راديولوگيا سالاسىنداعى جاڭا قادام

راديولوگتەر ەۋروپالىق مەك­تەبىنىڭ ماقساتى – قازاقستان­نىڭ جاس راديولوگتەرىنە الەۋ­­مەت­تىك ءمانى بار اۋرۋلاردى (جۇرەك پەن قانتامىرلار پاتولو­گياسى, وكپە تۋبەركۋلەزى, قيمىل-تىرەك اپپاراتى جانە ءسۇت بەزىنىڭ قاتەرلى ىسىگى) دياگنوستيكالاۋدى راديولوگيالىق حالىقارالىق ستاندارتتارى جانە رادياتسيالىق قاۋىپسىزدىك ەرەجەلەرىنە ساي ءبىلىم بەرۋ.

ەكى اپتا ىشىندە (وارم) «استانا تۋتوريال» قا­تىسۋ­شى­لارى راديولوگيا سالا­سىن­­داعى اقش, كا­نا­دا, اۋستريا, وڭتۇستىك كورەيا, تايۆان, بەلگيا, رە­سەي جانە قازاقستاننىڭ بەل­گى­لى ماماندارىنىڭ دارىستە­رىن تىڭدايتىن بولادى. ءدا­رىس بەرۋشىلەردىڭ قاتارىن­دا را­ديولوگتەردىڭ ەۋروپا­لىق مەك­تەبىنىڭ ديرەكتورى, پروفەس­سور رەينميۋللەر راي­نەر, رە­سەي راديولوگتەرى قاۋىمداس­تى­عى­نىڭ پرەزيدەنتى, پروفەس­سور ۆالەنتين سينيتسين, پەنسيل­ۆانيا ۋنيۆەرسيتەتىنىڭ راديو­لوگيا دەپارتامەنتىنىڭ نەيروراديولوگيا سۋبسپەتسياليزاتسيا باعدارلاماسىنىڭ ديرەكتورى, پروفەسسور سۋياش مو­حان, قازاقستان راديولوگتەرى قاۋىمداستىعىنىڭ پرەزي­دەنتى, پروفەسسور راۋشان راقىم­جان­قىزى بار.

ءىس-شارا بارىسىندا بايانداما وقىپ, تۇيتكىلدى ماسەلەلەر توڭىرەگىندە وي وربىتكەن قازاق­ستان راديولوگيالىق قوعامىنىڭ پرەزيدەنتى, پروفەسسور راۋشان راحىمجانقىزى: «بۇگىن مەك­تەپتىڭ اشىلۋىنىڭ العاشقى كۇنى. ءبىز 2018 جىلى ازيا-تىنىق مۇحيتتىق راديولوگتەر قاۋىمداستىعىنىڭ قۇرامىنا كىرگەن بولاتىنبىز. سونىڭ نا­تيجەسى رەتىندە وسى مەكتەپ اشىلىپ وتىر. بۇل ەكى اپتالىق مەكتەپتە ازيا ەلدەرىنىڭ ماماندارى ءدارىس وقيتىن بولادى. ءبىزدىڭ ورتالىقتىڭ مۇشەلىگىنە كىرۋىمىزدىڭ ارتىقشىلىعى وسى – بۇگىنگى ەكى اپتالىق مەكتەپتىڭ اشىلۋى. مەكتەپ مىقتى را­ديولوگتەردىڭ شىعۋىنا ۇلكەن سەپتىگىن تيگىزەدى. سەبەبى الەم بويىنشا جوعارعى ساپالى راديولوگتەردەن ءدارىس تىڭداۋعا مۇمكىندىك تۋىپ وتىر. مىسالى بۇگىن كانادا, تايۆاننان عا­لىمدار ونلاين تۇردە ءدارىس وقۋ­دا», دەدى.

جوعارى دەڭگەيدە ۇيىمداس­تىرىلعان ءىس-شارانىڭ كوورديناتورى, قازاقستان راديولوگتەر قوعامىنىڭ ۆيتسە-پرەزيدەنتى تايىرحان بەكبولات ۇلى ماڭىز­دى ءىس-شارا جونىندە پىكىر ءبىل­دىردى.

– بىرنەشە جىل بۇرىن وسى شەتەلدەن پروفەسسورلاردى شاقىرۋ جايلى جوبانى ۇتىپ العان ەدىك. ەكى جىل پاندەميا كەزىندە وتكىزە المادىق. بيىل سول جوبانى قولعا الىپ وتىرمىز. ەكى اپتادا ماماندارىمىز 60 ءدارىس تىڭدايتىن بولادى. وعان اسىرەسە جاس راديولوگتەردى شاقىردىق. نۇر-سۇلتاننىڭ وزىنەن 88 راديولوگ بار, 3 مامان قىرعىزستاننان كەلدى. ءبىر ايتا كەتەرلىك جايت, وقۋدى اقىسىز قىلدىق. بۇعان دەيىن 2014-2019 جىلدار ارالىعىندا 6 رەت ەڭ ۇلكەن ەۋروپالىق راديولوگتەر مەكتەپ جوباسىن وتكىزگەنبىز. بۇگىنگى جوبانى ەندى ءوزىمىزدىڭ قوعامنىڭ اتىنان اشىپ وتىرمىز. جوبانىڭ ماقساتى – جاس­تاردى حالىقارالىق دەڭگەيدە ءبىلىم الۋعا, ويلانۋعا ۇندەۋ, حالىقارالىق كولەمدە جۇمىس ىستەۋدى ۇيرەتۋ. ويتكەنى امە­ريكادا, ەۋروپادا راديولوگتەردى 4-5 جىل وقىتادى. بىزدە ءالى 2 جىل عانا وقىتىپ كەلەمىز. بيىل, مىنە, 5 جىلدىعىن اشىپ جاتىرمىز. مەنىڭشە, وسىنداي مەكتەپتەر قازاق راديولوگياسىن حالىقارالىق دەڭگەيگە كوتەرەدى دەپ سەنەمىن. 60 لەكتسيا – بالالار ءۇشىن ءبىلىمنىڭ مەيرامى سەكىلدى. ويتكەنى ەكىنىڭ ءبىرى شەتەلگە بارىپ, بىلىكتى ۇستازداردان لەكتسيا تىڭداۋعا مۇمكىندىك تابا بەرمەيدى. لەكتسيانى كورەيادان, تايۆاننان ونلاين فورماتتا وقيدى, جاڭا عانا كانادادان وقىدى, ماسكەۋدەن دە عالىمدار ونلاين تۇردە بايانداماسىن وقىماق» دەدى.

ESOR Astana Tutorial راديولوگتەردىڭ III ورتاازيالىق مەكتەبى قازاقستانداعى دياگنوس­تيكالاۋ قىزمەتىنىڭ دامۋىنا ىقپال ەتىپ, تاجىربيەسىن ارتتىرارى ءسوزسىز. ءىس-شارا 24-ماۋسىمعا دەيىن جالعاسىن تاپپاق.