قر پرەمەر-ءمينيسترى ءاليحان سمايىلوۆ بۇۇ باس حاتشىسىنىڭ ورىنباسارى, بۇۇدب اكىمشىسىنىڭ كومەكشىسى ۋشا راو-موناريمەن كەزدەستى, دەپ حابارلايدى Egemen.kz ۇكىمەتتىڭ رەسمي سايتىنا سىلتەمە جاساپ.
نيۋ-يوركتەگى بۇۇدب اتقارۋشى اگەنتتىگىنىڭ كەڭەسشىسى دەرەك پايپەر, بۇۇدب ەۋروپا جانە تمد بويىنشا وڭىرلىك بيۋروسى ديرەكتورىنىڭ ورىنباسارى مارينا ۋولتەر مەن بۇۇدب-نىڭ قازاقستانداعى تۇراقتى وكىلى ياكۋپ بەريش قاتىسقان كەزدەسۋ بارىسىندا بۇۇدب-نىڭ قازاقستانداعى قىزمەتى اياسىندا ىنتىماقتاستىقتىڭ كەڭ اۋقىمدى ماسەلەلەرى تالقىلاندى.
ءاليحان سمايىلوۆ ءوز سوزىندە قازاقستان 1992 جىلعى 2 ناۋرىزدا, تاۋەلسىزدىك العاننان كەيىن كوپ ۇزاماي بۇۇ-عا مۇشە بوپ كىرگەنىن ەسكە سالدى.
«سودان بەرى ءبىز بۇۇ-نىڭ قولداۋىن ۇدايى سەزىنىپ كەلەمىز, ال ونىڭ جاھاندىق ساياساتى مەن باعدارلامالارىنا قاتىسۋ – قازاقستاننىڭ سىرتقى ساياساتتاعى باسىمدىقتارىنىڭ ءبىرى», دەدى قر پرەمەر-ءمينيسترى.
ۇكىمەت باسشىسىنىڭ ايتۋىنشا, بۇۇدب-نىڭ قازاقستانداعى قىزمەتى ايتارلىقتاي دارەجەدە قورشاعان ورتانى قورعاۋعا باعىتتالعان. وسىلايشا, اگەنتتىكتىڭ قاتىسۋىمەن جانە قولداۋىمەن قىزىلوردا جانە شىعىس قازاقستان وبلىستارىندا تابيعاتتى قورعاۋ جوبالارى ىسكە اسىرىلدى, سونداي-اق جالپى اۋدانى 2 ملن گەكتاردان استام التى ەرەكشە قورعالاتىن تابيعي اۋماق قۇرىلدى.
پرەمەر-مينيستر قازاقستان بۇۇدب-نىڭ 2021-2025 جىلدارعا ارنالعان جاڭا ەلدىك باعدارلاماسىن قولدايتىنىن اتاپ ءوتتى.
«باعدارلاما «جاڭا قازاقستان» تۇجىرىمداماسى اياسىندا پرەزيدەنت قاسىم-جومارت توقاەۆ ايقىنداپ بەرگەن ەلدەگى جۇرگىزىلىپ جاتقان اۋقىمدى ساياسي جانە ەكونوميكالىق رەفورمالار تۇرعىسىندا وزەكتى بولىپ تابىلادى», دەدى ءاليحان سمايىلوۆ.
ءوز كەزەگىندە ۋشا راو-موناري بۇۇ-نىڭ قازاقستاننىڭ تۇراقتى دامۋىنا قولداۋ كورسەتۋگە دايىن ەكەنىن راستادى.
«تدم-عا قول جەتكىزۋ دامۋ جولىن تۇبەگەيلى وزگەرتۋدى تالاپ ەتەدى. 2030 جىلعا دەيىن بار-جوعى سەگىز جىل ىشىندە دامۋدى قالپىنا كەلتىرىپ, العا جىلجۋ ءۇشىن كوپ كۇش-جىگەر سالۋىمىز كەرەك. بۇل ءۇشىن ادامدارعا ينۆەستيتسيالار سالۋ, الەۋمەتتىك قورعاۋدى جەتىلدىرۋ, ساپالى ءبىلىم بەرۋدى قامتاماسىز ەتۋ, لايىقتى جۇمىس ورىندارىن قۇرۋ, جاڭارتىلاتىن ەنەرگيا كوزدەرىنە كوشۋ جانە بارلىعى ءۇشىن تسيفرلاندىرۋدى قامتاماسىز ەتۋ قاجەت. مۇنداي باتىل ارەكەتتەر تدم قارجىلاندىرۋ جۇيەسىن قايتا قاراستىرۋعا الىپ كەلەدى», دەدى ۋشا راو-مونارين.
كەزدەسۋ قورىتىندىسى بويىنشا قر ۇەم مەن بۇۇدب اراسىندا تۇراقتى دامۋ ماقساتتارى سالاسىنداعى 2030 جىلعا دەيىنگى كۇن ءتارتىبىن جانە بۇۇدب-نىڭ 2021-2025 جىلدارعا ارنالعان ەلدىك باعدارلاماسىن ىسكە اسىرۋ اياسىنداعى نيەتتەر تۋرالى حاتتاماعا قول قويىلدى, ول قازاقستان مەن بۇۇدب اراسىنداعى ىنتىماقتاستىقتى ودان ءارى كەڭەيتۋگە ىقپال ەتەتىن بولادى.
ايانا توعانبەك