ەلوردادا ماسالاردى جويۋدىڭ ءۇشىنشى كەزەڭى باستالدى

نۇر-سۇلتان قالاسى اكىمدىگىنىڭ مالىمەتىنشە, ماۋسىم باستالعاننان بەرى قورشاعان ورتانى قورعاۋ جانە تابيعاتتى پايدالانۋ باسقارماسى «استانالىق دەزينفەكتسيا» جشس-مەن بىرلەسىپ اۋماقتى وڭدەۋ بويىنشا 2 تۋر وتكىزدى. ماسالار مەن شىركەيلەردىڭ جاپپاي كوبەيۋىن بولدىرماۋ ماقساتىندا قالانىڭ بارلىق اۋدانىنداعى جۇزدەن استام تاياز سۋ قويمالارى مەن باتپاقتى جەرلەر وڭدەلدى.

ء«ۇشىنشى تۋر اياسىندا اشىق ستاتسيالاردى (كۆارتالىشىلىك اۋماق, كوشەلەر, ساياباقتار, گۇلزارلار, ەلدى مەكەندەر جانە ت.ب.) وڭدەۋ باستالدى. ماسالار ەكوجۇيەنىڭ ءبىر بولىگى بولعاندىقتان, ولاردى تولىق جويۋعا بولمايدى بىراق بۇل شارالار ولاردىڭ سانىن 90%-عا دەيىن جويۋعا جانە ازايتۋعا مۇمكىندىك بەرەدى», دەپ جازدى ۆەدومستۆودان.

بۇل دەزينسەكتسيالىق ءىس-شارالار جاندىكتەردىڭ سانىن ازايتۋعا باعىتتالعان. جۇمىستار تۇنگى ۋاقىتتا – ساعات 21.00-دەن 04.00-گە دەيىن جۇرگىزىلەدى جانە ءار تۋر ايىنا 20 كۇنگە سوزىلادى. بارلىق وڭدەۋ 6 تۋرعا جالعاسادى.

«ەلوردا تۇرعىندارى مەن قوناقتارىنىڭ جايلى دەمالۋى ءۇشىن ادام كوپ جينالاتىن ورىندارعا – ساياباقتارعا, جاعالاۋلارعا, گۇلزارلارعا جانە ت.ب. ەرەكشە كوڭىل بولىنەدى. بۇل جۇمىسقا 150 دەزينفەكتور, بيولوگ-ەنتومولوگتار, 120 بىرلىك موتورلى-رانتستى بۇرىككىش, تەرموگەنەراتورلار, دەزينفەكتسيالىق ماشينالار, دەزينفەكتسيالىق قوندىرعىسى بار موتوشاسسي جۇمىلدىرىلدى», دەپ تولىقتىردى اكىمدىكتەن.

دەزينسەكتسيالىق ءىس-شارالار كەزىندە ساقتىق شارالارىن ساقتاۋ ماڭىزدى. اسىرەسە, وڭدەلەتىن ورىندارعا بارماي, وڭدەۋ كەزىندە تەرەزەلەردى جابۋ كەرەك.

«دەزينسەكتسيالىق جۇمىستار ءۇشىن قۇرامىندا حلورپيريفوس جانە مالاتيون اسەر ەتۋشى زاتى بار, ادامدار مەن جانۋارلار ءۇشىن قاۋىپتىلىگى از ينسەكتيتسيدتەر قولدانىلادى. بۇل پرەپاراتتار قازاقستان رەسپۋبليكاسىنىڭ اۋماعىندا قولدانۋعا رۇقسات بەرىلگەن تىزىلىمگە ەنگىزىلگەن», دەلىنگەن حابارلامادا.