اقتوبە وبلىسىنا “قازاگرو” اق باسقارما توراعاسى اسىلجان مامىتبەكوۆ باستاعان دەلەگاتسيا كەلدى. ونىڭ قۇرامىندا “مال ونىمدەرى” اق توراعاسى الەكساندر سولوۆەۆ, “قازاگرو” اق باسقارما توراعاسىنىڭ كەڭەسشىسى توبىلبەك وماروۆ, “اگرارلىق نەسيە كورپوراتسياسى” اق پرەزيدەنتى داۋرەنبەك وماروۆ, “قازاگرو قارجى” اق باسقارما توراعاسى دۋلات ايتجانوۆ بار.
ولاردىڭ قاتىسۋمەن وبلىستىق اكىمدىكتە ءماجىلىس ءوتتى. وعان اۋىل شارۋاشىلىعىندا ينۆەستيتسيالىق جوبالاردى جۇزەگە اسىرىپ جاتقان جانە الداعى ۋاقىتتا جاڭا جوبالاردى قولعا الۋعا تالاپتانىپ جۇرگەن بيزنەس, سونداي-اق, وسى سالاعا قاتىسى بار قۇرىلىمدار وكىلدەرى شاقىرىلدى. ونى وبلىس اكىمىنىڭ ءبىرىنشى ورىنباسارى ىزباق ومىرزاقوۆ ءجۇرگىزدى. ماجىلىستە ءسوز العان “قازاگرو” اق باسقارما ءتوراعاسى اسىلجان مامىتبەكوۆ دەلەگاتسيانىڭ جۇمىس ساپارىنىڭ ماقساتى قازاقستاننىڭ 2010-2014 جىلدارعا ارنالعان يندۋستريالاندىرۋ كارتاسىنا ەنگەن ينۆەستيتسيالىق جوبالاردىڭ جۇزەگە اسىرىلۋ بارىسىن باقىلاۋ, جاڭا ينۆەستيتسيالىق جوبالاردىڭ وتىنىمدەرىن وسى جەردە ناقتى قاراپ, وزدەرىنە قاتىستى سۇراقتارعا جاۋاپ بەرۋ ەكەنىن جەتكىزدى. سونداي-اق, وبلىستا مەملەكەتتىڭ قاتىسۋىمەن ءجۇزەگە اسىرىلىپ جاتقان ءۇش ءىرى جوبا بار ەكەنىنە توقتالدى. ونىڭ ايتۋىنشا, ءۇش جوبا دا بيىل پايدالانۋعا بەرىلەدى ەكەن. وسى جوبالاردىڭ ءبىرى – “پاريج كوممۋناسى” جشس-ءنىڭ 40 مىڭ شوشقالىق “بەستاماق” مال شارۋاشىلىعى كەشەنى جىلىنا 2000 توننا ەت وندىرۋگە مۇمكىندىك بەرەتىن كورىنەدى. جالپى قۇنى 2,3 ملرد. تەڭگە تۇراتىن بۇل كەشەن ىسكە قوسىلعاندا 171 جاڭا جۇمىس ورنى اشىلادى. ال “ايس” جشس-ءنىڭ 1200 سيىرلىق تاۋارلى-ءسۇت فەرماسىندا جىلىنا 7200 توننا ءسۇت ءوندىرىلمەك. بۇل جوباعا 2665,8 ملن. تەڭگە ينۆەستيتسيا سالىنىپتى.
“يزەتگرەنحاۋزە” جشس-ءىنىڭ جىلىجايى ىسكە قوسىلعاندا جىلىنا 1200 توننا كوكونىس ءوندىرىلىپ, 32 ادام جۇمىسقا ورنالاسادى. بۇدان باسقا وبلىستا جالپى قۇنى 1,2 ملرد. تەڭگە تۇراتىن ءتورت ينۆەستيتسيالىق جوبا جۇزەگە اسىرىلۋدا. ونىڭ ۇشەۋى قازىردىڭ وزىندە پايدالانۋعا بەرىلگەن. حولدينگ وتكەن جىلى اقتوبە وبلىسىنىڭ اگرارلىق سەكتورىنا 5,5 ملرد. تەڭگە قارجى سالىپتى.
ول سونداي-اق, جوبالاردى قابىلداۋدىڭ ءبىراز جەڭىلدەتىلگەنىن مالىمدەدى. جاڭا جوبانى ۇسىنۋعا نەبارى سەگىز قۇجات قانا كەرەك ەكەن. حولدينگ بيزنەس-جوسپاردى جاساپ بەرۋگە دە دايىن كورىنەدى. الايدا, كەپىلسىز ەشقانداي نەسيە بەرىلمەيتىنىن قاداپ ايتتى. سوندىقتان بىردەن ءىرى جوبالار ۇسىنباي, مۇمكىندىگىڭ جەتەتىندەي ءىس باستاۋ ءتيىمدى ەكەنىن ەسكە سالدى. حولدينگتىڭ جەردى, سونداي-اق توزىعى جەتكەن تەحنيكالاردى دا كەپىلگە الىپ وتىرعانىن اۋىل شارۋاشىلىعىنا قولداۋ كورسەتۋ دەپ باعالادى.
ءوزارا سۇراق-جاۋاپ تۇرىندە وتكەن ماجىلىسكە قاتىسۋشىلار “قازاگرو” ۇلتتىق باسقارۋ حولدينگى” اق ارقىلى قارجىلاندىرىلۋدىڭ جولدارى مەن شارتتارى بويىنشا مول ماعلۇمات الدى. جالپى, “قازاگرو” كومپانياسى توبى ارقىلى ەلىمىزدىڭ اگرارلىق سەكتورىن قولداۋعا بىلتىر 220,9 ملرد. تەڭگە ءبولىنىپتى.
دەلەگاتسيا وبلىستاعى وسى حولدينگ ارقىلى قارجىلاندىرىلىپ, جۇزەگە اسىرىلىپ جاتقان بىرقاتار اۋىلشارۋاشىلىق كاسىپورىندارىن ارالاپ كوردى.
ساتىبالدى ءساۋىرباي,
اقتوبە وبلىسى.