينە, ول ەڭ الدىمەن ولاردىڭ وزدەرىنە جاقسى. سونىمەن بىرگە, ونىڭ باسقالارعا دا شاپاعاتى تيەتىنى بار. جۇرت سودان دا رەسەي مەن ۋكراينا اراسىنىڭ جاقسارعانىن قۇپ كورەدى.
كەلىسىم جوق جەردە قانتوگىس ورنىعادى
تايلاندتا وپپوزيتسيا مەن بيلىكتىڭ سوڭعى رەت تايتالاسقانىنا ەكى ايدان اسا ۋاقىت ءوتتى. ءبىر كەزدە قارسىلاستار كەلىسىمگە كەلەتىندەي بولىپ ەدى, بىراق ونىڭ اياعى سيىرقۇيىمشاقتانىپ, اقىرى سوڭعى كۇندەرى قاراما-قايشىلىق ءورشي ءتۇستى.
بۇل ەلدەگى بيلىك پەن وپپوزيتسيا اراسىنداعى قاقتىعىس الەم حالقىنىڭ كوز الدىندا. ونى الەمدىك تەلەارنالار ۇنەمى كورسەتىپ جاتادى. اسىرەسە, قىزىل جەيدە كيگەن وپپوزيتسيا ادامدارىنىڭ سانى قانشالىقتى ەكەنىن دە تەلەديداردان جاقسى اڭعاراسىڭ. العاشىندا وپپوزيتسيا قاتارىنا كوبىرەك ادام جينالعان كەزدە بانگكوك كوشەلەرى قىزىل تولقىنعا اينالعانداي كورىنەتىن.
تەلەارنالاردان سونى كورىپ, بۇل ەلدەگى بيلىك پەن وپپوزيتسيا اراسىنداعى كۇرەستىڭ بەيبىت سيپاتىن اڭعارعانداي بولاتىنسىڭ. ءتىپتى بيلىك باسىنداعىلاردىڭ, ونىڭ ىشىندە پرەمەر-مينيستر ابحيسيت ۆەتچاچيۆانىڭ ءوزى بولىپ, وپپوزيتسيانىڭ وكىلدەرىمەن بەتپە-بەت كەلىسسوزدەر جۇرگىزۋى قارسىلاستاردىڭ اراسىنداعى جاڭا قۇبىلىستاي قابىلدانعان. جالپى, قارسىلىق بىلدىرگەن حالىق ءوز پىكىرلەرىن, تالاپتارىن اشىق ايتۋعا مۇمكىندىك العانى, ونى بيلىك تاراپىنىڭ تىڭداۋعا ازىرلىگى باسقالارعا ونەگەدەي كورىنگەن.
اڭگىمە ءتىل تابىسۋعا, بەلگىلى دارەجەدە ەكىنشى جاقتىڭ مۇددە-تالاپتارىن قۇرمەتتەۋگە بارىپ تىرەلەدى. تەك مەنىكى بولسىن دەگەن قاسارىسقان تالاپ ەشقاشاندا جاقسىلىققا اپارمايدى. العاشىندا سونداي تۇسىنىستىك جەمىسىن بەرەر دەگەن دە ءۇمىت بولعان. اسىرەسە, ۇكىمەت تاراپىنان سونداي قادامداردىڭ جاسالعانىن اتاپ وتكەن ءجون بولار. ەڭ الدىمەن, ولار پارلامەنت سايلاۋىن وتكىزۋ جونىندە ۇسىنىس جاسادى. بۇل – سول سايلاۋ نەگىزىندە ۇكىمەت قۇرىلۋعا ءتيىس دەگەن ءسوز. سايلاۋدى وتكىزەتىن ۋاقىت تا بەلگىلەندى. بۇل ءىستى ويداعىداي جۇزەگە اسىرۋ ءۇشىن وپپوزيتسيادان قارسىلىق ارەكەتتەرىن توقتاتۋ تالاپ ەتىلدى.
انىق ادىلەتتىلىكتى قالايتىندارعا بۇل ءوزى ايتارلىقتاي پاراساتتى ۇسىنىس ەدى. تاعى دا ءبىر توقتالا كەتەتىن جاي: بيلىك, ءوزىنىڭ ءمۇمكىندىگى بولا تۇرىپ, ءالەۋەتتى كۇشتەردى شەرۋگە شىققاندارعا قارسى قولدانۋدان ۇنەمى تارتىنىپ وتىردى. وكىنىشكە قاراي, وپپوزيتسيا بيلىكتىڭ ناقتى ۇسىنىستارىن, پاراساتتى قادامدارىن دۇرىس قارسى المادى, تۇسىنىستىكپەن قابىلدامادى.
قانشاما ەسكەرتۋلەردىڭ بولعانىنا قاراماي, قىزىلجەيدەلىلەر, اسىرەسە, سوڭعى كۇندەردە ءتۇرلى ءتارتىپ بۇزۋشىلىق ارەكەتتەردى كۇشەيتتى. ولار استانانىڭ كاسىپكەرلىك ورتالىقتارىنا ورنالاسىپ, ونداعى قوعامدىق تارتىپكە ۇلكەن نۇقسان كەلتىردى. بارريكادالار جاسادى. بيلىكتىڭ بەلگىلى دارەجەدە ىڭعايعا جىعىلعانىن, وپپوزيتسيانىڭ تالاپتارىن تىڭداۋعا ىقىلاستىعىن ولار وزدەرىنشە قابىلداپ, قارسىلىقتارىن كۇشەيتتى, قابىلداۋعا قيىن تالاپتارىن العا تارتتى. وزدەرىنىڭ ۆەتچاچيۆا ۇكىمەتىنىڭ بيلىكتەن كەتۋىن تالاپ ەتۋدەن قايتپايتىنىن مالىمدەدى.
مامىلەلىك ارەكەتتەردەن باس تارتۋ ەلدەگى جاعدايدى ۋشىقتىرا ءتۇستى. ۇكىمەت وپپوزيتسيونەرلەردەن قارسىلاسۋدى توقتاتۋدى تالاپ ەتىپ, ولاي بولماعان جاعدايدا ونى كۇشپەن جۇزەگە اسىراتىنىن ەسكەرتتى. مۇنىڭ اياعى قانتوگىسكە سوقتىردى. بۇگىنگە دەيىن قازا بولعاندار سانى ايتارلىقتاي بولىپ وتىر. اسىرەسە, سوڭعى ءبىراز كۇندە ەلۋگە تارتا ادام قازا بولدى, ونىڭ ىشىندە وپپوزيتسيا باسشىلارىنىڭ ءبىرى – قىزمەتتەن كەتكەن گەنەرال ساۆاسديپحول حاتتيا دا بار. اقىرى بيلىك وپپوزيتسيانى بانگكوك ورتالىعىنان كۇشپەن شىعارۋعا ءماجبۇر بولدى.
كەلىسىمدى قابىلداماعان جەردە قانتوگىس بولاتىنى دا زاڭدىلىق. تايلاندتا قان توگىلىپ جاتىر. كەيدە وسىندايدا قويساڭدارشى دەپ ارااعايىندىققا جۇرەتىندەر دە كەرەك-اق. بۇۇ باس حاتشىسى پان گي مۋننىڭ تايلاند ۇكىمەتى مەن وپپوزيتسيانى قارۋلى قاقتىعىستى توقتاتۋعا شاقىرعان ۇندەۋىن ازىرگە بۇلار ەستىمەي وتىر.
ماماديار جاقىپ.